KA ERA TUKUNA ESO

Ra kaya eso nida rawa ni cakava vei ira na manumanu na ka ga eda vinakata. So tale era nanuma me caka vei ira na manumanu na ka eda vinakata me caka vei keda.

• Kaya e dua e dau valataka nodra taqomaki na manumanu ni “sega ni dodonu me vakayagataki na manumanu meda rawaka ga kina se ivurevure ni ilavo.” E tomana: “Meda kua ni raici ira na manumanu mera vaka na bobula.”

• Dua qo e sega sara ga ni vakabauti, nona vola e dua na marama vutuniyau o Leona Helmsley e $12 na milioni me ivotavota ni nona koli. Vinakata tale ga me rau bulu veitikivi.

Me vakasamataki: Meda dau raici ira vakacava na manumanu?

KA E KAYA NA IVOLATABU

E kaya na Dauveibuli, na Kalou o Jiova nida na “lewa tale ga na ika ni waitui kei na manumanuvuka ni lomalagi kei na kabula kece ga era veitosoyaki voli e vuravura.” (Vakatekivu 1:28) Mai na rai gona ni Kalou eda uasivi ira na manumanu.

E vakadeitaka na tikina qori na ka e tukuni ni bera na tikinivolatabu se qai cavuti oti ga oya ni “bulia na tamata na Kalou me rau veiucui, e bulia me ucuya na Kalou, e bulia na tagane kei na yalewa.”—Vakatekivu 1:27.

E vakasakiti noda dau vakaraitaka eso na itovo vakalou me vaka na vuku, lewadodonu kei na loloma baleta nida buli meda “ucuya na Kalou.” Eda rawa ni vakaitovo, da sokalou tale ga. Era sega ni cakava rawa qori na manumanu nira sega ga ni buli mera “ucuya na Kalou.” Era sega ni uasivi keda, era a sega ga ni buli meda tautauvata.

Kena ibalebale qori meda vakalolomataki ira? Sega.

• Era vakadreti na Isireli ena Lawa ni Kalou mera dau vakacegui ira nodra manumanu, ra vakani, ra kua ni vakalolomataki, ra taqomaki tale ga mera kua ni mavoa.—Lako Yani 23:4, 5; Vakarua 22:10; 25:4.

“Ono na siga mo cakava kina na nomu cakacaka, ia mo cegu mai na nomu cakacaka ena ikavitu ni siga, me rawa ni cegu na nomu bulumakau tagane kei na nomu asa.”—Lako Yani 23:12.

KA ERA TUKUNA ESO

So era vakamate manumanu me ka ga ni qito se lasa. So tale era duavata kei na dauvolaivola ni Rusia o Leo Tolstoy, ni “ka vakasisila” na vakamatei kei na laukana ni manumanu.

KA E KAYA NA IVOLATABU

E vakatara na Kalou mera vakamatei na manumanu me taqomaki kina na bula se me vakarautaki kina noda isulu. (Lako Yani 21:28; Marika 1:6) E kaya na iVolatabu ni rawa tale ga ni vakamatei na manumanu me kakana. E tukuni ena Vakatekivu 9:3: “E rawa ni dou kania na manumanu bula kece era veitosoyaki.” O Jisu mada ga a vukei ratou nona tisaipeli me ratou qoliva na kedratou.—Joni 21:4-13.

Matata tale ga ena iVolatabu ni “cati ira kece era taleitaka na itovo kaukaua” na Kalou. (Same 11:5) Eda kila kina ni sega ni vinakata na Kalou mera vakamavoataki se vakamatei na manumanu me ka ga ni qito se lasa.

E tukuni ena iVolatabu ni dau raica vakabibi nodra bula na manumanu na Kalou.

• Tukuni kina ena gauna ni bulibuli ni “qai cakava na Kalou na veimataqali manumanu kila e vuravura kei na veimataqali manumanu manoa kei na veimataqali manumanu kece ni vanua era dau qasi. E qai raica na Kalou ni sa vinaka.”—Vakatekivu 1:25.

• Tukuni ena iVolatabu me baleti Jiova: “E solia na kakana vei ira na manumanu.” (Same 147:9) Vakarautaka tale ga na Kalou na vanua kei na ka mera bula kina na manumanu.

• Kaya o Tui Tevita ena nona masu: “Oni maroroya na tamata kei na manumanu, i Jiova.” (Same 36:6) Kena ivakaraitaki, nona taqomaka o Jiova e le walu kei na veimataqali manumanu ena gauna e luvuca kina na vuravura. Oti sa qai vakarusai ira kece na daucaka ca.—Vakatekivu 6:19.

E vakamareqeti ira gona na manumanu o Jiova, e vinakata tale ga meda cakava qori.

“Na tamata yalododonu e maroroya na nona manumanu.”​—Vosa Vakaibalebale 12:10.