ULUTAGA LEVU | NA CAVA O KILA ME BALETI LOMALAGI?
O Cei Era Bula tu Mai Lomalagi?
E sega ni cala ke o dau vaqaqa se o cei e bula tu mai lomalagi. E duidui na nodra rai e levu me baleti lomalagi. Eso era vakabauta nira tawani lomalagi tu na vuda qai dodonu mera sokaloutaki. Eso era nanuma ni vanua ni vakacegu o lomalagi, e nodra itikotiko na agilosi kei ira na tamata vinaka era sa mate. Era nanuma eso tale nira tiko mai lomalagi e vica vata na drau na milioni na kalou.
Era kaya e levu nida na sega ni kila na veika me baleti lomalagi, ni se sega ni lesu mai kea e dua me rawa ni tukuna vei keda na kena ituvaki. E cala na rai qori ni a bula tu mai lomalagi o Jisu ni bera ni lako mai vuravura. A tukuna sara ga vei ira na iliuliu ni lotu ena imatai ni senitiuri: “Niu sega ni lako sobu mai lomalagi meu cakava ga na lomaqu, na loma i koya ga e talai au mai.” A sega gona ni vosa vakaveitalia o Jisu ni kaya vei ratou na nona yapositolo: “E levu tu na tikina ena vale nei Tamaqu.”—Joni 6:38; 14:2.
E tamai Jisu o Jiova qai tiko mai lomalagi na nona “vale.” (Same 83:18) Erau rawa ga ni vakamacalataka vinaka na veika e tu mai lomalagi na Kalou o Jiova kei Jisu. Levu na ka vakatubuqoroqoro me baleti lomalagi e vakaraitaki ena raivotu vei ira na tamata yalodina.
O na raica ena ulutaga tarava na veitikinivolatabu e vakamacalataka na veika era raivotutaka eso. Ni o dikeva na raivotu, nanuma tiko ni sega ni dua na ka vakayago e tu mai lomalagi se na veika eda rawa ni raica se tara. Ia ni vakamacalataki lomalagi na Kalou, e sega ni vakayagataka na vosa era kila ga na kabula vakayalo. E vakamacalataka vakarawarawa ena raivotu na veika e tu mai lomalagi, meda rawa ni kila se o cei era tawana tu ‘e levu na tikina’ mai lomalagi.
