E DAU nanumi tu nida bulia ga na tamata na qia. Ia e vakadinadinataki ni cala na nanuma qori! Sa qai dikevi qo ni tiko tale ga na qia ena luve ni manumanu lailai na Issus leafhopper. E kune ga vakalevu e Urope. *

E totolo sara nona lade na luve ni manumanu lailai qo, kena totolo e rawa ni 3.9 na mita dua na sekodi. Ni vakatauvatani nona kaukaua kei na idre kei vuravura e kilai me gravity, e laurai ni voleka ni vakaruanadrautaki na idre e coqa tiko ni lade! Na nona totolo ni lade e bera tale na sauriva ni mata. Ena vakayagataka na yavana ruarua e muri ni lade, ia ena vinakati me tautauvata na gauna kei na kaukaua e cakava kina. E rawa vakacava qori?

Vakasamataka mada: Era dikeva na saenitisi ni tiko na qia ena isema ni yagona kei na yavana e muri. Ni lade, na qia sara ga qori ena vukea me rau yavala vata na yavana ena dua ga na gauna. Ke sega ena rawa ni cacawiriwiri!

Nira dau lade na manumanu lelevu e lewa na ka era cakava na nodra mona kei na isema ni nodra nave tale eso me rawa ni tautauvata kina na yavala ni yavadra. Ia e berabera tale qori vua na luve ni leafhopper. E vakayagataka ga o koya na nona qia. E kaya e dua na dau volaivola, e dau vakadidike tale ga o Gregory Sutton: “Eda dau nanuma ni laurai ga na qia ena misini eda bulia na tamata.” Na vuna? E kaya tale o koya “nida sega ga ni vakadidike vinaka sara.”

Na cava o nanuma? E bula vakaidewadewa se buli na qia e kune ena manumanu lailai na Issus leafhopper?