NI VUKA tiko e dua na waqavuka ena vakila na vakacevaruru ni cagi ni coqa tiko na vuso ni tabana, dau kania kina e levu na waiwai. Na waqavuka mada ga e volekata yani ena vakila na kena revurevu. Ena sagai gona me veiyawaki nodra vuka na waqavuka era vakayagataka vata e dua ga na rara.

Sa ra kunea na idinia ni waqavuka na kena iwali. Qo nodra dikeva na vuso ni taba ni manumanuvuka lelevu, na ikeli, kei na belo era dau vuka tubu.

Vakasamataka mada: Nira vuka tiko na manumanuvuka lelevu qori, e dau duri cake vakamalua na vuti ni vuso ni tabadra. E vakamamadataka nodra vuka cake, veirauti tale ga nodra vakatevutaba. Rawarawa kina nodra vuka tiko e macawa. Era bulia gona na idinia na taba ni waqavuka me tautauvata kei na taba ni manumanuvuka. Dua na vakadidike era cakava nira vakatovolea na kaukaua ni cagi, ra dikeva ke vakaduri cake na vuso ni taba ni waqavuka, me veiraurau tale ga na kaukaua ni cagi, ena vinaka sara na vuka ni waqavuka ena gauna qo ena 10 na pasede se sivia. Na vuna? Na vuso ni taba ni waqavuka ena vakalailaitaka na leqa e basika, lailai tale ga kina na vakacevaruru ni cagi, e qai biliga na “waqavuka me toso vinaka,” e kaya na ivola Encyclopedia of Flight.

Kena buli gona na vuso ni taba ni waqavuka e rawa kina ni vuka vakayawa, usana e levu na ka, lekaleka na tabana me rawa ni vakayagataka e dua na vanua lailai ena gauna e ro kina, lailai tale ga na waiwai e kania. Kena ivakaraitaki ena 2010 e tukuni ena dua na itukutuku mai na isoqosoqo na NASA, nira “maroroya tale” na kabani ni waqavuka e “2 na bilioni na qaloni [7,600 milioni na lita] na waiwai ni waqavuka e vuravura raraba” vakavuna me lailai sara kina na ka e kaburaka tani mai na waqavuka.

Na cava o nanuma? E bula vakaidewadewa se buli na vuso ni taba ni manumanuvuka?