RAU toso voleka yani o Natalya kei na luvena tagane yabaki ciwa o Aslan, vei rau na veitinani o Zarina kei na luvena yalewa yabaki tinikarua o Anzhelika. Ra dabe tale tu ga ena vanua qori e udolu vakacaca na gone kei ira na uabula, ra qai yadravi tu vei ira na dauvakacaca era vakaiyaragi lelevu ni veivakamatei.

Qo na 1 ni Seviteba, 2004 ena siga Vukelulu. Na mataka ni siga qori era a tiko e tautuba na gonevuli kei ira na itubutubu mera marautaka na imatai ni siga ni vuli e Beslan, e dua na tauni lailai e Alania, e Rusia. Vakasauri ga nodra tabili yani e le 30 vakacaca na dauveivana kei ira na dau vesu bomu i yagodra mera bolemate kina. Era kaikaila ra vanavana tale ga vakaveitalia i macawa. Era kauti ira sara vakavesu na gonevuli kei ira na kena vo ina dua na rumu levu ni qito e koronivuli, qai tuva yavoki na bomu.

Se qai imatai ni siga qo ni nodra vesu siga tolu tu na ilala qori. Era sega ni via vakamalumalumu na ito dauvakacaca, o ira tale ga na dau veitaqomaki era dre ga nodra mua, qai sega ni wali rawa na leqa. Nanuma lesu o Natalya, a vuli iVolatabu tiko kei ira na iVakadinadina i Jiova: “Dua na ka na levu ni noqu masu.”

Ni donuya tiko na icavacava ni vulaikatakata, dua na ka na neimami katakata ena loma ni vale qori. Ena ikarua ni siga era tu kina vakavesu, e sega ni bau soli vei ira na kakana se wai, ni sa lai ikatolu ni siga, na Vakaraubuka, so era sa gunuva tale na nodra suasua, ra kania tale ga na senikau era kauta yani na gonevuli me nodra na qasenivuli. E kaya o Natalya, “A solia vei au e dua na draunikau e dua na gonetagane keirau dabe veivolekati tiko. Au wasea rua me soli e dua vei Anzhelika, dua tale vei Aslan.”

Ia ni bera ni cava na ikatolu ni siga sa katuvu na vala. “Au bale ena kaukaua ni kacabote,” e kaya o Natalya. “Kubou vakalevu na rumu qai tekivu na veivanavanai.” Gauna e katuvu sara tu ga kina na veivanavanai rau qasi tani vakamalua o Natalya kei Aslan, qai vukei  rau e dua na turaga ni Ossetia o Alan. Ka ni rarawa ni levu era mate.

Era mate e drau vakacaca na gone kei na uabula, dua o Anzhelika. Vakamacawa na kena rogo tu na tagiyaso kei na tagilagalaga e Beslan. Na tabavale e tiko kina na rumu i Natalya e tadrava sara tu ga yani na koronivuli. Gauna sa tara oti kina na koronivuli vou, se dredre tiko ga vei Aslan me lesu kina. Sega mada ga ni lai qito e tautuba. Kaya o Natalya: “Keirau dau kerea vakalevu na veivuke i Jiova me valuta kina na nona rere.” Yaco na gauna sa qai doudou tale ni lesu i koronivuli.

Dredre tale ga vei Natalya me lako ina nodra Vale ni Soqoni na iVakadinadina i Jiova. E kaya: “Gauna kece au tiko kina kei ira e le levu ena dua na vanua lailai ga, au dau nanuma ni so era na curu botea yani. Dau masulaka me kua mada ga ni yaco qori. Sega ni dede au sa muduka noqu dau gole ina soqoni. Dau ora tu na lomaqu ni keirau a bula vakaveitinani ena veivanavanai qori, ia ra mate e levu.”

“Au vakavinavinaka vakalevu vei ira na lewe ni ivavakoso nodra dau veivukei,” e kaya o Natalya. “O Tatyana, e dua na iVakadinadina, e dau sikovi au yani ena veiyatolu na siga. Oti e kauta tale ga yani e dua tale na iVakadinadina o Ulyana, e marama yalovinaka, maqosa na itautau ni nona vosa, dau vosa tu ga vakamalua, ia e buta vinaka ena iVolatabu. E vakavinavinakataka na noqu sasaga, dau vakarogoci au vinaka.

“E wilika o Ulyana na nona vosa na yapositolo lotu vaKarisito o Paula ena 2 Korinica 1:9. Ni vakararawataki oti e Esia e kaya o Paula: ‘Keitou nanuma ni keitou sa totogimate.’ E wilika tale ga na Aisea 40:31: ‘O ira na nuitaki Jiova era na vakaukauataki tale. Era na vuka e tabadra me vaka na ikeli.’ Na veitikinivolatabu qori, vaka kina nona dau veiuqeti vakayalololoma o Ulyana kei ira eso tale, e vakayaloqaqataki au meu lesu ina soqoni vaKarisito kei ratou na luvequ. Ia au se rere tiko ga ena gauna au tiko kina ena vale ni soqoni.”

A qai iVakadinadina i Jiova tale ga o Zarina, rai vakanamata tu ni rau sa na veimarautaki tale kei Anzhelika ni sa vakaturi ena dua na vuravura totoka, sautu, qai veiliutaki kina na Matanitu ni Kalou. (Maciu 6:9, 10; Cakacaka 24:15) A papitaiso o Natalya kei ratou na luvena ena 2009. Ratou se tiko volekata ga na irusarusa ni vanua ni qito e koronivuli, ia ratou sa guilecava na veika ca a yaco. E kaya o Natalya: “Qo au sa qai rawa ni doudou na talanoataka na siga oya, au sega tale ni rere se taqaya tiko. Na Kalou ga e neimami ivukevuke.”