1. Na gauna cava ena rairai dredre kina mo qaravi Jiova?

NA GAUNA cava ena rairai dredre kina mo qaravi Jiova? Ni vinaka tu na bula se ca? Nida sotava na veika dredre, e dau totolo ga noda nuitaki Jiova. Ia vakacava ni vinaka tu na ituvaki? Eda dau vakawelewele ena noda qaravi Jiova? Qori sara ga na ka e vakasalataki ira kina na Isireli o Jiova ni rawa ni yaco.—Vkru. 6:10-12.

2. E ivakaraitaki vinaka vakacava o Tui Esa?

² E yalomatua o Tui Esa ni nuitaki Jiova vakatabakidua. E qaravi Jiova ena gauna dredre kei na gauna e vakilai tu kina na vakacegu. “E taucoko tiko ga na loma i Esa vei Jiova” ena nona bula taucoko. (1 Tui 15:14) Dua na sala e vakaraitaka kina nona yalodina, oya ni kauta laivi na sokalou lasu e Juta. E kaya na iVolatabu, e “kauta laivi o koya na icabocabonisoro tani kei na vanua cecere, e vorolaka na vatu ni sokalou, e musuka na duru ni sokalou.” (2 Vei. 14:3, 5) E vakasivoi Meaka mada ga na buna mai na nona itutu vakamarama. Na vuna? Ni dau tokona na sokaloutaki ni matakau.—1 Tui 15:11-13.

3. Na cava eda na veivosakitaka ena ulutaga qo?

³ Eso tale na ka e cakava o Esa. E uqeta na sokalou savasava, e vukei ira tale ga na lewenivanua e Juta mera lesu vei Jiova. E vakalougatataki Esa kei ira na Isireli o Jiova ena bula vakacegu. * Ena loma ni tini na yabaki nona veiliutaki, e  “vakacegu tu na vanua.” (2 Vei. 14:1, 4, 6) Eda na veivosakitaka ena ulutaga qo, na nona vakayagataka vinaka o Esa na gauna ni vakacegu qori. Oti eda na raica tale ga na nodra ivakaraitaki na lotu vaKarisito ena imatai ni senitiuri, era vakataki Esa nira vakayagataka vinaka na gauna ni vakacegu. Eda na qai tinia nida sauma na taro qo: Ke o tiko ena vanua e marautaki kina na galala ni sokalou, o na vakayagataka vinaka vakacava na gauna ni vakacegu qori?

4. Me vaka e tukuni ena 2 Veigauna 14:2, 6, 7, e vakayagataka vakacava o Esa na gauna ni vakacegu?

⁴ Wilika 2 Veigauna 14:2, 6, 7. E tukuna o Esa vei ira e Juta ni o Jiova ‘e solia vei ira na vakacegu ena veiyasana.’ A kila o Esa ni sega ni gauna ni vakawelewele qori. Ia e cakacaka me tekivu tara na koro, na bai, na valececere, kei na matamata. E kaya vei ira na lewe i Juta: “Se noda tiko ga na vanua.” Na cava e vakaibalebaletaka? Era se rawa ni veitosoyaki ena galala ena vanua e solia vei ira na Kalou, qai sega ni dua na meca me tusaqati ira. E uqeti ira gona mera vakayagataka vinaka na gauna ni vakacegu qori.

5. Na cava e vakarautaka kina o Esa na nona mataivalu?

⁵ E vakayagataka tale ga o Esa na gauna ni vakacegu me vakarautaka vinaka nona mataivalu. (2 Vei. 14:8) Vakacava e nuitaki Jiova tiko? Io. Me vaka ni tui, e kila ni nona itavi me vakarautaki ira vinaka na nona tamata ena veika se bera mai. E kila tale ga ni na rairai sega ni dede na gauna ni vakacegu era vakila tiko. E qai dina taucoko qori.

6. Era vakayagataka vakacava na lotu vaKarisito ena imatai ni senitiuri na gauna ni vakacegu?

⁶ Era dau vakacacani na lotu vaKarisito ena imatai ni senitiuri, ia era marautaka  tale ga eso na gauna ni vakacegu. Era vakayagataka gona vakacava na tisaipeli na gauna va qori? Era sega ni cegu na tagane kei na yalewa yalodina qo ena nodra vunautaka na itukutuku vinaka. E tukuni ena Cakacaka nira “rerevaki Jiova.” Era vunautaka tiko ga na itukutuku vinaka qai “tubu tiko ga na kedra iwiliwili.” E macala ga ni vakalougatataka o Jiova nodra gumatua ni vunau ena gauna ni vakacegu.—Caka. 9:26-31.

7-8. Na cava e cakava o Paula kei na so tale? Vakamacalataka.

⁷ Era saga e veigauna na tisaipeli ena imatai ni senitiuri mera vunautaka na itukutuku vinaka. Kena ivakaraitaki, ni raica o Paula na kena dola vua na katuba levu ni cakacaka e Efeso, e gumatua ena vunau qai vukea eso mera tisaipeli ena korolevu qori.—1 Kor. 16:8, 9.

