1-2. Vakamacalataka na ka e yaco ni bera ni cavuta o Jisu na iotioti ni nona vosa.

QO NA Naisani 14, 33 G.V. E beitaki vakailasu o Jisu, e tukuni ni cala ena ka sara ga e sega ni cakava. E vakalialiai, e vakararawataki qai vako ena kau. E curu basikata na ligana kei na yavana na ivako. E mosi mada ga ni cegu se ni vosa. Ia e vinakati me vosa, ni tiko eso na ka bibi me tukuna.

² Meda veivosakitaka mada na vosa a cavuta o Jisu ni sa voleka tu ni mate ena kau, kei na ka eda vulica kina. Io, meda “rogoci koya” mada.—Maciu 17:5.

3. O cei e rairai vakaibalebaletaka tiko o Jisu ni kaya: “Tamaqu, vosoti ira”?

³ Na cava e kaya o Jisu? Ni sa vako tu ena kau o Jisu, e masuta: “Tamaqu, vosoti ira.” Vosoti cei? Eda kila na kena isau ena ka e tukuna tarava: “Era sega ni kila na ka era cakava tiko.” (Luke 23:33, 34) E rairai vakaibalebaletaka o Jisu vei ira na sotia ni Roma era vakota na ligana kei na yavana. Era sega sara ga ni kilai koya. E rairai vakasamataka tale ga eso era tiko e kea era vinakata me vakamatei, ia e muri era na vakaraitaka nira vakabauti koya. (Caka. 2:36-38) E sega ni vinakata o Jisu me cudru se yalo ca ena vuku ni veika tawadodonu e sotava. (1 Pita 2:23) E kerei Jiova ga me vosoti ira na vakamatei koya.

4. Na cava eda vulica ena nona yalorawarawa o Jisu me vosoti ira na tusaqati koya?

 ⁴ Na cava eda vulica ena vosa i Jisu? Me vakataki Jisu, meda yalorawarawa ni veivosoti. (Kolo. 3:13) Era na rairai tusaqati keda eso, okati kina o ira na wekada, ni sega ni matata vei ira na noda vakabauta, se na ivakarau ni noda bula. Era na rairai tukuna na ka lasutaki me baleti keda, ra vakamadualaki keda, vakarusa na noda ivola, se ra via vakamavoataki keda mada ga. Meda kua ni cati ira lo tiko. Meda kerei Jiova ga me vukei ira na tusaqati keda mera mai kila na dina ena dua na gauna. (Maciu 5:44, 45) Eso na gauna ena rairai dredre meda veivosoti, vakauasivi ni mosimosi na ka e caka vei keda. Ia ke da cudru se yalo ca tiko ga, eda na rarawa ga kina. E kaya e dua na tacida yalewa: “Au liaca ni veivosoti e sega ni kena ibalebale niu vakadonuya na ca e vakayacori vei au, se vakalaiva me caka tu ga. E kena ibalebale ga meu kua ni cudruvi ira tiko ga.” (Same 37:8) Nida veivosoti, eda sega ni vinakata me vakararawataki keda tiko ga na ka ca e yaco vei keda.—Efeso 4:31, 32.

5. Na cava e yalataka o Jisu vua na daubasulawa e rube tu e yasana? Na vuna?

⁵ Na cava e kaya o Jisu? E rua na daubasulawa rau rube tu ena yasa i Jisu, rau vakalialiai koya tale ga. (Maciu 27:44) Ia e dua vei rau e qai veisau na lomana. E liaca ni “sega sara ga ni dua na ka ca e cakava” o Jisu. (Luke 23:40, 41) E vakabauta tale ga ni na vakaturi mai na mate o Jisu, qai veiliutaki vakatui ena dua na siga. E tukuna vei Jisu na nona iVakabula sa vakarau mate tu: “Jisu, qai nanumi au ni oni sa tiko ena nomuni Matanitu.” (Luke 23:42) Sa dua dina na ivakaraitaki totoka ni vakabauta! E tukuna vua o Jisu: “Au tukuna vakadodonu vei iko nikua, daru na tiko vata [sega ena Matanitu ia] mai Parataisi.” (Luke 23:43) Dikeva ni a sega ni veisureti raraba o Jisu e sureti koya sara ga ni tukuna “Au,” “iko,” “daru.” E kila o Jisu ni dau yalololoma o Tamana, na ka e tukuna e vakaceguya sara ga na daubasulawa sa voleka tu ni mate.—Same 103:8.

