E levu na itavi era qarava na Livai era sega ni bete, me vaka na ovisa. E liutaki ira na ivakatawa ni valenisoro. Qo na ka e vola o Philo, e dua na Jiu dauvolaivola, me baleta na nodra itavi: “Eso vei ira [na Livai] era yadrava na katuba ni valenisoro. Eso tale era yadrava na mata ni tikina tabu ni valenisoro mera kua ni curu kina na sega ni vakadonui, ke ra sega mada ga ni nakita. Eso tale era dau wavoki ena valenisoro mera yadrava, era dau veisau yadra ena bogi kei na siga.”

O ira na lewe ni Sanadrini e rawa nira kerei ira na ovisa qori mera vukei ira. Qori duadua ga na ilawalawa Jiu e vakadonuya na matanitu o Roma mera vakaiyaragi.

E vakamacalataka e dua na dauvakadidike o Joachim Jeremias, ni gauna era vesuki Jisu kina na ovisa, e taroga na vuna era sega ni vesuki koya kina ni veivakavulici tiko ena valenisoro (Maciu 26:55). Kena ibalebale, e rawa ga ni taroga qori o Jisu ni kila nira ovisa ni valenisoro. E vakabauta na dauvakadidike qori ni o ira na talai vakavica mera vesuki Jisu era ovisa tale ga. (Joni 7:32, 45, 46) Dua na gauna e muri, e talai na ivakatawa ni valenisoro kei na vica na ovisa mera kauti ratou mai na yapositolo ina Sanadrini. Kena irairai ni o ira na ovisa era yarataki koya tale ga na yapositolo o Paula mai na valenisoro.—Caka. 4:1-3; 5:17-27; 21:27-30.