E Donu se Cala? Na Vakatulewa Mo Cakava
Na ivakatagedegede eda digia meda muria e rawa sara ga ni vakatau kina na noda marau se sega. E kila vinaka qori na Kalou o Jiova, e vinakata gona meda muria na nona ivakatagedegede.
E vinakata o Jiova meda vakila na vakacegu qai marautaka na bula.
“O yau o Jiova na nomu Kalou, o koya e vakavulici iko mo vinaka kina, o koya e tuberi iko ena sala mo lakova. Kevaka wale ga o rogoca na noqu ivakaro! Ena vaka na uciwai na nomu vakacegu, ena vaka na ua ni wasawasa na nomu cakadodonu.”—Aisea 48:17, 18.
Ni Dauveibuli, e kila na Kalou na ivakarau vinaka duadua ni bula meda muria. E vinakata meda muria nona veidusimaki ni na yaga vei keda. Nida muria nona ivakaro e sega ni gadrevi meda vaqaqa ke na tini vinaka na noda digidigi, se sega. Ena donu tu ga na vakatulewa eda cakava, eda na vakila kina na vakacegu kei na marau.
E sega ni namaka o Jiova meda cakava na ka eda sega ni rawata.
“E sega ni dredre sara na ivakaro qo au vakarota tiko vei iko nikua, se mo sega ni yacova rawa.”—Vakarua 30:11.
Na noda muria na ivakatagedegede savasava ni Kalou, ena rairai vinakati kina meda veisautaka na ivakarau ni noda rai kei na itovo. Ia e sega ni namaka vakasivia vei keda na ka o Jiova. Ni buli keda, e kila na ka eda rawa ni cakava. Nida sa mai kilai koya, eda na raica ni “sega ni icolacola bibi na nona ivunau.”—1 Joni 5:3.
Yalataka o Jiova ni na vukei ira na muria nona ivakatagedegede.
“O yau o Jiova na nomu Kalou, au taura tiko na ligamu imatau, o koya e tukuna vei iko, ‘Kua ni rere. Au na vukei iko.’”—Aisea 41:13.
Eda rawa ni muria na ivakatagedegede ni Kalou, ni yalataka o koya ni na vukei keda. E rawa ni vakayaloqaqataki keda ena nona Vosa na iVolatabu, qai vakacegui keda.
E vica vata na milioni e veiyasa i vuravura era raica ni vinaka cake na nodra bula nira muria na ivakatagedegede ena iVolatabu. Vakacava mo vulica e levu tale na ivakasala yaga e tu ena iVolatabu? Rawa ni o tekivu ni o raica ena jw.org na brochure vakaivolatabu Marau me Tawamudu! e sega ni saumi. E tiko kina eso na lesoni qo:
-
Ena Vukei Iko Vakacava na iVolatabu?
-
Na iNuinui ena iVolatabu
-
O Rawa ni Nuitaka na iVolatabu?
Ni o vakadikeva na Vosa ni Kalou na iVolatabu o na raica ni se yaga tiko ga e “nuitaki tu ga, ena gauna qo qai tawamudu.” (Same 111:8) Na noda muria na ivakatagedegede ena iVolatabu, e ivakarau ni bula vinaka duadua. Ia e sega ni vakasaurarataki keda na Kalou. (Vakarua 30:19, 20; Josua 24:15) Qori na vakatulewa eda na dui cakava.