6. Na cava eda vulica ena vosa i Jisu vua na daubasulawa?

⁶ Na cava eda vulica ena vosa i Jisu? E ucui Tamana vinaka o Jisu. (Iper. 1:3) E tu vakarau o Jiova me vosoti keda me lomani keda tale ga, ke da veivutunitaka dina na noda cala ena gauna sa oti da qai vakabauta ni rawa ni vosoti noda ivalavala ca ena dra i Jisu Karisito. (1 Joni 1:7) Eso ena rairai dredre mera vakabauta ni na rawa ni vosota o Jiova na nodra cala makawa. Ke va qori nomu rai, vakasamataka mada qo: Ni bera ni mate o Jisu, e vakaraitaka nona yalololoma vua na daubasulawa se qai tekivu vakaraitaka tiko nona vakabauta. Sa na qai wacava nona yalololoma o Jiova vei ira nona dausokalou yalodina, era saga tiko nodra vinaka mera talairawarawa ina nona ivakaro!—Same 51:1; 1 Joni 2:1, 2.

7. Na cava e tukuna o Jisu vei Meri kei Joni ena Joni 19:26, 27? Na vuna?

⁷ Na cava e kaya o Jisu? (Wilika Joni 19:26, 27.) E kauaitaki tinana o  Jisu, kena irairai ni sa yada tiko. E rawa vei ratou na tacina me ratou qarava na veika me bula kina. Ia o cei ena vukei koya vakayalo? E sega na ivakadinadina ni ratou sa tisaipeli na tacina. Ia o Joni e dua na yapositolo yalodina, e itokani voleka tale ga i Jisu. O Jisu e okati ira na tomani koya ena sokaloutaki Jiova mera nona vuvale vakayalo. (Maciu 12:46-50) Koya gona ni lomani Meri o Jisu e kauaitaki koya tale ga, e tataunaki koya kina vei Joni. E kila ni na vukei koya me qaravi Jiova tiko ga. E tukuna vei tinana: “Raica na Luvemu!” E tukuna vei Joni: “Raica na tinamu!” Me tekivu mai na siga qori sa vaka na luvei Meri o Joni, e  qaravi koya me vaka ga e tinana. Dua na ka nona lomani Meri o Jisu ni a karoni koya mai na gauna e sucu kina, sa mai duri volekati koya tu ni voleka ni mate!

8. Na cava eda vulica ena ka e tukuna o Jisu vei Meri kei Joni?

⁸ Na cava eda vulica ena vosa i Jisu? Na noda veivolekati kei ira na mataveitacini e kaukaua sara mai na noda veivolekati kei ira na wekada voleka. Era na rairai tusaqati keda na wekada se vakanadakui keda. Ia e yalataka o Jisu ke da kabiti Jiova tiko ga kei na nona isoqosoqo, ena ‘soli vei keda e 100 vakacaca’ ni vakatauvatani kei na ka eda vakayalia. Levu era na vaka na luveda tagane, luveda yalewa, tinada se tamada dauloloma. (Mari. 10:29, 30) Na cava na nomu rai ni o sa mai lewena na vuvale vakayalo e duavata ena vakabauta kei na loloma​, noda lomani Jiova eda veilomani tale ga?—Kolo. 3:14; 1 Pita 2:17.

9. Na cava eda vulica ena vosa i Jisu e volai ena Maciu 27:46?

⁹ Na cava e kaya o Jisu? Ni bera ni mate o Jisu e kaci ena domolevu: “Noqu Kalou, noqu Kalou, na cava oni sa biuti au kina?” (Maciu 27:46) E sega ni vakamacalataka na iVolatabu na vuna e tukuna kina qo o Jisu. Ia na cava eda rawa ni vulica ena ka e tukuna qori? Dua, sa vakayacora tiko kina o Jisu na parofisai ena Same 22:1. * Kena ikarua, e matata mai na vosa qori ni o Jiova e sega ni “taqomaki” Luvena. (Jope 1:10) E kila vinaka o Jisu ni o Tamana sa biuta tu nona bula ena ligadra na kena meca mera vakatovolei koya ena kena ivakatagedegede ca duadua, e se sega ni bau dua me sotava. Kena ikuri, e vakadeitaka na vosa qori ni sega ni cala o Jisu ena dua na ka e ganita me mate kina.

