1. Eda kila vakacava ni cakacaka ni veivakabulai na veivakatisaipelitaki?

NA VEIVAKATISAIPELITAKI e cakacaka ni veivakabulai! Eda kila vakacava? E vakarota o Jisu ena Maciu 28:19, 20: “Ni lako moni vakavulici ira . . . mera tisaipeli . . . , ni papitaisotaki ira.” Na cava e bibi kina na papitaiso? Eda na rawa ga ni vakabulai se bula tawamudu nida papitaiso. E bibi vua e vinakata me papitaiso me vakabauta ni noda vakabulai e rawati ga ena nona mate vakaisoro o Jisu kei na nona vakaturi. Sa rauta me tukuna na yapositolo o Pita vei ira na tacina lotu vaKarisito: “Ena vakabulai kemuni na papitaiso . . . e rawati ga ena nona vakaturi o Jisu Karisito.” (1 Pita 3:21) Ni papitaiso gona e dua na tisaipeli vou, e sa tekivu muria na sala ina bula tawamudu.

2. Na cava e kaya na 2 Timoci 4:1, 2 me baleta na ivakarau ni noda veivakavulici?

² Me rawa nida vukea eso tale mera tisaipeli, ena vinakati meda ‘maqosa ena veivakavulici.’ (Wilika 2 Timoci 4:1, 2.) Na vuna? E vakarota o Jisu: “Ni lako moni vakavulici ira . . . , mera tisaipeli.” E kaya na yapositolo o Paula meda tudei ena cakacaka qori, nida cakava qo eda na vakabulai kei ira na rogoci keda. Qori na vuna e kaya kina o Paula: ‘Qarauna vinaka nomu veivakavulici.’ (1 Tim. 4:16) Eda rawa ga ni veivakatisaipelitaki nida veivakavulici. E bibi gona meda maqosa ena noda veivakavulici.

3. Na cava eda na vulica ena ulutaga qo me baleta noda caka vuli iVolatabu?

³ Eda sa vakavulici ira tiko e vica vata na milioni ena ka dina ena iVolatabu. Ia me vaka eda vulica ena ulutaga sa oti,  eda via kila na sala meda vukei ira kina mera papitaiso mera tisaipeli i Jisu Karisito. Eda na veivosakitaka ena ulutaga qo e lima tale na ka mera cakava na qasenivuli mera vukea nodra gonevuli mera toso mera papitaiso sara.

4. Na cava e bibi kina vua na qasenivuli me lewai koya vinaka ni caka vuli tiko? (Raica tale ga na ivakamacala e ra.)

⁴ Eda taleitaka na ka eda vakavulica mai na Vosa ni Kalou. Eda na rairai temaki gona meda talimagimagi ena ka eda vakamacalataka. Ia e sega ni dodonu meda vosa vakalevu ke da liutaka na vuli ni Vale ni Vakatawa, Vuli iVolatabu ni iVavakoso, se nida caka Vuli iVolatabu. Me rawa ni veivakavulici ga na iVolatabu e vinakati vua na qasenivuli me lewai koya vinaka. Me kua ni saga me vakamacalataka na ka kece e kila me baleta e dua na tikinivolatabu se ulutaga. * (Joni 16:12) Vakatauvatana mada na ka o kila me baleta na iVolatabu ena gauna o se qai papitaiso kina kei na gauna qo. E macala ni gauna ya o se qai kila ga na ivakavuvuli rawarawa. (Iper. 6:1) E taura e vica vata na yabaki mo rawata na veika o sa mai kila tu nikua. Mo kua gona ni saga mo vakavulica kece qori vua na nomu gonevuli ena dua ga na gauna.

5. (a) Me vaka e tukuni ena 1 Cesalonaika 2:13, na cava eda vinakata me kila o gonevuli ena ka e vulica tiko? (b) Eda na uqeti gonevuli vakacava me vakamacalataka na ka e vulica?

