E YAGA qai bibi na noda cakacaka vakaitalatala. Ia e levu era sega ni doka qori. Ke ra taleitaka mada ga na itukutuku ena iVolatabu, era na sega ni raica ni bibi meda vulica vata na Vosa ni Kalou.

Qori na ka e vakadinadinataka o Gavin, e dau tiko ena soqoni, ia e sega ni via vuli iVolatabu. E kaya: “Au sega ni via vakaraitaka ni lailai noqu kila na iVolatabu. Au qarauna meu kua ni lawakitaki se solia kina noqu dina.” O nanuma ni lako sese o Gavin? Sega! Dikeva mada na yaga ni ivakavuvuli vakaivolatabu vua e dua. E tukuna o Jiova vei ira ena gauna e liu: “Ena mimiri vaka na tegu noqu vosa, ena vaka na miri ni uca ena veico.” (Vkru. 31:19, 30; 32:2) Na ka e kilai kina na tegu e vakaraitaka vinaka na sala eda rawa ni maqosataka kina noda vukei ira na tamata kece ga ena cakacaka vakaitalatala.—1 Tim. 2:3, 4.

E malumu na tegu. E lutu vakamalua na tegu ni kumuni vakalalai na wai ni maliwalala. E “mimiri vaka na tegu” na vosa i Jiova, oya ni vosa vakayalovinaka, vakamalua, e vosa tale ga ena veinanumi vei ira na nona dauveiqaravi. Eda vakatotomuri koya nida doka nona rai e dua tale. Eda uqeti ira na lewenivanua mera vakasamataka na ka era rogoca ra qai vakatulewa. Nida dau veinanumi, ena vakabauti na ka eda tukuna ena laulau tale ga noda cakacaka vakaitalatala.

E veivakacegui na tegu. E veivakacegui noda cakacaka vakaitalatala nida vakasamataka na sala meda uqeta ira kina na tataleitaki. O Gavin sa vakamacalataki oti, e sega ni vakasaurarataki me vulica na iVolatabu. Ia o Chris na tacida e tarogi koya ena imatai ni gauna, e dikeva na duidui sala me marautaka kina o Gavin na veivosaki ena iVolatabu. E vakamacalataka o Chris vei Gavin ni tiko na usutu ni iVolatabu, ke kila qori ena matata vua na soqoni. Oti e tukuna o Chris ni uqeti koya na parofisai me vakabauta kina ni dina na iVolatabu. Rau mani veivosakitaka e vica na parofisai sa vakayacori. E vakacegui Gavin na veivosaki qori mani vakadonuya me vulica na iVolatabu.

E veivakabulabulataki na tegu. E vanua mamaca qai katakata o Isireli, e sega ni tau na uca me vica na vula. Ke sega na tegu, ena malai qai mate na kau. E tukuna o Jiova ni na yaco na dausiga vakayalo nikua. (Emosi 8:11) E yalataka ni o ira na lumuti era “vaka na tegu e solia o Jiova,” nira kacivaka na itukutuku vinaka ni Matanitu ni Kalou, ra qai veitokoni na nodra itokani ‘so tale na sipi.’ (Maika 5:7; Joni 10:16) Vakacava eda vakamareqeta na itukutuku vinaka ni Matanitu ni Kalou me isolisoli i Jiova e veivakabulabulataki?

Na tegu e veivakalougatataki i Jiova. (Vkru. 33:13) E rawa ni veivakalougatataki na cakacaka vakaitalatala vei ira na vakarorogo. E vakadinadinataka qori o Gavin. E saumi nona lomatarotaro ni vulica na iVolatabu. E toso sara me papitaiso, ena gauna qo sa marautaka tiko kei watina o Joyce me rau vunautaka na itukutuku vinaka.

Nida vakasamataka na tegu ena uqeti keda meda vakamareqeta noda cakacaka vakaitalatala. Ena sala cava? Na turu ni wai e sega soti ni yaga, ia nira kumuni vata na vica vata na milioni na mata ni tegu, ena vakasuasuataka na qele. E vaka kina noda cakacaka taudua, ena rairai sega soti ni yaga. Ia nida cakacaka vata na iVakadinadina i Jiova, e vunautaki kina na itukutuku vinaka “ina veimatanitu kece.” (Maciu 24:14) Vakacava ena veivakalougatataki noda cakacaka vakaitalatala? Ena rawa ke vaka na tegu na itukutuku eda kacivaka, e malumu, veivakacegui, e veivakabulabulataki tale ga!