1-2. Me vaka e tukuni ena 1 Timoci 6:20, na cava e lesi vei Timoci?

EDA dau nuitaka eso tale mera maroroya na noda iyau. Kena ivakaraitaki, eda na rairai vakacuru ilavo ena baqe. Eda vinakata me maroroi vinaka, me kua ni butakoci se yali. Eda kila gona na ibalebale ni noda nuitaka e dua me maroroya na ka eda mareqeta.

² Wilika 1 Timoci 6:20. E tukuna na yapositolo o Paula vei Timoci ni soli vua e dua na iyau talei, ya na kilaka dodonu me baleta na inaki ni Kalou vua na kawatamata. E nuitaki tale ga o Timoci me “vunautaka na vosa” me “vakayacora na cakacaka ni italatala.” (2 Tim. 4:2, 5) E uqeti Timoci gona o Paula me qarauna na ka e nuitaki vua. Me vakataki Timoci, e nuitaki tale ga vei keda eso na iyau talei. Na iyau cava ya? Eda na mareqeta vakacava na iyau e solia vei keda o Jiova?

3-4. Na cava eso na vuna e talei kina na ka dina ena iVolatabu?

³ E solia vei keda o Jiova na kilaka dodonu ena nona Vosa, ya na ka dina ena iVolatabu. E talei na ka dina qori nida vulica kina na sala me vinaka tiko ga kina noda veiwekani talei kei Jiova, na rawati tale ga ni marau dina. Nida vakabauta qai muria sara, eda galala mai na veivakabobulataki ni ivakavuvuli lasu kei na itovo ca.—1 Kor. 6:9-11.

⁴ Dua tale na vuna e talei kina na ka dina ena Vosa ni Kalou, ni o Jiova e vakatakila ga qori vei ira na “yalomalumalumu.” (Caka. 13:48) Era nuitaka na ituvatuva e vakayagataka o Jiova meda vakavulici kina ena ka dina ena  gauna qo. (Maciu 11:25; 24:45) Eda sega ni rawa ni kila ga vakataki keda na ka dina qori, e sega tale ga ni vakatauvatani rawa na kena talei.—Vkai. 3:13, 15.

5. Na itavi cava tale e nuitaki keda kina o Jiova?

⁵ E nuitaki keda tale ga o Jiova meda vakavulica na ka dina me baleti koya kei na nona inaki. (Maciu 24:14) E rui talei na itukutuku eda vakasavuya. Na vuna? Ni vukea e levu mera mai lewe ni vuvale i Jiova, e rawa tale ga nira bula tawamudu. (1 Tim. 4:16) Se da mani vakaitavi vakalevu se lailai ena cakacaka vakaitalatala ena vuku ni keda ituvaki, eda sa tokona tiko na cakacaka bibi duadua e vakayacori tiko ena gauna qo. (1 Tim. 2:3, 4) Eda kalougata gona nida cakacaka vata kei Jiova!—1 Kor. 3:9.

6. Na cava e yacovi ira na sega ni yadra tiko vakayalo?

⁶ Ena gauna i Timoci, eso na lotu vaKarisito era vakawalena nodra itavi dokai, ya mera cakacaka vata kei Jiova. Kena ivakaraitaki o Timasa, e lomani vuravura mani vakawalena nona ilesilesi me tomani Paula. (2 Tim. 4:10) Kena irairai ni rau biuta o Faijelo kei Erimojini nodrau cakacaka vakaitalatala, ni rau leqataka de rau na vakacacani me vakataki Paula (2 Tim. 1:15) Eratou rawai o Imeneo, Alekisada kei Filito me ratou vukitani, ratou biuta kina na dina. (1 Tim. 1:19, 20; 2 Tim. 2:16-18) E kena irairai ni ratou a kaukaua tu vakayalo ena dua na gauna, ia eratou vakawalena na ka e bibi duadua.

7. Na ilawaki cava e vakayagataka vei keda o Setani?

⁷ E saga vakacava o Setani meda vakawalena na ka e nuitaki keda kina o Jiova? Raica mada eso na nona ilawaki. E vakayagataka na ka ni veivakamarautaki kei na tabana ni itukutuku me veisautaka vakamalua na noda itovo kei na noda vakasama meda vakawalena kina na dina. E saga me vakarerei keda meda leqataka vakalevu nodra rai eso tale me baleti keda, se tusaqati keda meda kua ni vunau. E saga tale ga me rawai keda meda rogoca na nodra “veivosaki veicalati” na vukitani “e nanumi tu ni ‘kilaka,’” me rawa nida biuta kina na dina.—1 Tim. 6:20, 21.

