1, 2. (a) Na cava e tukuna o Jisu ena ivakasala i Pita? (Raica na imatai ni iyaloyalo.) (b) Cava e sauma kina va qori o Jisu?

ERATOU sega ni vakabauta na tisaipeli i Jisu na ka eratou rogoca. E kaya o Jisu ni sa na vakarau vakararawataki me vakamatei, ia eratou namaka tiko na nona tisaipeli me vakalesuya tale na matanitu vei Isireli. E tukuna na yapositolo o Pita. “Me kua ni va qori nomuni rai Turaga, ena sega sara ni yaco qori vei kemuni.” E sauma o Jisu: “Lako tani i dakuqu, Setani! O iko na dau veivakatarabetaki, ni sega ni tiko vei iko na vakasama ni Kalou, na vakasama ga vakatamata.”—Maciu 16:21-23; Caka. 1:6.

² Na vosa i Jisu e vakamatatataka na duidui ni rai ni Kalou kei na rai ni vuravura i Setani. (1 Joni 5:19) Na vosa i Pita e uqeta na rai ni vuravura, ya me nanumi koya ga o Jisu. Ia e kila o Jisu ni duatani na rai i Tamana, ya ni vinakata me vakarautaki koya ena nona vakararawataki qai vakamatei. Na ka e tukuna vei Pita e vakaraitaka ni taleitaka na rai i Jiova, e cata na rai ni vuravura.

3. Na cava e ka ni sasaga kina meda cata na rai ni vuravura da qai vakatotomuria na rai i Jiova?

 ³ Vakacava o keda? Eda dau vakasamataka na rai ni Kalou se na rai ni vuravura? De dua eda sa veisautaka na noda itovo me salavata kei na ivakatagedegede ni Kalou. Ia vakacava na noda vakasama? Eda veisautaka me salavata kei na vakasama i Jiova? Meda cakava qori e vinakati na sasaga. Ena yasana adua, e rawarawa sara meda vakasamataka na rai ni vuravura. Na vuna? Nida bula sara tu ga ena vuravura e lewa o Setani. (Efeso 2:2) E uqeta tale ga meda nanumi keda ga, rawa gona nida temaki kina. Io e ka ni sasaga meda vakatotomuria na rai i Jiova, ia e rawarawa sara meda muria na rai ni vuravura.

4. (a) Na cava ena yaco ke moica o vuravura na noda rai? (b) Ena uqeti keda vakacava na ulutaga qo?

⁴ Ke moica o vuravura na noda rai, eda na nanumi keda ga da qai lewa ga na ka eda vinakata. (Mari. 7:21, 22) E bibi gona meda bucina na “vakasama ni Kalou,” sega ni ‘vakasama vakatamata.’ Na ulutaga qo ena uqeti keda meda cakava qori. Ena veivosakitaki kina na yaga ni noda vakatotomuria na rai i Jiova kei na vuna e sega ni dredre kina. E vakaraitaka tale ga na sala meda vorata kina na rai ni vuravura. Eda na veivosakitaka ena ulutaga tarava na sala me tiko kina vei keda na rai i Jiova ena so na ka da qai vakatotomuria na nona rai.

5. Na cava era sega ni vinakata kina eso me dua e lewai ira?

⁵ Era sega ni vinakata eso me dua e lewai ira. Era kaya: “Au lewa ga na ka au cakava.” De dua era vakaibalebaletaka nira dau vakatulewa ga vakataki ira ni nodra dodonu qori. Era sega ni vinakata mera lewai se vakasaurarataki mera tautauvata kei ira na kena vo. *

6. (a) Na galala cava e solia vei keda o Jiova? (b) Vakacava e tawavakaiyalayala na noda galala?

