“Kemuni na Daurogo masu, era na lako mai vei kemuni na tamata kece.”—Same 65:2.

Eso era masu me rawa nira lomavakacegu kina, ia era vakabauta ni sega ni dua e rogoci ira. E sega ni inaki ga ni masu meda rawa ni lomavakacegu kina, se meda vosota kina na ituvaki dredre eda sotava. Ni kaya na iVolatabu ni “voleka o Jiova * vei ira kece na kacivi koya, vei ira kece na kacivi koya ena yalodina. . . . E rogoca o koya na nodra tagi ni kere veivuke.”—Same 145:18, 19.

Eda vakadeitaka gona ni o Jiova e rogoca na nodra masu na nona tamata. E uqeti keda vakayalololoma: “Oni na tagici au, oni na lako mai moni masuti au, au na rogoci kemuni.”—Jeremaia 29:12.

“Ni gumatua ena masu.”—Roma 12:12.

E uqeti keda na iVolatabu meda “masu tiko ga” qai ‘cabora na veimataqali masu ena ituvaki kece ga.’ Kena ibalebale, e vinakata sara ga na Kalou o Jiova meda masu vua.—Maciu 26:41; Efeso 6:18.

Na cava e vinakata kina na Kalou meda masu vua? Vakasamataka mada: Era dau vinakata sara ga na itubutubu me kaya vei ira o luvedra, “Ta, iko rawa ni vukei au”? E sa na kila rawa tu o tama na ka e vinakata o luvena, ia ni rogoca na nona kere veivuke, e dusia ni nuitaki koya o luvena, qai volekati koya. E va tale ga qori na noda masu vua na Kalou o Jiova. Eda vakaraitaka vua nida nuitaki koya, eda via volekati koya tale ga.—Vosa Vakaibalebale 15:8; Jemesa 4:8.

“Biuta vua na nomuni lomaocaoca kece, ni kauaitaki kemuni o koya.”—1 Pita 5:7.

E vinakata na Kalou meda masu vua ni lomani keda qai kauaitaki keda tale ga. E kila vinaka tu na keda ituvaki, kei na ka eda lomaleqataka. E vinakata gona me vukei keda.

Ena ituvaki kece e dau sotava o Tui Tevita, e dau masuta na Kalou o Jiova me kerea na nona veivuke, qai talaucaka na lomana vua. (Same 23:1-6) E raici Tevita vakacava na Kalou? E lomani koya, e rogoca tale ga e levu na nona masu. (Cakacaka 13:22) Ena rogoca tale ga va qori na Kalou na noda masu ni kauaitaki keda.

E vola qori e dua vei ira e vola na same. E vakadeitaka ni rogoca na Kalou na nona masu, qori e vakayaloqaqataki koya vakalevu. E veivolekati kina kei na Kalou, e rawa tale ga ni vosota kina na ituvaki dredre kece e sotava ena nona bula.—Same 116:1-9.

Na gauna eda vakadeitaka kina ni rogoca na Kalou na noda masu, eda na masu tiko ga vua. Dikeva mada na ivakaraitaki i Pedro, e vakaitikotiko ena vualiku kei Sipeni. E mai mate na luvena cauravou yabaki 19 ena dua na vakacalaka. Ena levu ni nona rarawa o Pedro, e sova na lomana vua na Kalou qai kerei koya tiko ga me vakacegui koya qai vukei koya. Na cava e qai yaco? E kaya o Pedro: “E sauma o Jiova na noqu masu ni vakayagataki ira keimami lotu vata mera vakacegui keirau vakaveiwatini qai vukei keirau.”

E sega ni vakabulai luvedrau tale mai na masu, ia e yaga vakalevu vei rau ena so tale na sala. E kaya o watina o María Carmen: “E vukei au na masu meu vosota na noqu lomabibi. E kila vinaka sara ga na Kalou o Jiova na kequ ituvaki, baleta ni oti ga na noqu masu au vakila sara ga na vakacegu, e seavu tale ga na noqu rarawa.”

Eda vakadinadinataka ena ka e volai ena iVolatabu kei na ka era sotava eso tale, ni daurogoca na Kalou na masu. Ia eda kila tale ga ni sega ni rogoca na masu kece na Kalou. Na vuna?