ULUTAGA LEVU | O DAU LEWA VINAKA NOMU BULA?
iTuvaki Dredre: Sega ni Lewai Rawa
O TAUVIMATE bibi tiko? drau sa veisere kei watimu? se takali e dua o dau lomana? Ni yaco eso na ituvaki eda sega ni lewa rawa, eda dau diva ga me a kua ni yaco. O na lewa vinaka ga vakacava na nomu bula?
IVAKARAITAKI VAKAIVOLATABU: PAULA
E gugumatua na yapositolo o Paula ena nona cakacaka vakadaukaulotu ena imatai ni senitiuri, qai levu sara na vanua e lai vunau kina. Ia e qai tini koso qori ena nona lai vesu vakatawadodonu ena dua na vale era yadrava tu na sotia me rua na yabaki. A sega ni yalolailai o Paula, e kauaitaka ga na ka e rawa ni cakava. E vakauqeti ira vakayalo na lai sikovi koya yani qai vakacegui ira. E vola sara mada ga eso na ivola era sa mai lewe tu ni iVolatabu nikua.—Cakacaka 28:30, 31.
KA E CAKAVA O ANJA
Me vaka sa vakamacalataki oti mai ni sa tu ga i vale o Anja. E kaya: “Sa lewa tu noqu bula na kenisa. Au mareqeta noqu bula ena gauna qo, au mani nanuma meu sa kua ni cakacaka se veimaliwai vakalevu.” Sa sega ni lewa rawa na kena ituvaki o Anja, ia na cava e cakava? E vakamacalataka: “Bibi me veisau na noqu ituvatuva. Au vakaliuca ga na veika e bibi, tuvanaka tale ga me vakatau ena kequ ituvaki na ka au cakava. Niu cakava qori, au lewa vinaka kina noqu bula.”
“Niu sa vulica meu lomavakacegu ena ituvaki kece au sotava.”—Vosa i Paula ena Filipai 4:11
KA O RAWA NI CAKAVA
Ke o sega ni lewa rawa na kemu ituvaki, rawa ni o muria eso na vakatutu qo:
-
Kauaitaka ga na ka o rawa ni lewa vinaka kina nomu bula. Kena ivakaraitaki, de dua o sega ni lewa rawa na ka e yaco ina nomu bula, ia vakacava o rawa ni vakaukauayago, kania na kakana bulabula, vakacegu vinaka tale ga?
-
Me matata vei iko na ka o via cakava. Kua ni saga mo cakava kece ena dua ga na gauna. E vinaka mo cakava vakalalai e veisiga mo rawata kina nomu isausau.
-
Cakava eso mada ga na cakacaka lalai e vakamarautaki iko, me vaka na qua teveli e valenikuro kei na masi iyaya ni kana. Raica me rakorako nomu isulu. Me caka ena mataka lailai na cakacaka o nanuma ni bibi.
-
So tale ga na ka o rawa ni vulica ena kemu ituvaki. Vakacava, o rawa ni vosota kina na veimataqali leqa tale eso? O rawa ni vukei ira kina eso tale?
Bibi me Nanumi: De o sega ni lewa rawa na kemu ituvaki, ia o na rairai lewa vinaka ga na ka o cakava kina.
Rawa ni o Wilika Tale ga
SAUMI NA TARO VAKAIVOLATABU
Tauvimate Bibi—Ena Walia na iVolatabu?
Io! Raica mada e tolu na ka mo cakava mo vosota kina na tauvimate bibi.
YADRA!
Na Rai ni iVolatabu me Baleta Noda Vakararawataki
E kauaitaka na Kalou na noda vakatovolei kei na noda rarawa?
NA VALE NI VAKATAWA
Ni Vakaleqai na iTuvaki ni Yagoi Luvemu
Dikeva e tolu na ituvaki dredre o rawa ni sotava kei na sala e rawa ni vukei iko kina na ivakasala vuku ena ivolatabu.
NA VALE NI VAKATAWA
