KAWATAMATA

Ka e kaya na iVolatabu: Na Kalou “e sega ni bulia [na vuravura] me lala, e bulia ga me tawa.”—AISEA 45:18.

VURAVURA QELE

Ka e kaya na iVolatabu: “E lako yani e dua na itabatamata, e lako mai e dua na itabatamata, ia na vuravura ena tu ga me tawamudu.”—DAUVUNAU 1:4.

KENA IBALEBALE: E kaya gona na iVolatabu ni na sega vakadua ni vakarusai na vuravura, ena tawani tu ga. Ia, na cava na ibalebale ni vakarusai ni vuravura e tukuni ena iVolatabu?

VAKASAMATAKA MADA: E kaya na iVolatabu na vakarusai ni vuravura, ena vaka ga na ka e yaco ena gauna i Noa. Ena gauna ya e ‘sinai o vuravura ena itovo kaukaua.’ (Vakatekivu 6:13) Ia e cakava tiko ga o Noa na ka e dodonu. Cava e qai yaco? Na Kalou e qai vakabulai koya kei na nona vuvale. Ia e vakarusai ira na tamata ca ena waluvu. Ni vakamacalataka na iVolatabu na ka e yaco qori, e kaya ni “vakarusai kina na vuravura ena gauna ya ni luvuci ena wai.” (2 Pita 3:6) Qori na sala e vakarusai kina na vuravura ena gauna ya. Ia, na cava a vakarusai? Sega ni vuravura qele eda bula tiko kina, era vakarusai ga na tamata ca. Ni kaya gona na iVolatabu na vakarusai ni vuravura, e sega ni vakaibalebaletaka na vuravura eda bula tiko kina qo. E vakaibalebaletaka ga nodra vakarusai laivi mai vuravura na tamata ca, kei na ivakarau ca kece.

LEQA KEI NA VEIKA CA

Ka e kaya na iVolatabu: “Malua mada vakalailai, sa na sega vakadua na daucaka ca, o na rai ena vanua era tu kina e liu, era na yali kina. Ia era na taukena na vuravura na yalomalumalumu, era na kunea na marau vakasakiti ena levu ni vakacegu.”—SAME 37:10, 11.

KENA IBALEBALE: Na Waluvu ena siga i Noa e sega ni vakaotia vakadua na veika ca kece. Na vuna? Ni oti na Waluvu, era baci vakavu rarawa tale na tamata ca. Ia sa voleka sara na gauna me vakaotia kina na Kalou na veika ca. Me vaka e kaya na daunisame: “Sa na sega vakadua na daucaka ca.” Ena vakayagataka na Kalou na nona Matanitu me vakaotia kina na veika ca kece. Na matanitu qori ena veiliutaki mai lomalagi, qai lewa na vuravura era tiko kina na yalododonu.

VAKASAMATAKA MADA: Vacava era na tokona na iliuliu kei vuravura na veiliutaki ni Matanitu ni Kalou? Sega, ni kaya na iVolatabu era na saqata. (Same 2:2) Cava ena qai yaco? Na Matanitu ni Kalou ena sosomitaka na matanitu kece vakatamata, ‘ena qai tu ga me tawamudu.’ (Taniela 2:44) Ia na cava me vakarusai kina na veiliutaki vakatamata?

Ka e kaya na iVolatabu: “E sega ni vu vua na tamata e lako tu me lewa na nona ilakolako.”—JEREMAIA 10:23.

KENA IBALEBALE: E sega ni buli na tamata me liutaki koya ga. E sega gona ni dau vinaka na ivakarau ni nodra veiliutaki na tamata, kei na nodra saga mera walia na leqa.

VAKASAMATAKA MADA: E kaya na mekesini na Britannica Academic, nira sega ni walia rawa na veimatanitu na “leqa e tarai vuravura taucoko me vaka na dravudravua, leqa ni kakana, tauvimate, leqa tubukoso, ivalu kei na itovo kaukaua.” E tomana: “Eso. . . era nanuma ni na wali ga na leqa kece qori, ke dua ga na matanitu me liutaka na vuravura taucoko.” Ia ke ra duavata mada ga na matanitu kece, era na veiliutaki tiko ga na tamata ivalavala ca. Era na sega ni vakaotia rawa na veika dredre kece eda sotava tu qo. Na Matanitu ni Kalou duadua ga, e tiko vua na kaukaua me vakaotia vakadua na leqa kece ni vuravura.

E sega gona ni dodonu mera rerevaka na tamata vinaka na vakarusai ni vuravura e tukuni ena iVolatabu. Na vuna? Ni qori e vakaibalebaletaka tiko ga na vakarusai ni veika ca. Qo e dua na ka meda rai vakanamata kina, ni na sosomitaki na vuravura makawa qai torosobu qo ena dua vuravura vou e totoka, e vakarautaka na Kalou!

Gauna cava ena yaco kina qori? E vakamacalataka na ulutaga tarava na kena isau vakaivolatabu.