⁵ Eda vinakata me kila o gonevuli ni ka e vulica e yavutaki ena Vosa ni Kalou na iVolatabu. (Wilika 1 Cesalonaika 2:13.) Eda na cakava vakacava qori? Uqeti nomu gonevuli me vakamacalataka na ka e vulica tiko. Kua ni vakamatauna mo vakamacalataka tiko ga na ibalebale ni tikinivolatabu. Kerei koya me dau vakamacalataka tale ga. Vukei koya me kila na yaga ni vosa ni Kalou ena nona bula. Tarogi koya ena taro ena uqeti koya me vakamacalataka nona rai me baleta na tikinivolatabu e wilika. (Luke 10:25-28) Kena ivakaraitaki, mo taroga: “Na itovo cava i Jiova o raica ena tikinivolatabu qo?” “Ena yaga vakacava vei iko na ka dina o vulica?” (Vkai. 20:5) E yaga nona vulica na iVolatabu na gonevuli, ia e bibi sara me taleitaka qai muria na ka e vulica.

6. Ena yaga vakacava ni tomani keda e dua na tacida matua nida lai caka vuli iVolatabu?

⁶ Ni o lai caka vuli iVolatabu, o dau  kerea e dua na dautukutuku matua me tomani iko? Ni drau veitomani, taroga na ka e dikeva ena ivakarau ni nomu veivakavulici, ke o sa vakayagataka vinaka tale tiko ga na iVolatabu ena nomu veivakavulici. E bibi na yalomalumalumu ke o vinakata mo vakavinakataka nomu ivakarau ni veivakavulici. (Vakatauvatana Cakacaka 18:24-26.) Mo taroga tale ga ke nanuma ni sa matata tiko vei gonevuli na ka dina e vulica. O rawa ni kerea na tacida qori me tomana tiko na vuli ke o mani gole ena dua na vanua me macawa dua se sivia. Na vuna? Ena tomani tiko ga kina na vuli, ena raica tale ga vakabibi o gonevuli. Kua vakadua ni nanuma ni “nomu” vuli iVolatabu duadua qori, ni sega ni rawa ni dua tale me vakavulici koya. O na vinakata me toso vinaka vakayalo, me tomani tiko ga nona vulica na ka dina.

7. Ena rawa ni taleitaka vakacava o gonevuli na ka e vulica?

⁷ Me raica o gonevuli ni bulabula nomu veivakavulici, e dei tale ga nomu vakabauta na ka dina ena iVolatabu. (1 Ces. 1:5) Qori ena rawa ni uqeti koya me taleitaka na ka e vulica. Ke veiganiti, tukuna vua na yaga ni nomu muria na ivakavuvuli vakaivolatabu. Ena qai matata vua ni tu ena iVolatabu na ivakavuvuli yaga.

8. Na cava tale o rawa ni cakava mo vukea nomu gonevuli? Na vuna?

⁸ Ni caka tiko na vuli, talanoataka vei gonevuli na irogo me baleta eso na tacida era vosota rawa na veika dredre e sotava tiko. Ena rairai tiko ena nomudou ivavakoso e dua na tacida, ena yaga nona ivakaraitaki vua nomu gonevuli. Vakacava mo sureti koya me tomani iko ena caka vuli iVolatabu. Se mo wasea vua na gonevuli eso na irogo veiuqeti ena jw.org ena ulutaga “E Veisautaka na Bula na iVolatabu.” * Na italanoa kei na vidio ena ulutaga qori, ena vukei nomu gonevuli me raica na yaga ni nona muria na ivakavuvuli vakaivolatabu.

