O Bau Kila?
E duidui vakacava na rai i Jisu me baleti ira na vukavuka?
Era rerevaka na Jiu na vukavuka e dau veitauvi ena gauna vakaivolatabu. Na mate rerevaki qori e rawa ni vakaleqa vakadua na nave, e kania na yago, e sega tale ga na kena iwali. O koya e vukavuka e dodonu me vakaraitaka ni tiko vua na mate ya, ena sega ni veimaliwai kei ira eso tale.—Vunau ni Soro 13:45, 46.
E cavuti ena iVolatabu na lawa e vauci ira na vukavuka. Ia na lawa era bulia na iliuliu ni lotu vakaJiu sa sivia tale, e ikuri ga ni rarawa vei ira na vukavuka. Kena ivakaraitaki, e tukuni ena nodra lawa na rapai me 2 na mita na yawa ni vanua era tu kina na vukavuka. Ia ke liwa tiko na cagi, e dodonu me 45 na mita na yawa ni vanua qori. E tukuni ena nodra ivola na Jiu na Talmud ni nodra vakaroti ena iVolatabu na vukavuka mera tiko “ena taudaku ni keba,” e kena ibalebale mera tiko ena taudaku ni koro vakabai. Ke raica na rapai e dua na vukavuka ena loma ni koro, e dau vakaviriki koya ena vatu qai kaya: “Lako ina nomu itikotiko, kua ni vakadukadukalitaki ira na vo ni lewenivanua.”
E duatani sara na rai i Jisu! E dau lomani ira na vukavuka, e bau tarai ira mada ga ena gauna e vakabulai ira kina.—Maciu 8:3.
Na yavu cava era vakadonuya kina na veisere na iliuliu ni lotu vakaJiu?
iVola ni Veisere a volai ena 71/72 G.V.
E dau vakavu veivosaki vakalevu na veisere vei ira na iliuliu ni lotu ena imatai ni senitiuri G.V. Era mani vakatovolei Jisu na Farisi ena dua na gauna nira taroga: “E vakatarai vua na tagane me sereki watina ena dua ga na yavu e rawa?”—Maciu 19:3.
E vakadonui ena lawa a soli vei Mosese me sereki watina e dua na tagane ke “raica vua . . . e dua na ka tawakilikili.” (Vakarua 24:1) Ena gauna i Jisu, e duidui na nodra rai na rapai me baleta na ibalebale ni lawa qori. Eso era kaya ni yavu ga ni veisere na “itovo dukadukali,” oya na veibutakoci. Ia eso tale era nanuma ni rawa ni sereki watina e dua na tagane ke dua mada ga nodrau veileqaleqati lailai. E rawa tale ga ni sereki watina o tagane ke sega ni vakabutara vinaka na kena kakana, se sotava e dua tale na yalewa e nanuma ni rairai vinaka cake.
A sauma o Jisu na nodra taro na Farisi ni kaya: “Na tagane e sereka na watina qai vakawati tale e sa wili me veibutakoci ke sega ni veiyacovi tawadodonu o watina.”—Maciu 19:6, 9.
Rawa ni o Wilika Tale ga
SAUMI NA TARO VAKAIVOLATABU
E Dua ga na Turaga Vinaka o Jisu?
Vuna e tamata rogo duadua kina e vuravura o Jisu na kai Nasareci.
SAUMI NA TARO VAKAIVOLATABU
E Vakatara na iVolatabu na Veisere?
Vulica na ka e vakatara na Kalou kei na ka e cata.
RA TAROGA NA ITABAGONE
Vakacava ke Rau Veisere na Noqu iTubutubu?
E sega ni rawarawa mo ciqoma na nodrau veisere na nomu itubutubu. Ia qo eso na ivakasala o rawa ni muria mo vosota kina.
LESONI NI VULI IVOLATABU
Nona Vakabulai e Dua na Vukavuka!
Vulica na ka e cakava o Neamani me vakabulai kina.
