O NANUMA ni na rawa ni uqeta na bula veiyaloni e vale na iVolatabu? Veidutaitaka mada na veika e tukuni ena iVolatabu kei na veika era kaya eso me baleta na kena yaga. Dikeva na kena o rawa ni muria mo kua kina ni coko ena veileti, mo uqeta ga na veiyaloni kei nomu taqomaka na bula vakaveiwekani.
IVAKAVUVULI VAKAIVOLATABU E UQETA NA VEIYALONI
ME DONU NOMU RAI BALETI IRA ESO TALE.
“Moni kua ni cakava e dua na ka ena veileti se yalo ni nanumi koya ga, ia moni yalomalumalumu ena nomuni okati ira na kena vo mera uasivi kemuni, ni oni sega ni kauaitaka ga na ka e baleti kemuni, ni kauaitaka tale ga na ka e baleti ira tale eso.”—Filipai 2:3, 4.
“Keirau dikeva ni dodonu me bibi sara o watimu vei ira na kena vo.”—C. P., sa 19 na yabaki nona bula vakawati.
VAKATUDALIGA, KUA NI QIQO NOMU RAI.
“Tukuna tiko ga vei ira . . . mera kua ni dau veiba, mera yalorawarawa ga, mera qai yalomalua vei ira kece na tamata.”—Taito 3:1, 2.
“Ena sega na veiba ke da sega ni vosa lesu vakaviavialevu vua na watida. E bibi meda kua ni vakalelewa, ia meda rogoca da qai doka nona rai ke da sega mada ga ni duavata kina.”—P. P., sa yabaki 20 nona bula vakawati.
GUMATUA ENA VOSOTA KEI NA YALOMALUA.
“Na vosota e rawai kina na komada, kei na yame malumu [“malua,” vakamacala e ra] e rawa ni musuka na sui.”—Vosa Vakaibalebale 25:15.
“Ena dau yaco ga na veileti, ia ena vakatau na kena itinitini ena ivakarau ni lomana e dua. Ena vinakati vakalevu na vosota, ni na wali kina na leqa.”—G. A., sa yabaki 27 na nona bula vakawati.
KUA NI VOSAVAKACACA SE VEIVAKAMAVOATAKI
“Moni biuta tani na ka kece qo: na yalokatakata, na cudrucudru, na ivakarau ca, na vosavakacaca, kei na vosa vakasisila mai gusumuni.”—Kolosa 3:8.
“Au dau qoroya na nona lewai koya matau o watiqu. E sega ni cudrucudru, e sega ni kailavaki au se rulaki au.”—B. D., dua na marama sa 20 na yabaki na nona bula vakawati.
GUTA NA VEIVOSOTI, WALIA TOTOLO NA DUIDUI E BASIKA.
“Moni dau yalorawarawa, ni dau veivosoti tale ga vakarawarawa ke dua e didivaka e dua na ka vua e dua tale.”—Kolosa 3:13.
“Dau dredre sara nida lomabibitaka eso na ka, eda na rawa kina ni cakava se kaya na ka e vakamosia na loma i watida. Na gauna va qori e dau uasivi kina noda veivosovosoti. Ena sega ni rawati na vakawati vinaka ke sega na itovo qori.”—A. B., sa yabaki 34 na nona bula vakawati.
DAU VAKUAI IKO MO SOLI KA, O WASEA TALE GA NA KA.
“Moni dau soli ka, ena qai soli vei kemuni. . . . Na ivakarau oni vakarautaka ena vakarautaki tale vei kemuni.”—Luke 6:38.
“E dau kila o watiqu na ka e vakamarautaki au, levu na gauna e dau vakasauri ga nona soli ka vei au. Au dau vakasamataka, ‘Meu na vakamarautaki koya mada vakacava?’ Na veika qori e dau vakavuna vakalevu neirau marau, me yacova mada ga na gauna qo.”—H. K., dua na marama sa 44 na yabaki nona bula vakawati.
SAGA TIKO GA NA BULA VEIYALONI E VALE
Mai na vica vata na milioni na vuvale e vuravura, qo e vica ga e vakatarogi ira na Yadra!, e yaga vei ira na iVolatabu nira rawa ni vakaitovotaka na ka era vulica me rawati kina na bula veiyaloni e vale.* Era raica ni se yaga tiko ga nodra saga na bula veiyaloni ena nodra vuvale ke ra duiyaloyalo mada ga eso na lewena, ni yalataka na iVolatabu: “O ira na uqeta na veiyaloni era marau.”—Vosa Vakaibalebale 12:20.
^ para. 24 Me ikuri ni vakamacala me baleta na sala e rawa ni marau kina na vuvale, raica na wase 14 ni ivola Na Cava Mada e Kaya na iVolatabu? tabaka na iVakadinadina i Jiova, sa tu tale ga ena www.pr418.com. Rai tale ga ena IVAKAVUVULI VAKAIVOLATABU > IVAKASALA INA VUVALE.