⁸ E vunau o Paula kei ira na vo ni lotu vaKarisito ena gauna e vakatulewataki kina na ka e baleta na cili ena 49 G.V. (Caka. 15:23-29) Ni vakarogoi na vakatulewa qori ina vavakoso kece, era gumatua sara na tisaipeli mera vunautaka “na itukutuku vinaka ni vosa i Jiova.” (Caka. 15:30-35) Cava e yaco? E tukuni ena iVolatabu ni “vakadeitaki tiko ga nodra vakabauta na lewe ni ivavakoso qai tubu tiko ga e veisiga na kedra iwiliwili.”—Caka. 16:4, 5.

9. E vakacava tu na ituvaki ena levu na vanua nikua? Cava eda rawa ni taroga?

⁹ E levu na vanua nikua e sega ni tarovi kina na noda vunau. Vakacava o tiko ena vanua e soli tu kina na galala ni sokalou? O rawa ni taroga, ‘Au sa vakayagataka tiko vakacava na galala qori?’ Ena iotioti ni veisiga qo, e gumatuataka tiko na isoqosoqo i Jiova na vunau kei na veivakavulici levu duadua e vuravura. (Mari. 13:10) Levu na sala eda rawa ni tokona kina na cakacaka qo.

10. Ena 2 Timoci 4:2, na cava eda uqeti meda cakava?

¹⁰ O na vakayagataka vinaka vakacava na gauna ni vakacegu? (Wilika 2 Timoci 4:2.) Mo dikeva tale mada na kemu ituvaki se dua na lewenivuvale. Vakacava o rawa ni vakalevutaka nomu cakacaka vakavunau, de dua mo painia? Qo e sega ni gauna meda kumuna kina na ilavo kei na iyau, ni na sega ni yaga ena veivakararawataki levu.—Vkai. 11:4; Maciu 6:31-33; 1 Joni 2:15-17.

11. Na cava era cakava eso mera vunau kina vei ira e levu?

¹¹ E levu na dautukutuku era vulica e dua tale na vosa me yaga ena nodra vunau kei na veivakavulici. E tokoni ira na isoqosoqo i Jiova ni vakarautaka na ivola vakaivolatabu ena levu na vosa. Kena ivakaraitaki ena 2010, sa vakadewataki na noda ivola ena rauta na 500 na vosa. Nikua sa sivia na 1,000 na vosa!

12. E yaga vakacava vei ira e levu nodra rogoca na itukutuku vinaka ena nodra vosa ni sucu? Tukuna e dua na ivakaraitaki.

¹² E uqeti ira vakacava e levu nira rogoca na ka dina ena Vosa ni Kalou ena nodra vosa ni sucu? Vakasamataka mada na nona ivakaraitaki e dua na tacida yalewa e yaga vua na soqo ni veiwasewase mai Memphis, Tennessee, e Merika. A vakadewataki tale ga na soqo qori ena vosa vaKinyarwanda, e vakayagataki vakalevu e Rwanda, Congo (Kinshasa), kei Uganda. Ni oti na soqo, e kaya na tacida yalewa qo: “Sa 17 na yabaki noqu tiko e Merika, ia qo se qai imatai ni gauna meu kila vinaka na ka e vakarautaki ena dua na porokaramu  vakayalo.” E macala ga ni uqeti koya vakalevu na ka e rogoca ena nona vosa. Vakacava o rawa ni vulica e dua tale na vosa mo vukea kina eso ena nomu yalava? Ena rawa ni taleitaki vakalevu qori nira tiko ena yalava eso era nuidei nira veivosaki ga ena nodra vosa. Ena vakalougatataki na nomu sasaga.

13. Era vakayagataka vakacava na tacida e Rusia na gauna ni vakacegu?

¹³ Eso na tacida era sega ni rawa ni vunau e matanalevu. Na vuna? E levu na vakatatabu e vakarota na matanitu me baleta nodra cakacaka vakavunau. Kena ivakaraitaki o ira na tacida mai Rusia. Vicasagavulu na yabaki nodra vakacacani, sa qai vakadonui vakalawa na nodra cakacaka ena Maji 1991. Ena gauna qori, e rauta ni le 16,000 na dautukutuku e Rusia. Oti e ruasagavulu na yabaki, sa tubu na iwiliwili qori ina sivia na 160,000! Macala ga nira vakatulewa vakayalomatua na tacida ena sala mera vunau kina ni soli tu na galala. A sega ni dede na gauna ni vakacegu qori. E veisau na ituvaki, ia qori e sega ni vakayalolailaitaki ira ena nodra gumatuataka na sokalou savasava. Era cakava na ka era rawata mera qaravi Jiova tiko ga.

14-15. E vakaraitaka vakacava o Jiova nona kaukaua ena vuku i Esa?

