E tukuni ena tabana ni bula na World Health Organization, mera vakasucumi ira na gone na tinadra ena loma ni dua ga na aua nodra se qai vakasucu. Mera cakava tiko ga qori yacova ni vula ono. Ia e vakamacalataka na isoqosoqo e matataka na veivuke raraba na UNICEF, ena tabana e qarava na Regional Nutrition Adviser for Eastern and Southern Africa, ni lasutaki na kena dau kaburaki ena tabana ni itukutuku ni “vinaka tale ga na sucu tawa itini na formula, me vaka na wainisucu ni tinanigone.”

KA E KAYA NA IVOLATABU: “Na tamata yalowai e vakabauta na vosa kece, ia o koya e yalomatua e vakasamataka na nona ilakolako kece.”—Vosa Vakaibalebale 14:15.

Era kaya na dauvakadidike mai Montreal, ke dau kaukaua nodra lewa na itubutubu ra qai sega ni dauloloma, era na rawa ni levulevu sivia na luvedra. E rawa ni sivia na iwiliwili qori ena 30 na pasede ni vakatauvatani kei ira na gone e veiraurau vinaka na nodra loloma, ra veivakavulici tale ga vakayalololoma na itubutubu.

O BAU KILA? E tukuni tu ena iVolatabu ena dua na gauna makawa sara na veisusu e yaga duadua vei ira na gone.—Kolosa 3:21.

A vakayacori e dua na vakadidike me baleti ira na vuvale mai Necaladi era cakacaka ruarua na itubutubu. E laurai nira veimaliwai vinaka kei ira na luvedra o ira na itubutubu era dau wasea na gauna ni nodra cakacaka kei na gauna era vakayagataka e vale, ni vakatauvatani kei ira na itubutubu era vakalaiva na nodra cakacaka me vakaleqa na nodra itavi ena vuvale. Kena ivakaraitaki, nira sega ni wasea na gauna ni cakacaka kei nodra gauna e vale na itubutubu era rawa ni vakawaleni kina na gone, nira dau cakacaka tale tiko mai vale ena talevoni ni sa oti na gauna ni cakacaka.

ME VAKASAMATAKI: “E vagauna na ka kece ga.”—Dauvunau 3:1.