9. O na uqeti gonevuli vakacava me wasea na ka e vulica vei ratou na nona vuvale kei na itokani?

⁹ Ke vakawati o nomu gonevuli, vakacava sa vuli tale tiko ga o watina? Ke sega, sureti koya me dabe tale ga ena vuli. Uqeti nomu gonevuli me wasea na ka e vulica  vei ira nona lewenivuvale kei na nona itokani. (Joni 1:40-45) Ena sala cava? O rawa ni taroga: “O na vakamacalataka vakacava na ka dina qo vei ratou nomu vuvale?” se “Na tikinivolatabu cava o rawa ni vakayagataka mo vakadeitaka vua nomu itokani na ka dina qo?” Ni o cakava qori, o sa vukei nomu gonevuli tiko me dua na qasenivuli. Ke sa rawata na kena ivakatagedegede, sa na rawa ni tomani ira na lewe ni ivavakoso ena vunau me dautukutuku bera ni papitaiso. O rawa ni taroga ke kila e dua tale ena vinakata me vulica na iVolatabu. Saga sara mo veitaratara totolo qai sureti koya me vuli. Vakaraitaka vua na vidio Na Cava e Caka ena Vuli iVolatabu? *

10. Me vaka e tukuni ena 1 Cesalonaika 2:7, 8, eda na vakatotomuri Paula vakacava nida qasenivuli?

¹⁰ E bibi vei ira na qasenivuli mera vakaraitaka nira kauaitaka dina nodra gonevuli. Mo nuitaka nira na mai tacida ena dua na gauna. (Wilika 1 Cesalonaika 2:7, 8.) E sega ni rawarawa vei ira noda gonevuli mera biuta nodra itokani e vuravura ra qai veisau mera qaravi Jiova. Meda vukei ira mera raica na itokani dina ena ivavakoso. Ena kila vakacava o gonevuli ni o nona itokani? Mo drau veimaliwai ena so tale na gauna, kua ni gauna ga ni vuli. Dau qiriti koya, vakau itukutuku, se gade vua ni bera nomudrau vuli tarava. Ena kila kina ni o kauaitaki koya dina.

11. Na cava eda vinakata mera vakila noda gonevuli? Na vuna?

¹¹ E tuku ni ena dua na ivosavosa: “Era vakaitavi kece na lewenikoro ena nona tuberi e dua na gone.” Eda rawa tale ga ni kaya: “Era vakaitavi kece na lewe ni ivavakoso ena nona vukei e dua me tisaipeli.” Qori na vuna ena saga kina na qasenivuli matua me veikilai na nona gonevuli kei ira na lewe ni ivavakoso. Era na uqeti koya me veivolekati kei Jiova. Era na marautaka na gonevuli nodra veimaliwai kei ira na tamata ni Kalou, era na vakaukauataki vakayalo, vakayaloqaqataki tale ga. Eda vinakata mera vakila na gonevuli yadua nira taleitaki ena ivavakoso, nira lewe ni noda vuvale vakayalo. Me uqeti koya tale ga noda veilomani vakamataveitacini. Ena yaga vakacava? Ena rawarawa vua me tagutuva nona veimaliwai kei ira na sega ni vukei koya me lomani Jiova. (Vkai. 13:20) Ke ra mani cati koya na nona itokani makawa, ena nuidei nira tiko ena  isoqosoqo i Jiova na itokani dina.—Mari. 10:29, 30; 1 Pita 4:4.

12. Na cava meda veivosakitaka kina kei na noda gonevuli na yalayala kei na papitaiso?

¹² Mo dau vakamacalataka vua nomu gonevuli na yalayala kei na papitaiso. Na inaki ni noda caka vuli iVolatabu meda vukea noda gonevuli me papitaiso me dua na tisaipeli. Ni oti e vica na vula nona vulica wasoma na iVolatabu kei na nona dau tiko ena soqoni, sa dodonu me kila o gonevuli ni inaki ni nona vuli me qaravi Jiova me nona iVakadinadina.

