1. Na cava e vinakati meda cakava kece?

O NA via vakaitavi ena veitaucici o kila ni sega ni rawarawa, vakabibi ni o tauvimate se oca? Kena irairai ni sega. Ia e tukuna na yapositolo o Paula nida vakaitavi kece na lotu vaKarisito ena dua na veitaucici. (Iper. 12:1) Ke da vinakata na icovi e vakarautaka o Jiova, e vinakati vei keda kece meda vosota me yacova na icavacava, ke da gone se qase, kaukaua se oca.—Maciu 24:13.

2. Na cava e doudou kina o Paula me tukuna na ivakasala qo ena 2 Timoci 4:7, 8?

² E doudou o Paula me tukuna qori ni sa “vakaotia” vinaka na “veitaucici.” (Wilika 2 Timoci 4:7, 8.) Ia na veitaucici cava e tukuna tiko o Paula?

3. Na veitaucici cava e tukuna tiko o Paula?

³ Eso na gauna e vola o Paula na ka e dau vakayacori ena qito e Kirisi makawa me vakavulica eso na ka bibi. (1 Kor. 9:25-27; 2 Tim. 2:5) E vica na gauna e vakatauvatana na ivakarau ni bula vaKarisito kei na veitaucici. (1 Kor. 9:24; Kala. 2:2; Fpai. 2:16) E tekivu nona “veitaucici” e dua ni sa yalataki koya vei Jiova qai papitaiso. (1 Pita 3:21) Ena vakacavara qori ni sa solia vua o Jiova na icovi, oya na bula tawamudu.—Maciu 25:31-34, 46; 2 Tim. 4:8.

4. Na cava eda na veivosakitaka ena ulutaga qo?

⁴ E tautauvata vakacava na veitaucici balavu kei na ivakarau ni bula vaKarisito? E vica na ka erau tautauvata kina. Meda veivosakitaka mada e tolu. Kena imatai, meda muria na gaunisala dodonu; kena ikarua, meda  vakasamataka tiko na kena icavacava se na tepi; kena ikatolu, meda vosota na ka dredre nida cici tiko.

5. Na sala cava meda muria? Na vuna?

⁵ Me rawati na icovi ena veitaucici, e vinakati mera muria na daucici na sala e dodonu. E va tale ga qori ke da via rawata na bula tawamudu, e bibi meda muria na sala se ivakarau ni bula vaKarisito. (Caka. 20:24; 1 Pita 2:21) Ia e sega ni vinakata qori o Setani kei ira na nona imuri. Era vinakata meda “tomani ira.” (1 Pita 4:4) Era vosabeca na ivakarau ni bula eda muria, era tukuna ni vinaka cake na kena era muria tiko ni vakilai kina na galala. Ia e sega ni dina qori.—2 Pita 2:19.

6. Na cava o vulica ena ivakaraitaki nei Brian?

⁶ O koya e muria na ivakarau ni bula e vinakata o Setani ena liaca ni sega ni vakilai kina na galala, ia ena bobula kina. (Roma 6:16) Dikeva mada na ivakaraitaki nei Brian. Erau uqeti koya na nona itubutubu me muria na ivakarau ni bula vaKarisito. Ni se itabagone, e vakatitiqataka ni na vakamarautaki koya na sala qori. E mani digia o Brian me cici vata kei ira na muria na ivakatagedegede i Setani. E kaya: “Au qai liaca ni galala au vinakata e vakabobulataki au ena ka ca. Toso na gauna, au vakayagataka na wainimate gaga, na gunu, e vakasisila tale ga na noqu ivakarau ni bula. Oti e vica na yabaki, au vakayagataka tale ga na wainimate gaga rerevaki, au lai bobula sara kina. . . . Au volitaka tale ga na wainimate gaga meu rawata kina na ka au vinakata.” Toso na gauna e qai vakatulewataka o Brian, me muria na ivakatagedegede i Jiova. E mani veisau qai papitaiso ena 2001. Sa marau tiko ena gauna qo ni muria na ivakarau ni bula vaKarisito. *

