Au sucu ena Tokalau kei Jamani ena koro o Saxony ena gauna e wase rua tu kina na matanitu. Keitou vuvale mamarau qai dauveilomani, erau vakavulici au tale ga na noqu itubutubu ena itovo vinaka. A qali tu na Tokalau kei Jamani ina veiliutaki vaKominisi, era sega kina ni raica vakabibi na lotu eso e Saxony. Au sega ni vakabauta ni bula tiko na Kalou. Rua na ivakavuvuli e veivakamuai vakalevu ena noqu bula me yacova niu yabaki 18, oya ni sega ni bula tiko na Kalou qai dodonu me tokoni na veiliutaki vaKominisi.

Au taleitaka na veiliutaki vaKominisi ni sega kina na veivakaduiduitaki. Au vakabauta ni dodonu me wasei vakatautauvata na iyau, kua kina nira vutuniyau sara eso ra dravudravua sara eso tale. Au vakaogai au kina ena isoqosoqo ni itabagone e tokona na veiliutaki vaKominisi. Niu se qai yabaki 14, au veivuke vakalevu ena so na sasaga ena itikotiko me vaka na kena vakayagataki tale na pepa e sa biu ena benu (recycle wastepaper). Era vakaicovitaki au na vakailesilesi ni tauni e Aue ena noqu dau veivuke. Au veikilai ena gauna qori kei na so na daunipolitiki kilai levu ena Tokalau kei Jamani. Au nanuma ni sa donu na ka au vakaliuca, ena yaga tale ga ena veisiga nimataka.

Ia e yaco na veisau ena 1989, ena gauna a bale kina na ilati e wasei rau tu na Tokalau kei na ra kei Berlin (Berlin Wall). Sa malumu na veiliutaki vaKominisi ena Tokalau kei na Loma i Urope. E yaco veitaravi na leqa, au sa qai kila ni sega ni vinaka na veiliutaki. Kena ivakaraitaki, era dau vakalolomataki o ira na sega ni tokona na veiliutaki vaKominisi ena Tokalau kei Jamani. A yaco vakacava qori? Au nanuma ga ni keimami sega ni dau veivakaduiduitaki. Au sa tekivu vakatitiqataka sara ga na veiliutaki vaKominisi, qai tuburi au na lomaleqa.

Au mani veisautaka na ka au vakaliuca, au tovolea na vakatagi kei na droini. Au vinakata meu dua na daunivakatagi kei na daudroini. Au mani lai vuli ena koronivuli ni ivakatagi, au saga meu yaco sara ena kena univesiti. Sa biu vakatikitiki na veika au tuberi kina niu se gone. Au taleitaka ga na lasa kei na marau, qai vica vata noqu itau. Ia na ivakatagi, droini, kei na noqu cakava ga na ka au vinakata e sega ni vakaseavutaka noqu lomabibi. Na ka mada ga au droinitaka e laurai kina na rere vakalialia. Ena vakacava na veisiga se bera mai? Na cava sara mada na inaki ni bula?

 Dua na ka noqu kurabui ena gauna au kunea kina na isau ni noqu vakatataro. Keimami dabe vata ena dua na yakavi eso na gonevuli me keimami veitalanoataka na veigauna se bera mai. A vakamacala sara vakavinaka vei au o Mandy, * dua na gonevuli e iVakadinadina i Jiova. E kaya: “Andreas, ke o via kila na isaunitaro me baleta na bula kei na veigauna se bera mai, mo vulica vinaka na iVolatabu.”

Au lomatarotarotaka na veika e tukuna qori, ia au nanuma meu rai mada ga ena iVolatabu. E vakaraitaka vei au o Mandy na ka e tukuni ena Taniela wase 2. Niu wilika oti na tikinivolatabu qori au kurabui sara ga. E vakamacalataki kina na veimatanitu qaqa era na veiliutaki me yacova mai na noda gauna qo. E vakaraitaka tale ga vei au o Mandy eso na parofisai vakaivolatabu me baleta na veigauna se bera mai. Au sa qai kunea na isau ni noqu taro! Ia o cei e vola na parofisai qori? O cei e rawa ni parofisaitaka na veika ena yaco ena gauna se bera mai? E bula dina tiko na Kalou?

A veikilaitaki au o Mandy vei rau na veiwatini o Horst kei Angelika, rau vukei au meu kila vinaka na Vosa ni Kalou. Au raica ni o ira ga na iVakadinadina i Jiova era vakayagataka wasoma qai vukei ira eso tale mera kila na yaca ni Kalou o Jiova. (Same 83:18; Maciu 6:9) Au vulica tale ga ni vakarautaka na Kalou na sala me rawata kina na kawatamata na bula tawamudu ena parataisi e vuravura. E kaya na Same 37:9: “O ira na dau nuitaki Jiova era na taukena na vuravura.” Au marau sara ga niu kila ni rawa nira marautaka kece na bula qori o ira era muria vinaka na ivakatagedegede ni Kalou ena iVolatabu me baleta na itovo.

Ia e sega ni rawarawa meu veisautaka noqu itovo me salavata kei na ka e tukuni ena iVolatabu. Noqu rawaka ena ivakatagi kei na droini e vakavuna meu dokadoka, ena vinakati gona meu vulica na yalomalumalumu. E sega tale ga ni rawarawa meu biuta na ivalavala vakasisila au muria voli mai ena dua na gauna. Au vakavinavinakataka dina nona yalovosovoso, veinanumi, kei na nona dau kauai o Jiova, vakabibi vei ira era saga ena nodra vinaka kece mera muria na ka e tukuna na iVolatabu.

Au sega ni vakabauta na Kalou qai nanuma ni dodonu me tokoni na veiliutaki vaKominisi me yacova niu yabaki 18. Ia e veisautaki au vakadua na iVolatabu. E vakainaki noqu bula, au sa sega ni leqataka na veigauna se bera mai ena gauna au vulica kina na iVolatabu. Au papitaiso meu iVakadinadina i Jiova ena 1993. Au vakawatitaki Tabitha ena yabaki 2000, keirau lotu vata qai marama yalodina. Keirau solia vakalevu neirau gauna ena nodra vukei eso tale mera kila na iVolatabu. Qori era wili kina e levu era vakataki au, era dau tokona tu e liu na veiliutaki vaKominisi qai sega ni vakabauta na Kalou. Dua na ka noqu marau niu vukei mera kilai Jiova.

Erau sega ni taleitaka na noqu itubutubu niu sa veitokani kei ira na iVakadinadina i Jiova. Ia rau sa qai raica na yaga ni noqu veitokani kei ira na iVakadinadina. Dua na ka noqu marau ni rau sa tekivu wili iVolatabu, rau tiko tale ga ena soqo ni lotu ni iVakadinadina i Jiova.

Keirau marautaka kei Tabitha neirau bula vakawati ni keirau muria vinaka na ivakasala vakaivolatabu me baleta na vakawati. Kena ivakaraitaki, e vaqaqacotaka neirau bula vakawati na ivakasala me keirau yalodina vua na keirau isa.​—Iperiu 13:4.

Au sa sega tale ni lomaocaocataka na bula kei na veigauna se bera mai. Au sa lewena e dua na vuvale e vuravura raraba e tautauvata na ka keimami vakabauta, keimami duavata, qai vakila na vakacegu dina. E sega na veivakaduiduitaki ena vuvale au sa mai lewena. Qori e dua na ka au dau raica vakabibi qai vinakata tu ena noqu bula taucoko.