E tukuni ni o koya e veinanumi “e kauaitaka na ivakarau ni lomana e dua tale kei na veika e sotava, qai biuti koya ena kena ituvaki.” E kaya e dua na vuniwai ni vakasama o Rick Hanson, ni “tiki ni noda bula na veinanumi.”

VAKASAMATAKA: Na cava eda dauveinanumi kina o keda, ia era sega ni cakava qori na veika bula tale eso? E kaya na iVolatabu ni buli keda na Kalou meda ucui koya. (Vakatekivu 1:26) Eda buli meda ucuya na Kalou ena nona itovo, eda rawa gona ni vakaraitaka eso na nona itovo vinaka. Nida dau vukei ira eso tale, eda sa vakatotomuria tiko nona dauveinanumi na Dauveibuli na Kalou o Jiova.—Vosa Vakaibalebale 14:31.

E dau nanumi keda na Kalou, qai sega ni vinakata meda rarawa. E rauta ni 40 na yabaki nodra vosota tu na Isireli na veivakabobulataki e Ijipita, e kaya na iVolatabu: “Ena gauna kece era rarawa kina e rarawa o koya.” (Aisea 63:9) E sega wale ga ni raica na nodra rarawa, e vakila sara ga. E kaya: “Niu kila vinaka na ka mosimosi era vakila tiko.” (Lako Yani 3:7) E kaya na Kalou: “O koya e tarai kemuni e tara na loa ni mataqu.” (Sakaraia 2:8) Nira vakararawataki keda eso, e rarawa tale ga o Jiova.

Eda na rairai beitaki keda vakasivia ena so na gauna, da qai nanuma ni sega ni nanumi keda na Kalou. Ia e vakadeitaka na iVolatabu “ni uasivia na lomada na Kalou, e kila tale ga na ka kece.” (1 Joni 3:19, 20) Na Kalou e kilai keda vinaka cake. E kila vinaka na keda ituvaki, na ka eda vakasamataka, kei na ka e tu e lomada. E dau nanumi keda tale ga.

 E kaya na iVolatabu

• “Ni o masu ena rogoci iko o Jiova, o na kere veivuke, ena tukuna mai o koya, ‘O yau qo!’”—AISEA 58:9.

• “‘Niu kila vinaka na ka au nanuma tiko me baleti kemuni,’ e kaya o Jiova, ‘na nanuma moni tikovakacegu moni kua ni rarawa, meu solia vei kemuni na inuinui kei na ka moni namaka ena gauna se bera mai. Oni na tagici au, oni na lako mai moni masuti au, au na rogoci kemuni.’”—JEREMAIA 29:11, 12.

• “Ni tawana na wainimataqu ena nomuni tavaya kulinimanumanu. Vakacava era sega ni volai tu e nomuni ivola?”—SAME 56:8.

Na noda kila ni dauveinanumi na Kalou ena vukei keda meda vosota na ituvaki dredre eda sotava. Dikeva mada na ivakaraitaki i Maria:

“Sega ni tukuni rawa na levu ni mosi au vakila ena nona takali na luvequ tagane yabaki 18, e tauvi koya na kenisa. Gauna dredre dina vei au ya, au qai nanuma ni sega ni dodonu me yaco qori. Au cudruvi Jiova sara ga ni sega ni bau cakava e dua na ka, se me vakabulai koya!

“Oti e ono na yabaki au a talaucaka na lomaqu vua e dua noqu itokani dredre ena ivavakoso, oya niu nanuma ni sega ni lomani au o Jiova. Dua na ka nona vakarogoci au vinaka. Oti e vica na aua neirau veitalanoa, sa qai tukuna vei au e dua na tikinivolatabu e uqeti au dina. Qori na 1 Joni 3:19, 20, e kaya: ‘Ni uasivia na lomada na Kalou, e kila tale ga na ka kece.’ E kaya o noqu itokani ni kila vinaka tu o Jiova na noda leqa.

“E taura na gauna me oti noqu cudru! Au sa qai wilika na Same 94:19, e kaya: ‘Ni bikai au na nuiqawaqawa, oni vakacegui au qai vakayaloqaqataki au.’ E vaka ga e volai me baleti au na tikinivolatabu qori! E veivakacegui dina niu talaucaka vei Jiova noqu leqa, au kila ni na rogoca qai kila vinaka na ituvaki au sotava tiko.”

E veivakacegui dina ni kila vinaka tu na Kalou na ka eda sotava, e kauaitaka tale ga! Ia na cava sa qai levu ga kina na rarawa? E totogitaki keda beka na Kalou ena vuku ni noda cala? Vakacava ena vakaotia na Kalou na rarawa? Ena saumi qori ena vica na ulutaga e tarava.