E KAUKAUA sara na ikati ni korokotaile ni vakatauvatani kei ira na vo ni manumanu era bula tiko nikua. Dua qo na korokotaile ni waitui, era dau kune volekati Ositerelia. Nira kati, e vakatolutaki na ikati ni laione kei na taika. E vavaku na kuliniyagona, ia e veivakurabuitaki nona dau vakila totolo na ka e galegalena. E laurai ni uasivi sara nona dau vakila na ka ena galegalena ni vakatauvatani kei na vusoniligada. E rawa vakacava qori?

E tiko e galegalena e vica vata na udolu na nave e dau vakila kina na ka. E kaya na dauvakadidike o Duncan Leitch ni dikevi ira oti: “Era lai basika na nave qo ena dua na qara e tiko ena nona qavokavoka.” Era taqomaki kina na nave somidi ni galegalena, ena gauna vata qori e totolo nona vakila na ka, e bera tale na misini. Oya na vuna e rawa ni vakaduiduitaka kina na kakana kei na benu e gusuna. Ena biuti luvena tale ga e gusuna ke via kauta ena dua na vanua, ena sega ga ni quruta vakacalaka. E laurai gona ni galegale ni korokotaile sa bau kaukaua dina, e vakila totolo tale ga na ka.

Na cava o nanuma? E bula vakaidewadewa se buli na galegale ni korokotaile?