10. Na cava eda vulica ena vosa i Jisu vei Tamana?

¹⁰ Na cava eda vulica ena vosa i Jisu? Dua, meda kua ni namaka me taqomaki keda o Jiova ena veika dredre ena vakatovolei kina noda vakabauta. Me vakataki Jisu ga, meda tu vakarau ni mate ena yalodina ke vinakati. (Maciu 16:24, 25) Ia eda nuidei ni na sega ni vakalaiva na Kalou meda sotava na ka ni veivakatovolei eda sega ni taqea rawa. (1 Kor. 10:13) Dua tale na ka eda vulica, ya ni rawa ni caka vei keda na veika tawadodonu me vakataki Jisu ga. (1 Pita 2:19, 20) Era cakava qori na tusaqati keda nida sega ni vakavuravura da qai tukuna na ka dina, sega nida cakava e dua na ka ca. (Joni 17:14; 1 Pita 4:15, 16) E kila o Jisu na vuna e vakatara kina o Jiova me vakararawataki. Ia era taroga eso na dausokalou yalodina, se cava e vakatara kina o Jiova me yaco eso na ka nira vakatovolei. (Apak. 1:3) Ni yalololoma na Kalou, e dau yalovosovoso tale ga, e kila ni sega ni lailai na nodra vakabauta o ira qo. Era vinakata na veivakacegui e rawa ni solia duadua ga o koya.—2 Kor. 1:3, 4.

11. Na cava e cavuta kina o Jisu na vosa ena Joni 19:28?

¹¹ Na cava e kaya o Jisu? (Wilika Joni 19:28.) Na cava e kaya kina o Jisu: “Au sa karamaca”? Qori “me vakayacori kina na ka e tukuni ena tikinivolatabu,”  ya na parofisai ena Same 22:15, e kaya: “Sa mamaca mai na noqu kaukaua me vaka na iyaya tuli, sa kabita na vu ni batiqu na yamequ.” Kena ikuri, a rairai karamaca sara ga o Jisu ena vuku ni veika e sotava mai, okati kina na ka mosimosi e vakila ena kaunirarawa. E vinakata me gunuva e dua na ka.

12. Na cava eda vulica ena vosa i Jisu “Au sa karamaca”?

¹² Na cava eda vulica ena vosa i Jisu? E sega ni okata o Jisu me ivakaraitaki ni malumalumu nona tukuna na ka e nanuma, me va tale ga qori noda rai. Levu na gauna eda na rairai sega ni tukuna na ka eda vinakata. Ia ke mani yaco na ituvaki eda vinakata na veivuke, meda kua ni tu suka ni kerea. Me kena ivakaraitaki ke da sa itabaqase, se da malumalumu, ena rairai vinakati meda kerea e dua na noda itokani me kauti keda ina sitoa, se meda laurai vakavuniwai. Ke da lomabibi se yalolailai, ena rairai vinakati meda kerea e dua na qase ni ivavakoso se dua na lotu vaKarisito matua me rogoci keda, se me wasea e dua na “vosa vinaka” me vakamarautaki keda. (Vkai. 12:25) Kua ni guilecava nira lomani keda na mataveitacini, era vinakata mera vukei keda ena “gauna ni rarawa.” (Vkai. 17:17) Ia era sega ni kila na ka eda vakasamataka tiko. Era na rairai sega ni kila nida vinakata na veivuke, vakavo ke da vakaliuliu ni tukuna e dua na ka.

13. Na cava e rawata o Jisu ni yalodina me yacova ni mate?

¹³ Na cava e kaya o Jisu? Rauta na tolu na kaloko ena sigalevu ni ika14 ni Naisani, e kaci ena domoilevu o Jisu: “Sa vakacavari!” (Joni 19:30) Ni bera ni cavuka nona icegu, sa vakacavara o Jisu na kece e vinakata o Jiova me cakava. Ni yalodina o Jisu me yacova ni mate, e vakayacora kina e levu na ka. Kena imatai, e vakadinadinataka ni lasu o Setani. E vakaraitaka o Jisu ni rawa ni yalodina tiko ga e dua e uasivi se mani cava e saga o Setani. Kena ikarua, e solia o Jisu nona bula me ivoli, nona mate vakaisoro e rawa nida vakadonui kina ena mata ni Kalou na tamata ivalavala ca, e vakarautaka tale ga vei keda na inuinui ni bula tawamudu. Kena ikatolu, e tokona o Jisu na dodonu ni veiliutaki i Jiova, e vakarokorokotaka tale ga na yacana me kua ni beitaki ena dua na ka.