8. Na cava o vulica vua na tacida o Taniela?

⁸ Ke da sega ni qaqarauni, ena rawa nida vakawalena na ka dina. Dikeva na ivakaraitaki nei Taniela, * e dau taleitaka na qito ena vidio. E vakamacalataka: “Au tekivu qito niu se qai yabaki tini. Au dau qitora  eso na qito lasa, ia toso na gauna au sa taleitaka na qito voravora, e laurai tale ga kina na vakatevoro.” Lakolako sa qito tiko o Taniela me 15 na aua ena dua na siga. E kaya, “Meu tukuna vakadodonu, au kila ni mataqali qito qo kei na gauna au vakayagataka kina e vakaluluqataka sara ga noqu veiwekani kei Jiova. Ena kaukaua ni lomaqu, au sa lai nanuma ni sega ni ganiti au na ivakavuvuli vakaivolatabu.” Cava eda vulica? Na sala qaseqase e veivakamuai kina na ka ni veivakamarautaki, e rawa nida vakawalena kina na ka dina. Ena rawa nida vakayalia kina na iyau talei e nuitaki keda kina o Jiova.

9. Me vaka e tukuni ena 1 Timoci 1:18, 19, e vakatauvatani Timoci o Paula kei na cava?

⁹ Wilika 1 Timoci 1:18, 19. O Paula e vakatauvatani Timoci kei na dua na sotia, e qai uqeti koya me ‘vala ena ivalu vinaka.’ Qori e sega ni ivalu vakayago, e ivalu vakayalo. Sala cava eda vala tiko kina na lotu vaKarisito me vaka na sotia? Na itovo cava meda vakaraitaka na sotia i Karisito? Meda veivosakitaka mada e lima na ka eda vulica ena vosa vakatautauvata i Paula. Qori ena vukei keda meda mareqeta tiko ga na ka dina.

10. Na cava na ibalebale ni noda qarava na Kalou ena yalodina? Cava e bibi kina?

¹⁰ Qarava na Kalou ena yalodina. Na sotia vinaka ena yalodina. Ena vala vakaukaua me taqomaka e dua e lomana se na ka e mareqeta. E uqeti Timoci o Paula me qarava na Kalou ena yalodina, ya me kua ni biuti koya. (1 Tim. 4:7) Na levu ga ni noda lomana na Kalou qai yalodina vua, na levu tale ga ni noda mareqeta na ka dina.—1 Tim. 4:8-10; 6:6.

11. Na cava e vinakati kina meda lewai keda vinaka?

¹¹ Meda lewai keda vinaka. E vinakati vua na sotia me dau lewai koya vinaka me rawa ni vakarau tu ena ivalu. E vorata rawa na veitemaki o Timoci ni muria na ivakasala uqeti vakalou i Paula, ya me dro tani mai na gagadre ca, me muria na itovo vakalou, me dau veimaliwai tale ga kei ira na tacina vakayalo. (2 Tim. 2:22) Ena vinakati kina me lewai koya vinaka. E bibi meda lewai keda vinaka meda valuta na gagadre ca. (Roma 7:21-25) Ena vinakati tale ga na lewa vinaka meda veisautaka kina noda itovo makawa, meda vakaitovotaka na itovo vou. (Efeso 4:22, 24) Nida oca tu mai na cakacaka ena dua na siga, ena rairai vinakati meda vakaukauataki keda meda gole ga ina soqoni.—Iper. 10:24, 25.

12. Sala cava eda rawa ni maqosa kina ni vakayagataka na iVolatabu?

¹² E vinakati vua na sotia me dau vakatovotovotaka na nona iyaragi. Ni cakava wasoma, sa na qai matau kina. E bibi tale ga meda kenadau nida vakayagataka na Vosa ni Kalou. (2 Tim. 2:15) Eda vulica eso na kena iwalewale ena soqoni. Ia ke da via vukea eso tale mera vakabauta na yaga ni ka dina ena iVolatabu, e bibi meda dei ena noda ituvatuva ni vuli vakataki keda. E vinakati meda vaqaqacotaka noda vakabauta nida vulica na Vosa ni Kalou. E sega ni vinakati meda wilika wale ga. E bibi meda vakasamataka vakatitobu na ka eda wilika, da vakekeli me matata, oti meda muria sara. (1 Tim. 4:13-15) Sa na qai rawarawa nida vakayagataka na Vosa ni Kalou meda vakavulica eso tale. Kena ibalebale eda na sega ni wilika ga vei ira na iVolatabu. Meda vukei ira mera kila  na kena ibalebale kei na sala mera muria kina. Nida dei ena noda ituvatuva ni vuli vakataki keda, eda na maqosa nida vakayagataka na Vosa ni Kalou ena veivakavulici.—2 Tim. 3:16, 17.

13. Me vaka e tukuni ena Iperiu 5:14, na cava e bibi kina meda yalomatua?

¹³ Meda yalomatua. E dodonu me kila na sotia na leqa e rawa ni yaco qai vuni. E dodonu tale ga meda kila na ka e rawa ni veivakaleqai da qai vukitotolo meda gole tani mai kina. (Vkai. 22:3; wilika Iperiu 5:14.) Kena ivakaraitaki, e bibi meda digia vinaka na ka ni veivakamarautaki kei na veika eda taleitaka meda cakava. Sa takalevu tu ena tivi kei na iyaloyalo na itovo dukadukali. Na itovo qori e vakacudruya na Kalou, ena vakaleqai keda tale ga. Eda na qarauna gona na ka ni veivakamarautaki ena vakaluluqataka noda lomana na Kalou.—Efeso 5:5, 6.