7. Me vaka e cavuti ena Maciu 7:13, 14, na rua na gaunisala cava meda digia?

⁷ E bibi meda digia na sala dodonu meda muria! E vinakata o Setani meda kua ni cici ena gaunisala qiqo e “basika ina bula,” ia meda muria ga na gaunisala rabailevu era cici kina e levu na tamata ni vuravura. E kilai levu na sala qori, e rawarawa tale ga ni muri. Ia e “basika ina rusa.” (Wilika Maciu 7:13, 14.) Me rawa nida tiko ga ena gaunisala dodonu qai kua ni vakacalai, e bibi meda nuitaki Jiova, meda vakarorogo tale ga vua.

8. Ke lutu na daucici, na cava ena cakava?

⁸ O ira na vakaitavi ena veitaucici balavu, era na raica vinaka na gaunisala e tu e matadra mera kua kina ni tarabe. Ia e rawa ni vakatarabetaki ira vakacalaka e dua era cici vata tiko, se ra butuka na qara ena loma ni gaunisala. Ke ra lutu, era na tucake mera cici tale. Era na vakasamataka tiko ga na tepi kei na icovi era na rawata, era na sega ni kauaitaka vakalevu na ka e vakatarabetaki ira.

9. Ke da lutu, na cava meda cakava?

⁹ Ena noda veitaucici, eda rawa ni tarabe vakavica ni cala na ka eda tukuna se cakava. Se vakararawataki keda na nodra cala o ira eda cici vata tiko. Meda kua ni kidroa ke yaco qori. Eda sega ni uasivi, eda cici vata tiko ena gaunisala qiqo e basika ina bula. Kena ibalebale eda na dau veidrigiti ena so na gauna. E kila o Paula ni so na gauna eda na “didivaka e dua na ka vua e dua tale.” (Kolo. 3:13) Na cava gona meda cakava? Meda kua ni kauaitaka tiko ga na ka e vakatarabetaki keda, ia meda vakasamataka na icovi e tu e matada. Ke da lutu, meda tucake meda cici tale. Nida cudru, yaloca da qai sega ni via tucake meda qaravi Jiova, eda na sega ni yacova na tepi, eda na sega tale ga ni rawata na icovi. Eda rawa tale ga ni vakalatilati vei ira na sasaga tiko mera cici ena gaunisala qiqo e basika ina bula.

10. Sala cava eda na sega kina ni ‘vakatarabetaki’ ira na tacida?

¹⁰ Dua tale na sala eda na sega ni ‘vakatarabetaki’ ira kina na tacida eda cicivata tiko, oya meda yalorawarawa ni rogoca na nodra vakatutu ke rawa, ia meda kua ga ni usuraka noda nanuma. (Roma 14:13, 19-21; 1 Kor. 8:9, 13) E bibi qori nida na sega ni vakataki ira na veitaucici ena qito. Era dau veiqati se veisisivi, era na dui saga mera rawata na icovi. Era sega ni kauaitaka tale e dua, era nanumi ira ga. De dua era na saga mera liu duadua. Ia o keda, eda sega ni veisisivi se vakatauvatani keda. (Kala. 5:26; 6:4) E noda inaki meda vukea e  levu tale meda yacova vata yani na tepi, meda rawata tale ga na icovi ni bula. Oya na vuna eda saga kina meda muria na ivakasala uqeti vakalou i Paula meda kua ni “kauaitaka ga na ka e baleti [keda],” meda “kauaitaka tale ga na ka e baleti ira tale eso.”—Fpai. 2:4.

11. Na cava ena kauaitaka tiko na daucici? Na vuna?

¹¹ Me ikuri ni nodra raica vinaka na daucici na gaunisala e tu e matadra, era na kauaitaka tale tiko ga na tepi. Ke ra sega mada ga ni raica vinaka na tepi, era na raitayaloyalotaka nira sa yacova yani, nira rawata tale ga na icovi. Na vuna? Nira vakasamataka tiko ga na icovi, ena uqeti ira mera cici tiko ga.