14. Na cava meda vakadeitaka ena veisiga? Vakamacalataka.

¹⁴ Na cava eda vulica ena vosa i Jisu? Meda vakadeitaka nida na yalodina tiko ga ena veisiga yadua. Vakasamataka mada nona vosa o Brother Maxwell Friend, e dauniveivakavulici ena Koronivuli o Kiliati. Ena dua na soqo ni veimatanitu e tukuna o Brother Friend ena nona vunau me baleta na yalodina: “Na ka o rawa ni cakava se tukuna nikua, kua ni qai cakava nimataka. O kila vakacava ni o na bula tiko nimataka? Mo vakaraitaka ena ivakarau ni nomu bula e veisiga ni ganiti iko mo bula tawamudu.” Koya gona meda raica noda bula e veisiga me iotioti ni gauna meda vakaraitaka kina noda yalodina! Ke da mani mate eda rawa ni kaya, “Jiova au sa saga noqu vinaka meu yalodina tiko ga, meu vakadinadinataka ni lasu o Setani, meu vakarokorokotaka na yacamuni kei na nomuni veiliutaki!”

15. Na cava e vakadeitaka o Jisu ena Luke 23:46?

¹⁵ Na cava e kaya o Jisu? (Wilika Luke 23:46.) E nuitaki Tamana vakatabakidua o Jisu, e kaya: “Tamaqu, au sa solia na noqu bula ina ligamuni.” E kila ni vakatautaki vei Jiova na nona bula se bera mai, e vakadeitaka ni na nanumi koya o Tamana.

16. Na cava eda vulica ena nona ivakaraitaki na tacida yabaki 15?

¹⁶ Na cava eda vulica ena vosa i Jisu? Mo yalodina tiko ga vei Jiova ke mani leqataki nomu bula. O na cakava qori ke o “nuitaki Jiova ena lomamu taucoko.” (Vkai. 3:5) Vakasamataka na ivakaraitaki i Joshua, dua na iVakadinadina i Jiova yabaki 15 e tauvimate bibi. E sega ni vakadonuya na veiqaravi vakavuniwai e beci kina na lawa ni Kalou. E tukuna vei tinana ni bera tiko ga ni mate: “Na, o Jiova ena sega ni guilecavi au. . . . Au rawa ni vakadeitaka vei iko qo: Au kila ni o Jiova ena vakaturi au mai na mate. E kila vinaka na lomaqu, au lomani koya dina.” * Meda taroga gona, ‘Ke vakatovolei na noqu vakabauta ena dua na ituvaki au rawa ni mate kina, au na yalodina tiko ga vei Jiova qai nuitaka me nanumi au?’

17-18. Na cava eda sa vulica mai? (Raica tale ga na kato “ Ka Eda Vulica ena iOtioti ni Vosa i Jisu.”)

¹⁷ E veivakauqeti dina na ka eda vulica ena iotioti ni vosa i Jisu! Eda uqeti meda dau veivosoti qai nuitaka ni na vosoti keda tale ga o Jiova. Eda kalougata ni levu na tacida ena loma ni ivavakoso era tu vakarau mera vukei keda. Ia na gauna eda leqa kina meda vakaliuliu ni kerea. Eda kila ni o Jiova ena vakaukauataki keda meda vosota na leqa. Bibi tale ga meda yalodina e veisiga, eda nuidei ni na vakaturi keda o Jiova ke da mate.

¹⁸ Io, e vakaibalebale dina na vosa a cavuta o Jisu ni voleka tu ni mate ena kaunirarawa! Nida muria na ka eda vulica vua, eda sa talairawarawa tiko ena vosa i Jiova me baleti Luvena: “Dou rogoci koya.”—Maciu 17:5.