E tukuni ena tikinivolatabu vakavure vakasama qo: “Ke o raica ni vakasaurarataki na dravudravua qai vakatanitaki na lewa kei na ivalavala dodonu ena dua na yasana, mo kua ni kurabuitaka qori. Ni vakaraica tiko mai na vakailesilesi liu qori e dua e cecere vua, e tiko tale eso era cecere vei ira.”—Dauv. 5:8.

Ena rai vakatamata, na ka e tukuni qori e dusi ira sara ga na iliuliu vakamatanitu. Ia ke da vakasamataka vinaka, e dusia tale ga e dua na ka dina me baleti Jiova, e rawa ni vakacegui keda, e vakadeitaki keda tale ga.

E tukuni ena Dauvunau 5:8 na iliuliu e vakasaurarataki ira na dravudravua, e sega ni lewadodonu ena vukudra. Me nanuma tiko na iliuliu qori ni rawa ni vakaraici koya tiko mai e dua e cecere na nona itutu se na nona lewa. De dua era tiko eso tale e cecere sara na nodra itutu. E ka ni rarawa ni o ira kece na veiliutaki ena matanitu vakatamata era rawa ni dau veivakaisini, ena vinakati gona mera vosota na tauvanua na nodra lewa ca.

Se mani ca sara vakacava na ituvaki, eda lomavakacegu ga ni o Jiova e ‘vakaraici ira tiko mai na vakailesilesi liu’ qori. Eda rawa ni kerea na veivuke ni Kalou da qai biuta vua na noda icolacola bibi. (Same 55:22; Fpai. 4:6, 7) Eda kila tale ga ni “veiraiyaki na mata i Jiova e vuravura taucoko me vakaraitaka na nona kaukaua vei ira e taucoko vua na lomadra.”—2 Vei. 16:9.

Eda raica gona ena Dauvunau 5:8 na kedra ituvaki dina na veiliutaki ena matanitu vakatamata, ni tiko tale e dua e cecere sara na nona lewa vei ira. Dua tale na ka bibi eda vulica kina, ni o Jiova ga e Turaga Cecere Duadua. Sa veiliutaki tiko qo ena vuku i Luvena o Jisu Karisito, na Tui ni Matanitu ni Kalou. Koya gona, e raica tiko mai na ka kece o koya e Kaukaua Duadua, e dau lewadodonu me vakataki Luvena ga.