Au rarawataka ni luluqa na noqu veiwekani kei Jiova niu sa yacova yani na bula vakaitabagone. E vaka me sega tu ni yalani na nodra galala noqu itokani e koronivuli, au vinakata tale ga qori. Au nanuma ni sa rui kaukaua tale na nodrau lawa na noqu itubutubu kei na ivakatagedegede vaKarisito, e ka ni oca tale ga na qarava na itavi vakayalo. Au kila ni bula dina tiko o Jiova, ia au sega ga ni volekati koya.

Au se lai vunau tiko ga, ia sa sega ga ni vu mai lomaqu. Niu lai vunau, au sega sara ga ni vakavakarau vinaka, e dredre kina meu tekivuna e dua na veivosaki se meu vakaotia. Kena itinitini ga, sa sega ni vuavuaivinaka, au sega ni marautaka, se taleitaka vakalevu. Au dau vaqaqa, ‘Ke sega ni taleitaki va qo, e rawa vakacava ni dua e cakava tiko ga e veimacawa, e veivula?’

Niu sa yabaki 17, au via lewai au ga. Au vakatawana noqu isulu, biubiu sara e vale meu toki i Ositerelia. Rau rarawataka noqu itubutubu noqu gole qori. Rau kauai, ia erau nanuma niu na qaravi Jiova tiko ga.

 Sa qai malumu ga vakalevu noqu veika vakayalo niu sa tiko e Ositerelia. E vakavudua noqu tiko ena soqoni. Au vakailala kei ira na itabagone era vakataki au ga, era soqoni ena dua na bogi, ena bogi ga e tarava era gunu era lako e valenidanisi. Niu vakasamataka lesu, e rua tu na ivakarau ni noqu bula, au qai sega ni kila na ka meu cakava.

Ni oti e rauta ni rua na yabaki, au sotava e dua na tacida yalewa, e sega ni kila ni vakavuna sara ga meu vakasamataka tale na ivakarau ni lomaqu. Au a tiko kei na lima tale na goneyalewa, keitou qai vakaicilitaka na ivakatawa ni tabacakacaka kei watina o Tamara, me dua na macawa. Ni lai cakava eso na cakacaka ni ivavakoso o watina, dau tiko voli ga kei keitou o Tamara, keitou qai dau veilasamaki vinaka sara. Au taleitaka vakalevu na gauna qori. E rawarawa na veimaliwai kei na veivosaki kei koya. Au kurabui kina ni totoka tu va qori na veimaliwai kei na dua e dau gumatuataka nona bula vakayalo.

E dau mamakutu o Tamara. E veiuqeti nona taleitaka na ka dina, kei na nona vakaitavi ena cakacaka vakavunau. Dau marau ni qaravi Jiova ena nona vinaka kece, ia au sega ni marau niu veiqaravi tu ga me rawa. E uqeti au sara ga na nona dau rai donu, kei na nona dau mamarau. Na nona ivakaraitaki qori au vakasamataka kina vakabibi na tikina qo e yavutaki vakaivolatabu: E vinakata o Jiova meda qaravi koya kece ena “marau levu” kei na “kaila ena marau.”—Same 100:2.

Au via marau sara ga me vakataki Tamara, ia ena vinakati eso na veisau lelevu ena noqu bula. E taura toka na gauna, au qai sasaga vakamalua. Au tekivu vakavakarau ena cakacaka vakavunau, eso tale ga na gauna au painia veivuke kina. E vukei au qori meu kua ni taqaya vakalevu, me dei tale ga na lomaqu. Na levu ga ni noqu vakayagataka na iVolatabu ena cakacaka vakavunau, na levu ni noqu marau. Sega ni dede au sa painia veivuke e veivula.

 Au tekivu veimaliwai kei ira na itokani e duidui nodra yabaki ra qai toso vinaka vakayalo, era marau tale ga ni qaravi Jiova. Na nodra ivakaraitaki vinaka, au dikeva tale kina na ka bibi meu vakaliuca, meu dei tale ga ena dua na ituvatuva vakayalo. Au tekivu taleitaka vakalevu na vunau, oti ga qori au sa painia tudei sara. Sa oti e vica na yabaki, sa qai imatai ni gauna qo meu dei, au marau tale ga ena ivavakoso.

Ni oti e dua na yabaki, keirau sota kei Alex, e dau yalovinaka, dau dina, e lomani Jiova, e taleitaka tale ga na cakacaka vakavunau. Sa dau veiqaravi tiko ena ivavakoso, sa ono tale ga na yabaki nona painia voli. A veiqaravi tale tu ga ena dua na gauna ena vanua e vinakati kina vakalevu na cakacaka mai Malawi. E dau veimaliwai kei ira na daukaulotu, e dau taleitaka nodra ivakaraitaki. Ra qai uqeti koya me vakaliuca tiko ga na Matanitu ni Kalou.

