E TUKUNI ena dua na itukutuku ni sivia na 700 na milioni e vuravura raraba mai na yabaki 15 lako cake era sega tu ni kila na wilivola kei na volavola. E sega kina ni levu na ka era kila, okati kina na ivakavuvuli ena iVolatabu me baleta na itovo vinaka era “volai meda vakavulici kina.” (Roma 15:4) Ena so gona na vanua era veivakavulici tiko kina ena iVolatabu na iVakadinadina i Jiova, era veivakavulici tale ga ena wilivola kei na volavola. Na vuli qori e sega ni saumi. Na cava sa rawati kina?

Dikeva mada nodra cakacaka na iVakadinadina i Jiova e Mexico, e vosataki kina vakalevu na vosa vakaSipeni. Me tekivu mai na 1946, era veivakavulici na iVakadinadina i Jiova vei ira e sivia na 152,000 mera kila na wilivola kei na volavola, levu na gonevuli qori era qai veivakavulici tale ga. E levu sara na ivola ni vakavinavinaka e vola na matanitu me  baleta nodra cakacaka vinaka ni veivakavulici. E tukuni ena dua na ivola: “E vakavinavinakataki kemuni na isoqosoqo ni General Board of Education ena nomuni veitokoni ena ituvatuva ni nodra vakavulici na uabula e vakatokai me Adult Education Program.”

E yaga raraba vei ira na gone kei ira na itabaqase na porokaramu ni veivakavulici qo. Kena ivakaraitaki, e dua na marama o Josefina, e qai vuli ni sa yabaki 101, e vakacavara vinaka nona vuli ni oti e rua na yabaki!

E vosataki vakalevu e Mexico na vosa vakaSipeni, ia e vulici eso tale na vosa. Ena 2013, eso mai na walu na matatamata era bula tiko e kea era vulica sara ga na wilivola kei na volavola ena nodra vosa ni sucu nira vuli ena porokaramu qo.

E yaga ni kilai na wilivola kei na volavola baleta ni levu tale na ka e rawa ni vulici kina. Koya e vinaka sara oya nira rawa ni wilika na iVolatabu na matatamata kece era kila na wilivola kei na volavola. Ni uqeti vakalou na iVolatabu e rawa ni sereki ira mai na veivakabobulataki ni ivakavuvuli vakatevoro, lotu lasu, kei na ivalavala e veivakararawataki.—Joni 8:32.