IVAKASALA VUKU MAKAWA E YAGA NIKUA
Kua ni Lomaocaoca
IVAKAVUVULI VAKAIVOLATABU: “Dou kua ni lomaocaocataka na nomudou bula.”—Maciu 6:25.
Kena ibalebale? A cavuta na vosa qori o Jisu ena nona Vunau ena Ulunivanua. E kaya e dua na ivolavosa ni iVolatabu, ni vu vaKirisi ni “lomaocaoca” e rawa ni vakaibalebaletaki ina “ka ena cakava e dua ena vuku ni dravudravua, walokai kei na dui leqa e rawa ni vakila ena veisiga.” Na lomaocaoca oya na noda leqataka na veika ena rairai yaco ena veisiga nimataka. E sega ni cala ke da kauaitaka na veika me baleta na veika vakayago kei na nodra bula o ira eda lomana. (Filipai 2:20) Ia na nona tukuna o Jisu, ‘kua ni lomaocaoca’ e vakasalataki ira tiko na nona imuri mera kua ni dau lomaleqa vakasivia—se mera leqataka vakasivia na veika me baleta na veisiga nimataka era lai sega kina ni marautaka nodra bula.—Maciu 6:31, 34.
Se yaga tiko ga nikua? Eda na vuku ke da muria na ivakasala i Jisu. Na vuna? Era tukuni ena so na ivola ni gauna eda lomaleqa kina vakalevu, e dau curuoso noda vakasama qai sega ni cegu, qo e lai “vakavuna eso tale na mate me vaka na vidikoso, mate ni uto kei na cegu leka.”
E vakaraitaka o Jisu e dua na vuna vinaka meda kua kina ni lomaocaoca vakasivia: E sega ni yaga. E taroga o Jisu: “O cei vei kemudou ena vuku ni nona lomaocaoca e rawa ni vakadedetaka tale vakalailai na nona bula?” (Maciu 6:27) Noda leqataka tiko ga na ka, ena sega ni vakabalavutaka vakalailai na noda bula, se me vakavinakataka. Eso tale ga na veika eda dau leqataka e sega ni dau yaco. E kaya e dua na vuku: “E veivakaocai ga noda leqataka na veisiga nimataka, ni yaco mai na veisiga qori e sega ni dau ca sara me vaka eda nanuma.”
Eda na valuta vakacava na lomaocaoca? Kena imatai, nuitaka na Kalou. Ke sa rawa vua na Kalou me vakarautaka na kedra na manumanuvuka qai vakaiukuukutaka na veisenikau, ena rawa tale ga ni vakarautaka na ka mera bula kina o ira na vakaliuci koya ena nodra bula. (Maciu 6:25, 26, 28-30) Kena ikarua, cakava ga na veika me baleta na siga yadua. E kaya o Jisu: “Kua vakadua ni lomaocaocataka na siga nimataka, ni siga nimataka e tu vata kei na kena lomaocaoca.” Vakacava o vakadinata ni “siga kece sa dui tu ga na kena ca”?—Maciu 6:34.
Na noda muria na ivakasala vuku i Jisu, eda na rawa ni taqomaki keda kina. Eda na rawa tale ga ni vakila na lomavakacegu—e vakatoka na iVolatabu me “vakacegu ni Kalou.”—Filipai 4:6, 7.
Rawa ni o Wilika Tale ga
SAUMI NA TARO VAKAIVOLATABU
Rawa ni Vakacegui Au na iVolatabu?
Qo na tikinivolatabu sa vakacegui ira e levu era sotava na ituvaki dredre, kei na yalolailai.
ESO TALE NA ULUTAGA
Sala ena Yaga Kina na iVolatabu Vei Ira na Tagane Era Lomaocaoca
Na lomaocaoca e vakavuna e levu na leqa ena gauna dredre qo. Ia na iVolatabu ena rawa ni vukei iko mo vosota na ituvaki qori.
VAKAMACALATAKI NA TIKINIVOLATABU
iVakamacala ni Maciu 6:34—“Kua Vakadua ni Lomaocaocataka na Siga ni Mataka”
Sega ni vakaibalebaletaka o Jisu meda kua ni lalawataka na veigauna se bera mai.
IVAKAVUVULI YAGA VAKAIVOLATABU
O na Kunea i Vei na iSaunitaro Bibi me Baleta na Bula?
Vakacava o dau lomatarotarotaka na veika me baleta na bula, mate kei na gauna se bera mai? E tiko na kena isau kei na levu tale! Ia o na kunea i vei?
SAUMI NA TARO VAKAIVOLATABU
Au na Kunea i Vei na iNuinui?
Ena rawa ni yaga na iVolatabu ena nomu bula ena gauna qo, o na nuidei tale ga ena veigauna se bera mai.
BALETI KEIMAMI
Kerea mo Sikovi
Veivosakitaka na isau ni dua na nomu taro mai na iVolatabu, se mo vulica eso tale na ka me baleti ira na iVakadinadina i Jiova.