⁶ E dua na ka meda nanuma tiko, nida veisautaka noda rai me salavata kei na rai i Jiova, e sega ni kena ibalebale me kua ni rogoci na noda nanuma se rai. Me vaka e cavuti ena 2 Korinica 3:17, “na vanua e tiko kina na yalo i Jiova, e vakilai kina na galala.” E solia tu o Jiova na galala meda digia na ka eda taleitaka. Io, ni buli keda meda cakava qori. Ia e sega ni kena ibalebale ni tawavakaiyalayala na noda galala. (Wilika 1 Pita 2:16.) Nida vakatulewataka na ka e donu kei na ka e cala, e vinakata o Jiova me dusimaki keda na nona rai ena nona Vosa. Vakacava sa rui dredre, se tiko na kena yaga?

7, 8. Na cava e sega ni dredre kina meda vakatotomuria na rai i Jiova? Vakatauvatana.

⁷ Raica mada qo e dua na kena ivakaraitaki. Era saga na itubutubu mera tugana vei luvedra na itovo vinaka. De dua era vakavulici luvedra mera dau dina, gugumatua, mera dau veinanumi tale ga. Qo e sega ni dredre. Ia era vakarautaki luvedra mera gone vinaka nira sa qase mai. Nira sa tamatabula ra qai biubiu e vale, era na vakatulewa ga vakataki ira. Ke ra digia mera muria na itovo  era vakavulici kina, era na rairai sega ni veivutunitaka na nodra vakatulewa. Era na sega tale ga ni nuiqawaqawa se rarawa vakalevu.

⁸ Me vakataki rau na itubutubu qori, o Jiova e vinakata meda marautaka na bula. (Aisea 48:17, 18) Oya na vuna e vakarautaka kina na idusidusi me baleta na noda itovo kei na ivalavala vei ira eso tale. E vinakata gona meda bucina na ivakarau ni nona rai da qai muria na nona itovo. Qo ena vakavinakataka se vakarabailevutaka na noda rai, ena sega ni qiqo. (Same 92:5; Vkai. 2:1-5; Aisea 55:9) Eda na marautaka kina na ka eda vakatulewataka. (Same 1:2, 3) Io, e yaga dina nida vakatotomuria na rai i Jiova!

9, 10. E cecere vakacava na rai i Jiova mai na rai ni vuravura?

⁹ Dua tale na vuna eda vinakata kina meda vakatotomuria na rai ni Kalou oya ni cecere na nona rai mai na rai ni vuravura. E vakarautaka o vuravura na ivakasala me baleta na itovo, marau ni vuvale, cakacaka vinaka, kei na so tale. Levu na ivakasala qori e veicalati kei na vakanananu se rai i Jiova. Kena ivakaraitaki, e uqeta o vuravura meda vakaliuca ga na ka me baleti keda kei na veiyacovi tawadodonu. Ena so na gauna, ena uqeta tale ga na veibiu se veisere ena yavu ga e rawa mera marau kina. Na ivakasala qori e veisaqasaqa kei na iVolatabu. Vakacava se yaga tiko ga nikua na ivakasala ni vuravura ni vakatauvatani kei na iVolatabu?

¹⁰ E kaya o Jisu: “Ena kilai na vuku ena ka e cakava.” (Maciu 11:19) Sa toso sara o vuravura ena levu ni iyaya vovou e bulia ia e sega ga ni walia rawa na leqa lelevu e vakavu rarawa me vaka na ivalu, veivakaduiduitaki, kei na basulawa. E ca sara ni vakawalena na itovo vinaka! Era vakadinata e levu ni sega ni vakaotia na leqa, e ikuri ga ni leqa me vaka na leqa ni vuvale, tauvimate, kei na levu tale. Ia o ira na lotu vaKarisito era muria na rai ni Kalou era marautaka nodra bula vakavuvale, bulabula vinaka, era veiyaloni tale ga kei na tacidra e veiyasa i vuravura. (Aisea 2:4; Caka. 10:34, 35; 1 Kor. 6:9-11) E vakaraitaka qori ni cecere ga na rai i Jiova mai na rai ni vuravura.