13. Na ikalawa cava me muria na gonevuli me lai papitaiso sara?

¹³ E tiko e vica na ikalawa me muria na gonevuli e via papitaiso! Kena imatai me kilai Jiova, lomani koya, vakabauti koya tale ga. (Joni 3:16; 17:3) Ena veiwekani voleka kina kei Jiova, veivolekati tale ga kei ira na lewe ni ivavakoso. (Iper. 10:24, 25; Jeme. 4:8) Ena biuta na ivakarau e cata o Jiova, ena veivutunitaka nona ivalavala ca. (Caka. 3:19) Ena uqeti koya tale ga nona vakabauta me wasea na ka e vulica. (2 Kor. 4:13) Ena yalataki koya sara vei Jiova qai vakaraitaka ena nona papitaiso. (1 Pita 3:21; 4:2) Qori e dua dina na gauna marautaki vei keda kece! Ni toso tiko o gonevuli me rawata na ikalawa yadua, vakacaucautaki koya qai uqeti koya me dei tiko ga na nona toso.

14. Ena dikeva vakacava o qasenivuli nona toso o gonevuli?

¹⁴ E bibi na vosovoso nida vukea noda gonevuli me toso tiko ga me lai yalataki koya qai papitaiso sara. Ia ena vinakati tale ga meda kila ke lomana dina me qaravi Jiova. Vakacava o raica ni saga tiko me muria na ivakaro i Jisu? Se vinakata ga me vulica na ka e kaya na iVolatabu?

15. Ena kila vakacava o qasenivuli ni sa rawa ni papitaiso o nona gonevuli?

¹⁵ Mo dau dikeva wasoma nona toso o gonevuli. Kena ivakaraitaki, vakacava e dau tukuna nona rai me baleti Jiova? E dau masu vei Jiova? (Same 116:1, 2) E taleitaka na wili iVolatabu? (Same 119:97) E tiko wasoma ena soqoni? (Same 22:22) Sa cakava na veiveisau ena nona bula? (Same 119:112) Sa wasea tiko na ka e vulica vei ratou nona vuvale kei na nona  itokani? (Same 9:1) Koya e bibi sara, vakacava e vinakata me iVakadinadina i Jiova? (Same 40:8) Ke sega ni laurai vua nomu gonevuli e dua na ivakatakilakila qori, saga mo kila na vuna, drau qai veivosakitaka. Mo vosa vakayalovinaka, vosa tale ga vakadodonu. *

16. O na kila vakacava ke vinakati mo tinia e dua na vuli iVolatabu?

¹⁶ Mo taroga ena so na gauna ke veiganiti me tomani tiko ga na vuli. ‘Vakacava e sega ni dau vakavakarau o gonevuli? E sega ni via tiko ena soqoni? E tomana tiko ga nona itovo ca? E se lewena tiko ga na lotu lasu?’ Ke dina qori, nomu tomana tiko ga na vuli, ena vaka ga nomu saga tiko mo vakavulica e dua me qalo ia e sega ni vinakata me suasua na yagona! Ke sega ni mareqeta o gonevuli na ka e vulica, e sega tale ga ni via cakava na veisau, ena vakaibalebale me tomani tiko ga na vuli?

17. Me vaka e tukuni ena 1 Timoci 4:16, na cava mera cakava na qasenivuli?

¹⁷ Eda raica vakabibi noda itavi ni veivakatisaipelitaki, eda vinakata tale ga mera toso noda vuli iVolatabu mera lai papitaiso sara. Meda vakadeitaka gona me veivakavulici ga na iVolatabu, me bulabula noda ivakamacala, meda vosa tale ga ena nuidei. Eda na uqeti noda gonevuli me veitokani ena ivavakoso. Eda na vakabibitaka vua na isausau me yalayala qai papitaiso. Eda na dikeva wasoma tale ga na nona toso. (Raica na kato “ Ka me Cakava o Qasenivuli me Vukea Nona Gonevuli me Papitaiso.”) Eda marau nida vakaitavi ena cakacaka ni veivakabulai qo! Meda vakadeitaka mada ga meda solia noda vinaka kece, meda vukei ira na vuli iVolatabu mera toso, mera papitaiso sara.