Keirau vakamau ena 2003, keirau veiqaravi vata sara vakatabakidua. Levu na ka keirau vulica qai vakalougatataki keirau vakalevu o Jiova.

Ena 2009, keirau sureti me keirau lai daukaulotu e Timor-Leste, e dua na vanua lailai ena veiyatuyanuyanu e Idonisia. Keirau kurabui, marau, lomaleqa tale ga. Oti e lima na vula keirau yaco yani i Dili, na koroturaga ni vanua qori.

Neirau toki qo, e vakavuna e levu na veiveisau ena neirau bula. Ena vinakati me keirau vakamatauna na itovo, vosa, kakana, kei na ivakarau ni bula ni vanua qo. Keirau cakacaka vakavunau, keirau raici ira na dravudravua, era sega ni vuli vinaka, era vakararawataki tale ga. Levu tale e laurai ena  nodra bula na revurevu ni ivalu kei na itovo voravora. *

E taleitaki dina na cakacaka vakavunau! Kena ivakaraitaki, au sotava e dua na goneyalewa yabaki 13 o Maria, * e rarawa voli. Sa vica toka na yabaki nona takali o tinana, e sega ni dau raici tamana vakalevu. Me vakataki ira ga e levu nona icaba, e sega tu ni kila na ka me cakava. Au se nanuma vinaka ena dua na gauna, nona tagi tiko ni talaucaka vei au na lomana. Ia au sega sara ga ni kila na ka a tukuna tiko, niu se sega tale ga ni kila vinaka na nona vosa. Au masuti Jiova ga me vukei au, meu vakayaloqaqataki koya, au wilika sara vua eso na tikinivolatabu veivakauqeti. Ni oti tale e vica na yabaki, au raica ni sa veisautaki koya na ka dina, vaka kina na kena irairai kei na nona bula. E papitaiso, sa veivakavulici tale tiko ga ena iVolatabu ena gauna qo. Nikua sa lewe tiko ni dua na vuvale levu vakayalo, e vakila tale ga ni lomani.

E vakalougatataka o Jiova na cakacaka e Timor-Leste. Era se qai papitaiso ga e levu na dautukutuku ena tini na yabaki sa oti, e levu era sa veiqaravi tiko vakapainia, dauveiqaravi, se qase ni ivavakoso. Eso tale era veiqaravi tiko ena valenivolavola ni vakadewa tu yawa, mera veivuke ena kena vakadewataki na kakana vakayalo ena vosa ni vanua qori. Au dau marau niu rogoca nodra lagasere ena soqoni, ra matadredredre, au raica tale ga nodra toso vakayalo.

E duidui sara na neirau bula e Timor-Leste ni vakatauvatani kei na bula e Ositerelia, ia e sega ni tukuni rawa noqu marau. Ena so na gauna keirau na vodo ena dua na basi lailai, era osota tu e levu, kei na ika sigani vaka kina na ibinibini kakana draudrau mai na makete. Ena so tale na siga, ena vakayacori na vuli iVolatabu ena dua na vale katakata, duka na kena fuloa, levu tale ga kina na toa. Ia se mani vakacava tu na dredre ni ituvaki, au dau vakasamataka ga, ‘Qo na bula vinaka duadua!’

Niu vakasamataka lesu, au vakavinavinaka ni rau saga noqu itubutubu meu vulica na sala i Jiova, rau tokoni au tale ga ena gauna dredre mada ga ni noqu bula vakaitabagone. Au vakadinata na Vosa Vakaibalebale 22:6. Rau marautaki keirau vakalevu o Na kei Ta ni keirau qaravi Jiova tiko. Tekivu mai na 2016, keirau sa veiqaravi tiko vakaivakatawa ni tabacakacaka ena yalava e qarava na valenivolavola ni tabana e Ositerelia.

Ena rairai dredre me vakabauti ni dua na gauna au a sega ni marautaka tu na cakacaka vakavunau. Au sa qai taleitaka qo na vunau! Au raica se mani vakacava na noda bula, ena rawati ga na marau dina ena noda qarava na Kalou mai vu ni lomada. Au marautaka vakalevu na 18 na yabaki ni noqu veiqaravi voli mai kei Alex. Au sa qai kila qo na dina ni ka e tukuna na daunisame o Tevita vei Jiova: “Era na marau vakalevu o ira kece na vakaruru vei kemuni, era na kaila tiko ga ena marau, . . . Era na qai marautaki kemuni vakalevu o ira na lomana na yacamuni.”—Same 5:11.