14. E yaga vakacava vei Taniela na yalomatua?

¹⁴ E liaca o Taniela, sa cavuti oti mai, ni veivakaleqai na qito ena vidio e laurai kina itovo voravora kei na vakatevoro. E mani vakekeli ena Watchtower Library me walia nona leqa. Vakacava e yaga vua? E muduka kina nona qitora na qito ena vidio e sega ni veiganiti. E bokoca kece na porokaramu ni qito ena Internet e dau vakaitavi kina, e tinia tale ga nona vakailala kei ira na vo ni dau qito. E kaya o Taniela, “Au sa sega ni qai qito ena vidio, au sa dau lai cakava ga eso na cakacaka i tuba, seu lai veimaliwai kei ira na tacida ena ivavakoso.” Sa painia tiko ena gauna qo o Taniela, e qase ni ivavakoso tale ga.

15. Na cava e rerevaki kina na itukutuku lasu?

¹⁵ Me vakataki Timoci, e bibi tale ga meda qarauna nodra itukutuku lasu na vukitani. (1 Tim. 4:1, 7; 2 Tim. 2:16) Kena ivakaraitaki, era na rairai vakatetea na itukutuku lasu me baleti ira na tacida se meda lomatarotarotaka kina na isoqosoqo i Jiova. Qori e rawa ni vakaluluqataka noda vakabauta. Me kua mada ga ni vakacalai keda na itukutuku va qori. Na vuna? Nira vakatetea tiko qori o ira “sa vakacalai tu na nodra vakasama, sa buawa vei ira na ka dina.” E nodra inaki ga mera “veileti,” mera “veibataka na vosa.” (1 Tim. 6:4, 5) Era vinakata meda vakabauta nodra  vakaucaca, meda kua kina ni nuitaki ira na tacida.

16. Na cava meda qarauna?

¹⁶ Qarauna meda kua ni vakawelei. Me “sotia vinaka i Karisito Jisu” o Timoci, ena vinakati me vakaliuca nona cakacaka vakaitalatala, me kua ni vakawelei ena sasaga vakayago se vakavuravura. (2 Tim. 2:3, 4) Me vakataki Timoci, meda kua ni vakawelei ena noda lai vinakata e levu na ka vakayago. Na “veibacani ni iyau” e rawa ni vakaluluqataka noda lomani Jiova, na nona Vosa, kei na noda via wasea vei ira na ka e tukuni kina. (Maciu 13:22) E bibi me rawarawa ga na noda bula da qai vakayagataka noda gauna kei na igu meda “vakaliuca tiko ga na Matanitu ni Kalou.”—Maciu 6:22-25, 33.

17-18. Eda na taqomaka vakacava noda veiwekani kei Jiova?

¹⁷ Vakavakarau me rawa nida vukitotolo. E vinakati vua na sotia me lalawataka rawa na ka me cakava me taqomaki kina. Me rawa nida mareqeta tiko ga na ka e nuitaki keda kina o Jiova, e bibi meda vuki totolo nida raica na leqa. Eda na cakava vakacava qori? E bibi meda lalawataka rawa na ka meda cakava ni bera ni yaco na leqa.

¹⁸ Kena ivakaraitaki, nida tiko ena dua na soqo, eda dau kerei meda kila na katuba voleka duadua ni bera ni tekivu na soqo. Na vuna? Me rawa nida biubiu totolo ke yaco vakasauri na leqa. E va tale ga qori noda taqomaki keda vakayalo. Meda lalawataka rawa na ka meda cakava ke da raica vakasauri na iyaloyalo dukadukali, ivalavala vakadomobula se nodra itukutuku na vukitani ena Internet, iyaloyalo se tivi. Ke da vakarautaki keda ena ka ena rawa ni yaco, eda na vukitotolo meda taqomaka noda veiwekani kei Jiova, meda savasava tiko ga e matana.—Same 101:3; 1 Tim. 4:12.

19. Eda na vakalougatataki vakacava nida qarauna na iyau talei e solia vei keda o Jiova?

¹⁹ E vinakati meda qarauna na iyau talei e solia vei keda o Jiova, ya na ka dina vakaivolatabu kei na noda itavi ni veivakavulici. Nida cakava qori, ena vinaka na noda lewaeloma, ena vakainaki na noda bula, eda na marau tale ga meda vukea eso tale mera kilai Jiova. Ena nona veitokoni ga, eda na mareqeta tiko ga na ka e nuitaki vei keda.—1 Tim. 6:12, 19.