Au sucu ena 1983. Totoka na bula niu tubucake tiko, ia e veisau niu sa yabaki 10, e tekivu mosi kaukaua na yagoqu taucoko. Oti tale e rua na yabaki, niu qai yadra ena dua na mataka au sa sega ni qai yavala rawa. Niu saga mada ga meu yavalata na yavaqu sa sega ni rawa. Me yacova mai nikua, au sa sega tu ni rawa ni lako. Na kequ mate tale ga e vakavuna meu sega ni tubu rawa kina. Au se vaka voli ga na gonelailai.

Ni oti e vica na vula noqu sa tu ga e vale, rau veisiko yani e rua na marama erau iVakadinadina i Jiova. Au dau vuni nira gole yani na vulagi, ia au vakarorogo vei rau ena siga qo. Ni rau vakamacalataka na Parataisi, au nanuma lesu sara na ka au dau rogoca niu se qai yabaki lima. Ena gauna ya, e tiko e Suriname e dua na daukaulotu na yacana o Jethro, e dau mai vakavulici tamaqu tiko ena iVolatabu, vakadua ena veivula. E dau lomani au o Jethro, au taleitaki koya kina. Rau dau kauti au tale ga o bubu kei tutu ina nodra soqoni na iVakadinadina i Jiova, e dau vakayacori sara ga ena neitou koro. Ni tarogi au gona o Florence e dua vei rau na marama a veisiko yani, keu via kila eso tale na ka, au mani vakadonuya.

E veisiko lesu yani o Florence kei watina o Justus, rau qai tekivu vakavulici au ena iVolatabu. Ni rau kidava niu sega ni kila tiko na wilivola, rau mani vakavulici au kina. Ni toso na gauna au sa rawa ni wilivola ga vakataki au. Ia dua na siga rau kaya ni rau sa na lesu tiko i Suriname. Au rarawa ni sega ni tiko tale e dua e Orealla me tomana noqu vuli iVolatabu. Ia au marau ni sega ni guilecavi au o Jiova.

Sega ni dede sa yaco tale yani e Orealla e dua na painia o Floyd, keirau sota ni vunau tiko mai e veivale. Ni vakamacalataka na vuli iVolatabu, au dredre sara. E mani taroga, “Na cava o dredre kina?” Au kaya sara vua niu sa vuli oti ena brochure Na Cava e Loma ni Kalou Vei Keda?, au sa tekivu vuli tale tiko ena ivola Na Ka Mo Kila Mo Bula Tawamudu Kina. * Au tukuna vua ni sa cegu tu na vuli, keirau mani vakaotia na ivola qori. Ia e qai lesi ena dua tale na vanua, mai cegu tale tu yani na noqu vuli.

 Ena 2004, rau lesi yani e Orealla o Granville kei Joshua, rau painia lavotaki. Keitou sota ni rau vunau tiko ena veivale. Ni rau taroga keu via vuli, au matadredredre. Au kerea me keitou tekivu vuli tale ena ivola Ka Mo Kila. Au via kila ga se na tautauvata na ka erau vakavulica kei na noqu qasenivuli sa oti. E kaya vei au o Granville ni vakayacori tiko na soqoni ena koro. Sa rauta ni tini na yabaki noqu sega tu ni biuta noqu vale, dua na ka noqu via tiko kina. E mani vakavodoki au o Granville ena dua na qiqi meu kau ena Vale ni Soqoni.

Toso na gauna e uqeti au o Granville meu vakaitavi ena Koronivuli ni Vuli Vunau. E kaya: “O lokiloki ia o sega ni galu. Dua na siga ena nomu itavi na ivunau soqovi levu. Ena yaco dina qori.” Au nuidei sara ga ena nona veiuqeti.

Keirau tekivu cakacaka vakavunau vata kei Granville, ia e sega ni vinaka eso na gaunisala ena noqu qiqi. Au mani kerei Granville meu sa vodo ga ena dua na bara me qai biligi au tiko. E vinaka sara qori. Au papitaiso ena Epereli 2005. Sega ni dede era vakavulici au na tacida ena ivavakoso meu qarava na ivola kei na misini ni gusunivosa ena Vale ni Soqoni.

Ka ni rarawa ni mate o tamaqu ena 2007 ena dua na vakacalaka e waqa. Keitou sega sara ga ni namaka vakavuvale. E masu vata kei keitou o Granville qai wilika eso na tikinivolatabu veivakacegui. Ni oti e rua na yabaki, e mate tale ga vakacalaka e waqa o Granville.

Era lolosi na lewe ni neitou ivavakoso lailai, sa sega ni dua na qase ni ivavakoso, e dua ga na dauveiqaravi. E bau mosimosi dina na takali nei Granville, e dua dina na itokani vinaka. E dau vukei au meu qarava noqu bula vakayalo, vakayago tale ga. Ni oti ga nona takali, au lesi ena soqoni e tarava meu wiliwili ena vulici ni Vale ni Vakatawa. Au wilika rawa ga na imatai ni rua na parakaravu, oti qori au sa luluvu sara ga, sega ni tarovi rawa na drodro ni wainimataqu. Au mani biubiu mai na buturara.

Au sa qai nuidei tale nira mai veivuke e Orealla na tacida mai na dua tale na ivavakoso. E lesia tale ga na valenivolavola ni tabana e dua na painia lavotaki o Kojo. E vakamarautaki au tale ga ni rau tekivu vuli iVolatabu o tinaqu kei taciqu, oti erau papitaiso sara. Ena Maji 2015, au lesi kina meu dauveiqaravi ni ivavakoso. Ni oti toka e dua na gauna, au qai lesi ena itavi ni vunau soqovi levu. Ena siga qori, au dredre qai luluvu niu vakasamataka lesu na ka e tukuna vei au o Granville ena vica na yabaki yani e liu: “Dua na siga ena nomu itavi na vunau soqovi levu. Ena yaco dina qori.”

Au vulica ena porokaramu ni JW Broadcasting^® eso na irogo me baleti ira na tacida e tautauvata na keimami ituvaki. E vakaleqai tale ga na yagodra, ia era gugumatua ra qai mamarau. O yau mada ga, au se rawa ni cakava tiko eso na ka. Na noqu vinakata meu qaravi Jiova ena noqu vinaka taucoko, e uqeti au meu painia tudei. Au sega ni namaka e dua na itukutuku ena Seviteba 2019! Na vula qori, e tukuni kina vei au niu sa lesi meu qase ena ivavakoso e le 40 na kena dautukutuku.

Dua na ka noqu vakavinavinakataki ira na tacida era vakavulici au ena iVolatabu, ra vukei au tale ga ena cakacaka vakaitalatala. Ia au vakavinavinaka sara vakalevu vei Jiova ni sega ni guilecavi au.