E TAURA toka e ligana o Jordan e dua na icivicivi ni penikau e vaka na ibulibuli ni waqa. Ena rairai nanumi ni sega ni yaga na icivicivi ni penikau qori, ia e dau vakamareqeta vakalevu o Jordan. E kaya o Jordan ni a lolomataka vua na icivicivi ni penikau o Russell, e dua na turaga eratou dau veitokani vinaka. E qai kila o Jordan ena gauna e mate kina o Russell, ni dau vukei ratou vakalevu na tukana kei rau na nona itubutubu. E dau tokoni ratou ena gauna ni leqa. E kaya o Jordan: “Niu sa kilai Russell vinaka, au sa qai vakamareqeta ga na nona iloloma.”

E laurai ena ivakaraitaki i Jordan ni duidui na rai ni tamata me baleta na iloloma. Ena vakaraitaka nona vakavinavinaka e dua ke mareqeta qai marautaka na iloloma e soli vua. E vakamacalataka na iVolatabu e dua na iloloma uasivi ni kaya: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa kina o ira na vakaraitaka nodra vakabauti koya, mera rawata ga na bula tawamudu.”—Joni 3:16.

E sega ni dua tale na iloloma e uasivia na kena e rawa ni bula tawamudu kina e dua. E ka “talei” vei ira na lotu vaKarisito dina na iloloma qori, ia era nanuma e levu ni sega ni yaga. (Same 49:8; 1 Pita 1:18, 19) Na cava e solia vakailoloma kina ena vukuda na Kalou na bula i Luvena?

E sauma qori na yapositolo o Paula ni kaya: “Ena vuku ni dua ga na tamata e curu kina i vuravura na ivalavala ca, kei na mate ena vuku ni ivalavala ca, mani dewa na mate vei ira na tamata kece ga.” (Roma 5:12) Nona talaidredre vua na Kalou o Atama e vakavuna na ivalavala ca kei na mate. Ena vuku gona i Atama eda mate kece kina na nona kawa.

 “Na isau ni ivalavala ca na mate, ia na iloloma ni Kalou na bula tawamudu ena vuku i Karisito Jisu na noda Turaga.” (Roma 6:23) E tala mai vuravura na Kalou na Luvena uasivi o Jisu Karisito me isoro, me sereki keda na tamata mai na mate. Na isoro qori e vakatokai me “ivoli,” era na bula tawamudu kina o ira kece era vakabauti Jisu.—Roma 3:24.

E kaya o Paula me baleta na veivakalougatataki e vakarautaka tu na Kalou ena vuku i Jisu Karisito: “Me vakavinavinakataki na Kalou ena nona loloma soli wale, na iloloma e sega ni vakamacalataki rawa.” (2 Korinica 9:15) E sega ni vakamacalataki rawa na totoka ni isoro ni veivoli. Na cava e vakasakiti kina na isoro ni vakatauvatani kei na iloloma kece ni Kalou vei keda na tamata? Na cava e duatani duadua kina? * Na cava meda cakava ena iloloma qori? Raica na kena isau vakaivolatabu ena rua na ulutaga e tarava.