¹⁴ E mai oti na gauna ni vakacegu ni se veiliutaki tiko o Tui Esa. E gole mai Iciopea e dua na mataivalu vakaitamera, era le duanamilioni. E nuidei na kena turaganivalu o Sira ni na vakadrukai Juta na nona mataivalu. Ia e sega ni nuitaka o Tui Esa na iwiliwili ni mataivalu, e nuitaki Jiova ga na nona Kalou. E masulaka: “Moni vukei keimami Jiova na neimami Kalou ni keimami  vakararavi vei kemuni, ena yacamuni ga keimami valuti ira kina na ilala levu qo.”—2 Vei. 14:11.

¹⁵ E voleka ni vakaruataki na kedra iwiliwili na mataivalu ni Iciopea ni vakatauvatani kei ira na sotia nei Tui Esa, ia e kila ni tu vei Jiova na kaukaua, e rawa ni vala tale ga ena vukudra nona tamata. E qai vukei ira dina o Jiova. E druka vakaloloma na mataivalu ni Iciopea.—2 Vei. 14:8-13.

16. Eda kila vakacava ni na lekaleka ga na gauna ni vakacegu?

¹⁶ Eda sega ni kila vakamatailalai na veika me baleta noda bula yadua ena gauna se bera mai. Ia eda kila ni na lekaleka ga na gauna ni vakacegu eda marautaka tiko na tamata ni Kalou. Sa tukuna tu o Jisu nira na ‘cati ira na nona tisaipeli na veimatanitu’ ena iotioti ni veisiga. (Maciu 24:9) E kaya na yapositolo o Paula ni “o ira kece era via qarava na Kalou ena vuku i Karisito Jisu era na vakacacani tale ga.” (2 Tim. 3:12) E “cudru vakalevu” o Setani, ena cala gona ke da nanuma nida na sega ni vakila na nona cudru.—Vkta. 12:12.

17. Ena rawa ni vakatovolei vakacava na noda vakabauta?

¹⁷ Dua ga na gauna qo, ena vakatovolei kece na noda yalodina. Ena vakilai tale ga e vuravura “na veivakararawataki levu ena ivakatagedegede e sega ni bau vakilai vakadua mai na ivakatekivu kei vuravura me yacova mai qo.” (Maciu 24:21) Ena gauna qori, ena rawa nira tusaqati keda sara ga na lewe ni noda vuvale, rawa ni vakatabui tale ga noda cakacaka. (Maciu 10:35, 36) Vakacava eda na vakataki Esa meda nuitaka na veitaqomaki kei na veivuke i Jiova?

18. Me vaka e tukuni ena Iperiu 10:38, 39, eda na vakavakarau vakacava ni bera cava na gauna ni vakacegu?

¹⁸ O Jiova sa vakarautaki keda tiko vakayalo ena veika eda na sotava. E dusimaki keda ni vakayagataka “na dauveiqaravi yalodina e vuku” me vakarautaka na “kakana [vakayalo bulabula] ena kena gauna donu,” meda rawa ni tudei ena noda sokalou. (Maciu 24:45) Ia e dodonu meda saga yadudua me dei noda vakabauti Jiova.—Wilika Iperiu 10:38, 39.

19-20. Me vaka eda dikeva ena 1 Veigauna 28:9, na cava meda taroga? Na vuna?

 ¹⁹ Me vakataki Tui Esa, eda uqeti tale ga meda “vaqarai Jiova.” (2 Vei. 14:4; 15:1, 2) E tekivu qori nida vulica na veika me baleti koya da qai papitaiso. Eda na saga e veigauna meda vakalevutaka noda lomani Jiova. Meda kila ke da sa cakava tiko qori, meda taroga: ‘Au dau tiko wasoma ena soqoni ni ivavakoso?’ Eda na vakacegui, da vakauqeti tale ga nida tiko ena soqoni va qori e vakarautaka na isoqosoqo i Jiova. (Maciu 11:28) Eda rawa ni taroga tale ga: ‘E tiko na noqu ituvatuva vinaka ni vuli vakataki au?’ Ke o vakavuvale, vakacava o dau lokuca na gauna mo dou sokalou kina vakavuvale e veimacawa? Ke o tiko taudua, o dau tuvanaka tale ga mo sokalou vakavuvale? O dau vakaitavi vakalevu ena vunau kei na veivakatisaipelitaki?

²⁰ Na cava meda taroga kina na taro va qori? E kaya na iVolatabu ni o Jiova e dau dikeva na noda vakasama kei na lomada, qori tale ga na ka meda cakava. (Wilika 1 Veigauna 28:9.) Ke da raica ni veiganiti me veisau na noda isausau se ivakarau ni rai, meda kerei Jiova me vukei keda. Qo na gauna meda vakarautaki keda kina ena veivakatovolei se bera mai. E bibi gona mo vakayagataka vinaka na gauna ni vakacegu!