12. Na cava e vakarautaka vakayalololoma vei keda o Jiova?

¹² Ena veitaucici eda vakaitavi kina, e vakarautaka vakayalololoma o Jiova e dua na icovi nida vakaotia na veitaucici, oya na bula tawamudu i lomalagi se na parataisi e vuravura. E vakamacalataki ena iVolatabu na icovi qori, me rawa nida raitayaloyalotaka na totoka ni noda bula ena gauna qori. Nida nanuma matua tiko na noda inuinui, eda na vakadeitaka meda vosota tiko ga.

13. Eda kalougata vakacava vei ira na daucici ena qito?

¹³ E vinakati mera vosota na daucici eso na ituvaki me vaka na oca kei na mosi. Ia era vakanuinui ena ka era vulica kei na nodra kaukaua. Eda vakataki ira na daucici qori nida vakavulici tale ga ena ka meda cakava ena veitaucici ni bula. Ia eda kalougata sara vei ira na daucici ena qito. Ena sala cava? E vu ni noda kaukaua o Jiova, e sega ni vakaiyalayala na nona kaukaua. Ke da nuitaki koya, e yalataka me vakavulici keda, me vakaukauataki keda tale ga!—1 Pita 5:10.

14. E uqeti keda vakacava na 2 Korinica 12:9, 10 meda vosota?

¹⁴ E levu na ituvaki dredre e vosota o Paula. E vosabeci, tusaqati, e vakila tale ga ena so na gauna ni malumalumu. Ia e vosota tiko na ka e vakatoka me “votonikau.” (2 Kor. 12:7) Vakacava e soro koso ena nona veiqaravi? Sega. E uqeti koya ga me nuitaki Jiova. (Wilika 2 Korinica 12:9, 10.) Ni donu tiko na rai nei Paula, e vukei koya o Jiova ena ka dredre e sotava.

15. Ke da vakatotomuri Paula, na cava eda na vakila?

¹⁵ Eda na rairai vosabeci se tusaqati tale ga ena vuku ni noda vakabauta. De dua eda tauvimate se oca. Ia ke da vakatotomuri Paula, eda na okata qori me gauna vinaka meda vakila kina na veitokoni vakayalololoma i Jiova.

16. Na cava o rawa ni cakava ke o sa malumalumu?

¹⁶ Vakacava o sa davo tu ga se dabe tiko ena idabedabe qiqi? Sa malumalumu na durumu se buawa na matamu? Vakacava o rawa ni cici se qaravi Jiova vata kei ira na gone se o ira na bulabula? Io, e rawa! Levu na itabaqase kei na malumalumu era cici tiko ena gaunisala ina bula. Era sega ni nuitaka ga na nodra kaukaua. Ia era nuitaka na kaukaua i Jiova nira rogoca na soqoni mai vale ena talevoni se saravi na vidio ni soqoni. Era vakaitavi ena veivakatisaipelitaki nira vunau vei ira na vuniwai, nasi, kei na wekadra.

17. Na cava na rai nei Jiova me baleti ira na malumalumu?

 ¹⁷ Me kua mada ga ni vakararawataki iko na lailai ni ka o rawata mo nanuma ni o sa rui malumalumu ena veitaucici ni bula. E lomani iko vakalevu o Jiova ni o vakabauti koya, o veiqaravi tu me vica vata na yabaki. Ena yaga dina vei iko na nona veitokoni ena gauna qo, ena sega tale ga ni biuti iko. (Same 9:10) Ia ena toro volekati iko. Rogoca mada na ka e tukuna e dua na tacida yalewa e tautauvimate: “Ni sa qai bibi ga na kequ mate, sa lailai tiko ga na gauna meu wasea kina na ka dina. Ia au kila ni na marautaka o Jiova na ka lalai au cakava, qori e vakamarautaki au.” Ni o yalolailai, nanuma tiko ni o sega ni sotava duadua qori. Mo vakasamataka na ivakaraitaki i Paula kei na veiuqeti ni ka e tukuna: “Au marau niu malumalumu, . . . niu malumalumu, au sa qai kaukaua.”—2 Kor. 12:10.