11. Na rai i cei e dusimaki Mosese, cava na kena yaga?

¹¹ Era vakadinata na dausokalou dina ena gauna vakaivolatabu ni cecere na rai i Jiova. Kena ivakaraitaki o Mosese, e vakavulici ena “nodra vuku kece na kai Ijipita,” ia e nuitaka na Kalou me rawata kina na “lomavuku.” (Caka. 7:22; Same 90:12) E masuti Jiova tale ga: “Vakatakila vei au na nomuni ivalavala.” (Lako 33:13) Ni dusimaki Mosese na rai i Jiova, e vakaitavi kina ena vakayacori ni loma ni Kalou, e cavuti tale ga ena iVolatabu ni vakasakiti na nona vakabauta.—Iper. 11:24-27.

12. E yavutaka ena cava na yapositolo o Paula na nona vakatulewa?

¹² E turaga vuku na yapositolo o Paula, e vuli vinaka, e kila tale ga e rua na vosa. (Caka. 5:34; 21:37, 39; 22:2, 3) Ia ni vakatulewa, e cata na vuku vakavuravura. E yavutaka na nona vakatulewa ena iVolatabu. (Wilika Cakacaka 17:2; 1 Korinica 2:6, 7, 13.) E vuavuaivinaka kina na nona cakacaka vakaitalatala, e vakanamata  tale ga ena icovi e tawamudu.—2 Tim. 4:8.

13. O cei e nona itavi me veisautaka noda rai me salavata kei na rai i Jiova?

¹³ E cecere dina na rai ni Kalou mai na rai ni vuravura nikua. Nida muria na nona ivakatagedegede, ena rawa vinaka na noda sasaga, eda na marau tale ga vakalevu. Ia e sega ni vakasaurarataki keda o Jiova meda vakatotomuria na nona rai. Na “dauveiqaravi yalodina e vuku” e sega ni lewa na noda rai yadua, era sega tale ga ni cakava qori na qase ni ivavakoso. (Maciu 24:45; 2 Kor. 1:24) Ia e noda itavi yadua meda veisautaka na noda rai me salavata kei na rai ni Kalou. Eda na cakava vakacava?

14, 15. (a) Na cava meda vakasamataka kina vakatitobu na rai i Jiova? (b) Me salavata kei na Roma 12:2, na cava meda kua kina ni vakasamataka na rai ni vuravura? Vakatauvatana.

¹⁴ Eda vakasalataki ena Roma 12:2: “Ni kua ni muria na ivakarau ni veika vakavuravura qo, me veisautaki na nomuni itovo ni vakavoui na nomuni vakasama, moni vakadinata kina ni vinaka, e yaga, qai uasivi na loma ni Kalou.” E laurai ena tikinivolatabu qo, ni rawa nida veisautaka noda rai me salavata kei na rai ni Kalou, se mani cava e lewa tu na noda rai ni bera nida vulica na ka dina. Eso na gauna e lewa na noda rai na noda isususu kei na ka eda sotava. Ia e dau veisau tu ga na noda rai. Vakalevu ga me veisau ni vakatau ena ka eda dau vakasamataka se vakananuma. Nida vakasamataka vakatitobu na rai i Jiova, eda na vakadinata ni dodonu tu ga na nona rai. Qori ena uqeti keda meda veisautaka noda rai me salavata kei na nona.

¹⁵ Me vakavoui na noda vakasama me salavata kei na rai i Jiova, e bibi meda “kua ni muria na ivakarau ni veika vakavuravura qo.” Kena ibalebale meda kua ni sarava, wilika se rogoca na ka ena veisaqasaqa kei na rai ni Kalou. Meda kila na kena bibi, vakasamataka mada na kakana. Ke dua e via bulabula vinaka, ena kania ga na kakana bulabula. Ena maumau wale ga na nona sasaga ke dau kania vakawasoma na kakana e ca. Ena sega tale ga ni yaga noda vulica na rai i Jiova ke da dau vakasamataka na rai ni vuravura.

