O dau taleitaka na qito, ia o watimu e vinakata me dau wilivola. O maqosa, o dau tuvatuvanaki matau tale ga, ia o watimu e sega soti. O taleitaka na veimaliwai, e vinaka cake vei watimu me tu taudua.

O tukuna lo ga: ‘Keirau sega ni dau duavata! Cava keirau sega ni siqema kina qo ni keirau se veibuku tiko?’

O sa rairai siqema vakalailai. De dua ena gauna qori o dau vakalaiva tu ga, ia ena yaga sara ena nomu vakawati. Ena vukei iko na ulutaga qo mo cakava qori. Dikeva mada eso na duidui e rawa ni dau yaco.

So na duidui e bibi me kauaitaki. Na inaki levu ni veibuku me rau kila na veitau na veika erau duavata kina. Nira raica gona e levu na veitau ni tiko e levu na duidui nira se veibuku, sa ra tinia koso ga nodra veikilai de ra qai veivutunitaka nodra bula vakawati baleta ni sega ni yavutaki ena dina. Ia vakacava na duidui lalai e sega ni bibi sara—na kena e dau kune ga ena bula vakawati?

Ena tiko ga na duidui. Ena kune gona na duidui vei rau na veiwatini ena so na gauna, qo eso na kena ivakaraitaki:

Veika e dau taleitaki. E kaya e dua na marama vakawati o Anna *: “Au sega ni dau taleitaka vakalevu na cakava na ka e tautuba, ia na vanua e susu kina o watiqu era dau kaba ulunivanua e robota tu na ucacevata, ra dau taubaletaka tale ga na veikau me vica na siga.”

iVakarau ni bula. E kaya o Peni, e dua na tagane vakawati: “E rawa ni yadra tu vakabogilevu o watiqu, qai dau yadra tale vakamataka ena lima, ia au dau vinakata meu moce me vitu se walu na aua, ke sega au na cudrucudru.”

iValavala. De o dau galugalu, ia e sega o watimu. E kaya e dua na tagane vakawati o Tevita: “Niu tubu cake tiko, dau tu lo ga vei au na noqu leqa, ia o watiqu e susu ena vuvale e sega ni va qori.”

 Rawa tale ga ni yaga na duidui. E kaya e dua na yalewa vakawati o Eleni: “Ena rairai donu tu na ka au dau vinakata, ia sega ni kena ibalebale me sa na donu tu ga.”

Dau veitokoni. E kaya e dua na tagane vakawati o Atama me baleti watina: “E sega ni dau taleitaka na qito o Keresi. Ia e dau tomani au ena so na qito, niu kaila mada ga ena gauna keirau sara qito tiko kina, e bau kaila tale tu ga o koya. E taleitaka na gade ina vanua era dau vakaraitaki kina na veimataqali droini. Au dau saga meu tomani koya, levu sara na gauna keirau vakayagataka vata ena vanua qori. Au dau saga meu kauai ena ka e taleitaka.”—iVakavuvuli vakaivolatabu: 1 Korinica 10:24.

Kua ni qiqo nomu rai. Ni duatani na rai nei watimu me baleta e dua na ka, e sega ni kena ibalebale ni cala. Qori na ka e raica e dua na tagane vakawati o Alex. “Au nanuma ni na yaga me muri ga e dua na sala, ia niu sa vakawati, au raica ni rawa ni muri e levu na sala me caka kina e dua na ka, e tiko yadua tale ga na kedra yaga.”—iVakavuvuli vakaivolatabu: 1 Pita 5:5.

Kua ni namaka vakasivia na ka. Ni tautauvata na ka drau taleitaka, sega ni kena ibalebale qori ni drau sa tautauvata ena ka kece. Mo kua ni kaya ni a cala nomu vakawati ena vuku ga ni so na duidui lalai e sa qai laurai. E kaya na ivola The Case Against Divorce: “Levu era qai vakaiulubaletaka, ‘Au mataboko ena levu ni noqu dodomo.’ Ia na veisiga drau marautaka vata, e vakaraitaka ni drau rawa ni veilomani, ke tiko mada ga eso na duidui.” Tovolea moni “dau yalorawarawa, . . . ke dua e didivaka e dua na ka vua e dua tale.”—Kolosa 3:13.

Tovolea mada qo: Vola na ka o taleitaka se o domona baleti watimu. Vola na ka drau taleitaka kei na kena drau duidui kina. De dua o na raica ni sega soti ni bibi na ka drau duidui kina. Ena yaga tale qori ena nomu dau raica na gauna mo vosoti koya kina se tokoni koya. E kaya e dua na tagane vakawati o Keni: “Au dau taleitaka nona veisau o watiqu me baleti au, au kila ni marau tale ga niu cakava qori vua. Kevaka mada ga au vakuai au ena dua na ka, ni marau o koya, au na marau tale ga.”—iVakavuvuli vakaivolatabu: Filipai 4:5.