18. Na ituvaki dredre cava tale era sotava tiko eso?

¹⁸ E dua tale na ituvaki dredre era sotava o ira na cici tiko ena gaunisala ina bula. Era vosota tiko na ituvaki eda sega ni raica rawa se kila. Kena ivakaraitaki, era vosota na lomabibi se nuiqawaqawa. Na cava era sotava kina na ituvaki dredre na itokani i Jiova? Ni dua e ramusu na ligana se dabe tiko ena idabedabe qiqi, eda rawa ni kila kece na ka e sotava tiko, ena uqeti keda qori meda veivuke. Ia o ira na vosota tiko na lomabibi se mate ni vakasama ena rairai sega ni kilai na ka era sotava tiko. Na nodra rarawa e tautauvata kei na dua e ramusu na yavana se ligana, ia era na rairai sega ni vakila sara na noda loloma.

19. Na cava eda vulica vei Mefiposeci?

¹⁹ Ke vakaiyalayala na ka o rawata ra qai sega ni kila vinaka na kemu ituvaki e levu, ena rawa ni uqeti iko na ivakaraitaki i Mefiposeci. (2 Sam. 4:4) E vosota na malumalumu ni yagona, e sega tale ga ni kila vinaka o Tui Tevita na kena ituvaki. A sega ni bale vei Mefiposeci na ka e yaco ya. Ia e donu tiko ga na nona rai, e marautaka na ka vinaka e yaco vua. E vakavinavinakataka tale ga na ka vinaka e cakava vua o Tevita. (2 Sam. 9:6-10) Ni vakalewai koya na tui, e saga o Mefiposeci me kila na ituvaki kece e yaco. E sega ni vinakata me vakararawataki koya na cala i Tevita. A sega tale ga ni beitaki Jiova kina. E kauaitaka ga o Mefiposeci na ka e rawa ni  cakava me tokona kina na tui e lesia o Jiova. (2 Sam. 16:1-4; 19:24-30) E raica gona o Jiova me volai ena nona Vosa na ivakaraitaki vinaka nei Mefiposeci meda vuli kina.—Roma 15:4.

20. Na cava era na rairai vakila o ira na nuiqawaqawa? Cava mera nuidei kina?

²⁰ Nira nuiqawaqawa eso na tacida, era rere se leqataka vakasivia na ka era kaya se cakava nira veimaliwai ena veisiga. De dua ena dredre mera veimaliwai kei na lewe levu, ia era sega ni calata na soqoni, na soqo ni tabacakacaka, kei na soqo ni veiwasewase. E sega ni rawarawa mera veivosaki kei ira era sega ni veikilai, ia era vunau ena cakacaka vakaitalatala. Ke o sotava tiko qori, mo nuidei ni levu era va tale ga qori. Nanuma tiko ni marautaka o Jiova na nomu sasaga mai vu ni lomamu. Ni o sega ni datuvu se soro, e vakadinadinataka ni vakalougatataki iko tiko, e vakaukauataki iko tale ga. * (Fpai. 4:6, 7; 1 Pita 5:7) Ke o qaravi Jiova tiko ni vakaiyalayala na ka o rawata se nuiqawaqawa, mo nuidei ni o vakamarautaki koya.

21. Ena veivuke i Jiova, na cava eda rawa ni cakava kece?

²¹ Eda marau ni tiko na duidui ni veitaucici ena qito kei na veitaucici e vakamacalataka o Paula. Na veitaucici ena gauna vakaivolatabu, e dua ga ena vakaicovi. Ia ena veitaucici ni bula, era na rawata na bula tawamudu o ira kece na vosota ena yalodina. (Joni 3:16) Ena veitaucici ni qito, e vinakati me tu vinaka tu na yagodra na daucici. Ke sega ena dredre mera qaqa. Ia vei keda, e levu era malumalumu vakayago ia era vosota tiko. (2 Kor. 4:16) Ena veivuke ga i Jiova, eda na vakaitavi kece ena veitaucici me yacova na icavacava, se tepi!