E vakasakiti nona bulia na yagoda na Kalou me mavo ga vakataki koya. Ni mavoa se drakusi na yago, e dau “cakacaka vata na veitikiniyago me mavo tale kina na mavoa lelevu se lalai.” (Johns Hopkins Medicine) Era cakacakavata na tikiniyago me tarova na drodro ni dra, vakamavotaka na mavoa, qai vakaukauataka na viciko ni yago.

VAKASAMATAKA: Ke sa bulia na yagoda na Dauveibuli me mavo ga vakataki koya, eda nuidei ni na dina ena nona yalayala me vukei keda ena ituvaki e dau vakararawataka na lomada. E vola na daunisame: “E vakabulai ira na ramusu na lomadra, e vauca na nodra mavoa.” (Same 147:3) Kaya mada e vakararawataki iko tiko e dua na ka o cakava ena gauna sa oti, se dua na ituvaki o sotava tiko ena gauna qo. O na vakadeitaka vakacava ni na vauca o Jiova nomu mavoa ena gauna qo kei na veigauna se bera mai?

E yalataka na Kalou: “Mo kua ni rere niu tokoni iko. Kua ni taqaya niu nomu Kalou. Au na vakaukauataki iko, io, au na vukei iko.” (Aisea 41:10) Ke kila e dua ni kauaitaki koya o Jiova, ena vakila na vakacegu ni vakasama qai vakaukauataki me vosota na ituvaki dredre. Na yapositolo o Paula e vakatoka na vakacegu qori me “vakacegu ni Kalou e uasivia na vakasama kece.” E kuria o Paula: “Au rawata na ka kece ena vuku i koya e vakaukauataki au.”—Filipai 4:4-7, 9, 13.

Na iVolatabu ena vaqaqacotaka noda vakabauta na yalayala i Jiova me baleta na gauna se bera mai. Kena ivakaraitaki, na Vakatakila 21:4, 5 e tukuna na veika ena cakava o Jiova, kei na vuna meda nuitaka kina ni na vakayacora dina:

• “Ena qusia tani . . . na wainimata” mai na matada. Ke ra sega mada ga ni kauai eso tale, o Jiova ena vakaotia kece na noda rarawa kei na nuiqawaqawa.

• “E dabe tiko ena idabedabe vakaturaga” na Kalou Kaukaua Duadua e lewa na veika buli kece. E vakayagataka na kaukaua kei na lewa e tu vua me vakaotia na veika rarawa, qai veivuke ena gauna ni leqa.

• E vakadeitaka o Jiova ni “donu . . . e dina tale ga” na veika e yalataka. Kena ibalebale ena vakayacora dina na ka e yalataka baleta ni vauci tiko kina na yacana kei na kena irogorogo.

“‘Ena qusia tani . . . na wainimata kece mai na matadra, sa na sega tale na mate, na lolosi, na tagiyaso, kei na mosi. Sa oti na veika e dau yaco e liu. E qai kaya o koya e dabe tiko ena idabedabe vakaturaga: ‘Raica! Au sa vakavoutaka na ka kece.’ E kaya tale ga: ‘Vola, e donu na vosa qo, e dina tale ga.’”—Vakatakila 21:4, 5.

Na lomalagi, vuravura, kei na iVolatabu eratou vakavotuya vinaka nona itovo na Tamada vakalomalagi. Na veika buli e uqeti keda meda bucina e dua na veiwekani kei Jiova, ia na iVolatabu e veisureti sara ga vakadodonu: “Toro voleka vua na Kalou ena qai toro voleka mai vei kemuni o koya.” (Jemesa 4:8) E kaya na Cakacaka 17:27: “Ni sega ni yawa o koya vei keda yadua.”

Ni o saga mo kila na Kalou, o na vakadeitaka sara ga ni ‘kauaitaki iko o koya.’ (1 Pita 5:7) Na cava eso na sala e yaga kina nomu nuitaki Jiova?

Dikeva na ka e sotava o Toru mai Japani. E susugi koya na tinana lotu vaKarisito, ia e lai lewena e dua na ilala voravora e vakatokai na yakuza. E kaya: “Au vakabauta ni sevaki au na Kalou, au nanuma tale ga ni nodra mate eso au kila, vakabibi o ira keimami veivolekati e itotogi ni noqu ivalavala.” E kaya o Toru ni nona rai cala kei na nona vakailala kei ira era voravora e vakavuna me “tawayalololoma qai sega ni veikauaitaki.” E kaya o koya ni vinakata me vakamatea e dua na tamata rogo me dokai kina.

Ia e cakava na veiveisau lelevu ena nona bula kei na nona ivakarau ni rai ni rau vulica na iVolatabu kei na watina o Hannah. E kaya o Hannah: “Au raica  sara ga na veisau vei watiqu.” E tukuna ena nuidei o Toru: “E tiko e dua na Kalou e kauaitaki keda yadudua. E sega ni vinakata meda mate, e tu vakarau tale ga me veivosoti ni veivutuni dina e dua. E vakarogoci keda nida talaucaka vua na ka eda sega ni rawa ni tukuna vua e dua tale, kei na veika era na rairai sega ni taura rawa eso tale. Sa voleka na gauna me kauta laivi kina o Jiova na leqa, rarawa, kei na mosi. Ena gauna mada ga qo, eda kurabuitaka na sala e dau vukei keda kina. E lomani keda qai vukei keda nida rarawa.”—Same 136:23.

Na cava eda vulica ena ivakaraitaki i Toru? Noda kila ni sa voleka ni vakaotia o Jiova na veika rarawa, qusia tale ga na wainimata mai na matada, e vakataudeitaka noda inuinui ni veigauna se bera mai. E vukei keda tale ga meda marautaka noda bula ena gauna qo. Io, ena vuravura mada ga e levu tu kina qo na veika rarawa, eda se rawa ga ni vakila na veikaroni vakayalololoma ni Kalou.