Ena 2 Korinica 12:2, 3, e vakamacalataka o Paula e dua na tagane e “kau vakasauri ina ikatolu ni lomalagi.” O cei na tagane qori? Ni volavola o Paula ina ivavakoso e Korinica, e vakamatatataka ni Kalou e vakayagataki koya tiko me yapositolo. (2 Kor. 11:5, 23) E vakamacalataka tale ga “na raivotu kei na veika e vakatakila mai na Turaga.” E sega ni cavuti ira na vo ni tacina lotu vaKarisito ena tikinivolatabu qo. Koya gona, o Paula e tukuni koya tiko ga ni raica na raivotu kei na veika e vakatakilai mai.—2 Kor. 12:1, 5.

O Paula sara ga a “kau vakasauri ina ikatolu ni lomalagi,” e “kau” tale ga “vakasauri i parataisi.” (2 Kor. 12:2-4) Ni tukuna o Paula “vakatakila,” e dusia tiko na ka ena yaco ena gauna se bera mai.

Na cava e raica o Paula ena “ikatolu ni lomalagi”?

Ena iVolatabu, na vosa “lomalagi” e rawa ni dusia na lomalagi dina. (Vkte. 11:4; 27:28; Maciu 6:26) E dau vakaibalebaletaki tale ga na “lomalagi” ena so tale na ka. E rawa ni dusia na veiliutaki vakatamata. (Tani. 4:20-22) Se veiliutaki vakalou, me vaka na Matanitu ni Kalou.—Vkta. 21:1.

E raica o Paula “na ikatolu ni lomalagi.” Na cava e kena ibalebale? Na ka e cavuti vakatolu ena iVolatabu e dusia ni vakabibitaki tiko. (Aisea 6:3; Isik. 21:27; Vkta. 4:8) Ni tukuna gona o Paula “na ikatolu ni lomalagi,” e kena irairai ni vakabibitaka tiko e dua na matanitu e totoka vakaoti na kena veiliutaki, e cecere—oya na Matanitu vakaMesaia ena veiliutaki kina o Jisu Karisito kei ira na le 144,000. (Raica na Insight on the Scriptures, Vol. 1, t. 1059, 1062.) Me vaka ga e vola na yapositolo o Pita, eda waraka tiko na “lomalagi vou” e yalataka na Kalou.—2 Pita 3:13.

Na cava na ibalebale ni “parataisi” e cavuta o Paula?

E rawa ni vica na ibalebale ni vosa “parataisi”: (1) Ni vakasamataki na inaki ni Kalou me baleta noda itikotiko na kawatamata, na vosa “parataisi” e rawa ni dusia na Parataisi sa voleka. (2) E rawa ni dusia na bula veiyaloni era na marautaka na tamata ni Kalou ena vuravura vou. (3) E rawa ni dusia tale ga na ituvaki marautaki e lomalagi, oya na “parataisi ni Kalou” e cavuti ena Vakatakila 2:7.—Raica Na Vale ni Vakatawa, Julai 15, 2015, t. 8. para. 8.

E rawa ni vakaibalebaletaka tiko o Paula na tolu na tikina qori ni vakamacalataka na ka e raica ena 2 Korinica 12:4.

Meda taleva:

Na “ikatolu ni lomalagi” e cavuti ena 2 Korinica 12:2 e rairai dusia na Matanitu vakaMesaia ena veiliutaki kina o Jisu Karisito kei ira na le 144,000, oya na “lomalagi vou.”—2 Pita 3:13.

E “ikatolu ni lomalagi” ni totoka vakaoti na veiliutaki ni Matanitu qori, e cecere tale ga.

Na “parataisi” e “kau vakasauri” kina o Paula ena raivotu, e rairai dusia na (1) Parataisi e vuravura sa voleka, (2) na parataisi vakayalo ena gauna qori. Ena rabailevu sara mai na parataisi vakayalo ena gauna qo, kei na (3) “parataisi ni Kalou” e lomalagi, ena vakilai qori donuya na vuravura vou.

Koya gona, na vuravura vou e okati ruarua kina na lomalagi vou kei na vuravura vou. Qo e dua na ituvatuva vou, e okati kina na veiliutaki ni Matanitu ni Kalou kei na kawatamata e qaravi Jiova ena parataisi e vuravura.