O dau vaqaqa se na vakacava nomu bula se na nodratou bula nomu vuvale ena gauna se bera mai? Vakacava dou na vutuniyau? Dou na veilomani tiko ga se dou na rarawa qai galili? O na bula balavu se o na matedole? Sa vica vata na yabaki na kena vaqaqai voli mai na isau ni taro qori.

E levu era yavutaka nodra vatavatairalago me baleta na gauna se bera mai ena veika era dikeva ni yaco tu e veiyasa i vuravura. E levu na ka era tukuna e yaco, ia eso tale nodra vatavatairalago e vakavu rarawa ni sega ni yaco dina. Kena ivakaraitaki, e kaya o Guglielmo Marconi a tauyavutaka ena 1912 na vakauitukutuku ena walesi: “Na vakayagataki ni walesi ena vakaotia na ivalu.” E kaya tale ga e dua na vakailesilesi a sega ni via katona nodratou sere na Beatles ena 1962, ni na seavu yani na kedra kamica na mataqiriqiri era vakayagataka na qita.

E levu era nuitaka na kaukaua vuni mera kila kina na veika ena yaco ena gauna se bera mai. Eso era taro ivakasala vei ira na dauraikalokalo, eso era rai ena mekesini se niusipepa mera raica na vatavatairalago ni nodra bula (horoscope). Eso tale era kere ivakasala vei ira na daurairai. Era kaya na daurairai nira rawa ni tukuna na ka e se bera ni yaco nira tuvaimau, se nira wilika na naba kei na laini ena qeteqeteniliga.

Ena gauna makawa, eso era dau kere ivakasala vei ira na bete kei ira na bete yalewa nira via kila na ka ena yaco ena gauna se bera mai. Era na qai vakadewataka na bete vei ira na vakatataro na nona itukutuku na nodra kalou. Kena ivakaraitaki, e tukuni ni vakauta o Croesus na tui kei Lydia na iloloma vua na bete mai Delphi e Kirisi ni via kila na ka ena yaco ke vala kei Sairusi mai Perisia. E kaya na bete ni na vakarusa o Croesus “e dua na matanitu qaqa” ke ravuti Sairusi. E mani gole o Croesus ni nuidei ena qaqa ena ivalu, ia na matanitu qaqa a vakarusai na nona matanitu o Croesus!

E sega ni matata nona vatavatairalago na bete me baleta na ka ena yaco. Se mani o cei e qaqa ena ivalu, e se rawa tiko ga ni tukuni ni dina na ka e kaya na bete. E vakayalia kece o Croesus na ka e taukena ni vakabauta na itukutuku lasu. Vakacava ena gauna qo? Na cava era vakila o ira na vakanuinui ena so na iwalewale ni kena kilai na ka e se bera ni yaco?