16. Na cava meda qarauna?

¹⁶ Vakacava eda rawa ni taqomaki keda mai na rai se vakasama kece vakavuravura? Sega, nida se tiko e vuravura. Eda sega ni drovaka rawa eso na rai ni vuravura. (1 Kor. 5:9, 10) Ena cakacaka mada ga vakavunau eda na rogoca kina eso na rai cala kei na ivakavuvuli lasu. Nida sega ni drovaka rawa na rai tawavakalou qori, e bibi meda kua ni vakasamataka se vakabauta. Me vakataki Jisu, e dodonu meda cata na rai e tokona na inaki i Setani. Kena ikuri, eda na rawa ni qarauna na rai ni vuravura.—Wilika Vosa Vakaibalebale 4:23.

17. Eda na qarauna vakacava na rai ni vuravura?

¹⁷ Kena ivakaraitaki, meda qarauna na noda ilala. E veivakasalataki na iVolatabu ke da vakailala tiko kei ira na sega ni qaravi Jiova, eda na vakatotomuria na nodra rai. (Vkai. 13:20; 1 Kor. 15:12, 32, 33)  Meda digia vinaka tale ga na ka ni veivakamarautaki. Nida cata na ka ni veivakamarautaki e uqeta na bula vakaidewadewa, itovo voravora, se veiyacovi tawadodonu, eda taqomaka na noda vakasama me kua ni vagagai ena rai e “sabaya na vuku ni Kalou.”—2 Kor. 10:5.

18, 19. (a) Na cava meda qarauna kina na rai ni vuravura e biu mai vaqaseqase? (b) Cava meda taroga, na vuna?

¹⁸ Ena vinaka meda kila da qai cata na rai ni vuravura e biu mai vaqaseqase. Kena ivakaraitaki, de dua eda rogoca na itukutuku kaburaki e tokona eso na rai vakapolitiki. Eso tale na itukutuku e uqeta na isausau kei na rawaka vakavuravura. Eso na iyaloyalo kei na ivola e uqeta meda vakaliuci keda ga kei na noda vuvale, e nanumi kina ni donu, veirawai, se dina. Na rai qori e vakawaleni kina na rai ni iVolatabu, ya nida na marau kei ira na lewe ni noda vuvale ni liu noda lomani Jiova. (Maciu 22:36-39) Eso tale ga na nodra ivola ni italanoa na gone, e rawa ni rawai ira vaqaseqase mera vakayacora na ivalavala dukadukali.

¹⁹ Sega ni kena ibalebale qo meda kua ni marautaka na ka ni veivakamarautaki e kilikili. E vinaka meda taroga: ‘Vakacava eda dau kila na rai ni vuravura ni vakaraitaki mada ga mai vaqaseqase? Eda yalana na porokaramu mera sarava na gone se ivola mera wilika, wili kina o keda? Eda dau vukei ira na luveda me tiko vei ira na rai i Jiova mera kua kina ni rawai ena rai ni vuravura?’ Nida kila na duidui ni rai ni Kalou kei na rai ni vuravura, eda na sega ni “muria na ivakarau ni veika vakavuravura qo.”

20. Ena kilai vakacava nida muria tiko na rai ni Kalou se vuravura?

²⁰ Meda nanuma ni rua ga na ivurevure ni itukutuku, o Jiova kei na vuravura i Setani. O cei eda muria tiko? Ena vakatau ena itukutuku eda digia. Ke da vakabauta na rai ni vuravura, qori ena moica noda vakasama, ena uqeti keda ena rai kei na itovo vakayago. Oya na vuna e bibi kina meda qarauna na ka eda sarava, wilika, rogoca kei na ka eda vakasamataka.

21. Na cava ena veivosakitaki ena ulutaga tarava?

²¹ Me vaka sa cavuti oti, me tiko vei keda na rai i Jiova, e bibi meda kua ni vakasamataka na rai ena vakaleqai keda. E vinakati tale ga meda dau vakasamataka vakatitobu na rai ni Kalou da qai vakatotomuria. Ena veivosakitaki ena ulutaga tarava na sala meda cakava kina qori.