E lomaleqataka vakalevu o Hitoshi na nona vaqara cakacaka ena vica na vula e tarava. Kena ivakaraitaki, ni vakatarogi tiko ena dua na vanua e kere cakacaka kina e vakamacalataka ni cata na lasu. E qai tukuni vua, “E duatani sara ga na nomu ivakarau ni rai!” Era uqeti Hitoshi na nona vuvale kei ira na wekana me dei ena nona vakatulewa me dau dina, ia sa vaka me lomalomaruataka eso na ka. E kaya, “Au dau vakasamataka ke yaga tiko se sega na noqu saga meu dau dina ena vuku ni noqu vakabauta.”

Na ivakaraitaki i Hitoshi e vakadinadinataki kina ni levu era sa sega ni dau kauaitaka vakabibi mera dina, vakauasivi ena buturara ni bisinisi. E kaya e dua na marama ni Sauca Aferika: “Era wavoliti au na sega ni dau cakacaka vakadodonu, so na gauna e kaukaua sara ga na idre meu muri ira.”

Dua na sala era sega ni dau dina kina e levu nikua oya nira lasu. A vakayacori ena vica na yabaki sa oti e dua na vakadidike ena koronivuli ni vuli torocake na University of Massachusetts Amherst. E raica kina o Robert S. Feldman, e dau vulica na noda ivakarau ni vakasama kei na noda itovo, ni 60 na pasede ni uabula era na lasu ena loma ni tini na miniti era veivosaki tiko kina. E kaya: “E kidroataki sara ga. Sega ni namaki ni levu era dau lasu ena veisiga.” Ena rogorogo lasa gona ni tukuni ni levu era cata na lasu, ia ra qai cakava tiko na kena veibasai.

Na cava sa rui levu kina nikua na lasu, butako kei na so tale na cakacaka tawadodonu? Cava eda na vakila kece kina na lewe i vuravura? Koya e bibi sara, cava eda rawa ni cakava meda kua kina ni sikalutu ena lasu?