1. Na cava e vakamasuti ira kina na lotu vaKarisito taumada o Paula mera veivakayaloqaqataki vakalevu?

NA CAVA meda veivakayaloqaqataki kina vakalevu? E cavuta na yapositolo o Paula na vuna ena nona ivola vei ira na lotu vaKarisito Iperiu. E kaya vei ira: “Meda dau veinanumi nida veivakauqeti ena loloma kei na caka vinaka, meda kua ni biuta na noda soqoni vata me vaka e nodra ivalavala eso, ia meda veivakayaloqaqataki, vakabibi nida raica ni sa voleka mai na siga.” (Iper. 10:24, 25) Ena loma ga ni lima na yabaki, era raica na Jiu lotu vaKarisito era tiko e Jerusalemi ni sa voleka na “siga i Jiova,” vaka kina na ivakatakilakila e cavuta o Jisu. Sa rawa nira dro mera bula. (Caka. 2:19, 20; Luke 21:20-22) A yaco mai na siga i Jiova qori ena 70 G.V. ni vakayagataki ira na kai Roma na Kalou mera vakarusai Jerusalemi.

2. Na cava e bibi kina nikua meda dau veivakayaloqaqataki?

² Nikua, e tiko na vuna eda vakabauta kina ni sa voleka sara na siga “levu qai vakatubuqoroqoro” i Jiova. (Joeli 2:11) E kaya na parofita o Sefanaia: “Sa voleka na siga levu i Jiova! Sa voleka, sa kusa sara mai!” (Sefa. 1:14) E baleti keda tale ga na  parofisai qori. Me baleta na voleka ni siga i Jiova, e kaya kina o Paula meda “dau veinanumi nida veivakauqeti ena loloma kei na caka vinaka.” (Iper. 10:24, vmr.) E bibi gona meda kauaitaki ira dina na tacida, ena rawarawa kina meda vakayaloqaqataki ira nira vinakata na veivuke.

3. Na cava e tukuna na yapositolo o Paula me baleta na veivakayaloqaqataki? (Raica na imatai ni iyaloyalo.)

³ “Na nuiqawaqawa ni loma ni tamata e lomabibi kina, ia na vosa vinaka ena vakamarautaka.” (Vkai. 12:25) Qori na ka e dau yacovi keda kece. E tiko na gauna eda dau vinakata kina meda vakayaloqaqataki. E tukuna o Paula ni o ira e nodra itavi mera dau veivakayaloqaqataki, ena vinakati tale ga me caka vei ira. E kaya o Paula vei ira na lotu vaKarisito mai Roma: “Au diva meu raici kemuni meu bau vota vei kemuni eso na isolisoli vakayalo moni vakaukauataki kina, se meda veivakayaloqaqataki ena vuku ni noda vakabauta, oya na nomuni vakabauta kei na noqu tale ga.” (Roma 1:11, 12) Io, e vakasakiti na nona dau veivakayaloqaqataki o Paula, ia e vinakati tale ga ena so na gauna me vakayaloqaqataki.—Wilika Roma 15:30-32.

4, 5. O cei eda rawa ni vakayaloqaqataki ira nikua, na vuna?

⁴ E dodonu mera vakacaucautaki na tacida era vakuai ira mera veiqaravi tabu. Kena ivakaraitaki o ira na painia yalodina. Levu sara na ka era vakuai ira kina me rawa nira painia. Era okati tale ga kina na daukaulotu, ira na veiqaravi e Peceli, ivakatawa ni tabacakacaka kei watidra, kei ira na veiqaravi ena valenivolavola tu yawa. Era vakuai ira me rawa nira veiqaravi tabu vakalevu. Ena vinakati gona mera dau vakayaloqaqataki. Vakacava o ira e gu na lomadra mera veiqaravi vakatabakidua, ia sa lailai ga na ka era rawa ni cakava ena vuku ni kedra ituvaki? Io, e bibi mera vakayaloqaqataki tale ga.

⁵ E dodonu mera vakayaloqaqataki na tacida tagane kei ira na yalewa dawai nira via talairawarawa ina ivakaro mera vakawati “ga ena Turaga.” (1 Kor. 7:39) Ena vinakata tale ga o yalewa vakawati gugumatua me vakayaloqaqataki koya o watina. (Vkai. 31:28, 31) O ira na lotu vaKarisito era yalodina tiko ga nira vakacacani, se tauvimate, ena vinakati mera vakayaloqaqataki. (2 Ces. 1:3-5) Erau dau vakacegui ira kece na dausokalou yalodina qori o Jiova kei Karisito.—Wilika 2 Cesalonaika 2:16, 17.

6. Na cava e nodra itavi na qase e cavuti ena Aisea 32:1, 2?

⁶ Wilika Aisea 32:1, 2. O Jisu Karisito e vakayaloqaqataki ira na rarawa kei ira na yalolailai ni vakayagataki ira na tacina lumuti kei na nodra veitokoni na “turaga” era so tale na sipi. E dodonu ga mera cakava qori na qase nira sega ni “lewa” na noda vakabauta, ia era noda “itokani vakacakacaka ga” meda marau kina.—2 Kor. 1:24.

7, 8. Me ikuri ni nodra veiuqeti na qase, na cava tale mera cakava?

⁷ E ivakaraitaki vinaka na yapositolo o Paula. E vola vei ira na lotu vaKarisito era vakacacani mai Cesalonaika: “Ena levu ni neitou lomani kemuni, keitou vakadeitaka me keitou vunautaka vei kemuni na itukutuku vinaka me baleta na Kalou, me keitou solibula tale ga ena vukumuni, ni oni sa rui talei vei keitou.”—1 Ces. 2:8.

⁸ A vakabibitaka o Paula ni sega ni vinakati ga na vosa ni veivakayaloqaqataki, e kaya vei ira na qase ni ivavakoso  mai Efeso: “Moni vukei ira kina na malumalumu, moni nanuma tale ga na vosa ni Turaga o Jisu ni a kaya sara ga: ‘E marau vakalevu o koya e solia na ka, vakalailai o koya e taura na ka.’” (Caka. 20:35) E sega wale ga ni vakayaloqaqataki ira na mataveitacini o Paula, e “vakayagataka” sara ga na ka ‘kece e tu vua.’ (2 Kor. 12:15) Kena ibalebale, era na sega ni veiuqeti se veivakacegui ga na qase, era na kauaitaki ira dina na tacidra.—1 Kor. 14:3.

9. Na cava mera cakava na qase me veivakayaloqaqataki kina nodra ivakasala?

⁹ Na veivakayaloqaqataki e okati tale ga kina na veivakasalataki. Era na muria na qase na ka e tukuni ena iVolatabu me veivakayaloqaqataki kina nodra ivakasala. E ivakaraitaki uasivi ena tikina qo o Jisu ni oti nona mate kei na nona vakaturi. A vinakati mera vakadodonutaki eso na ivavakoso mai Esia Lailai, ia na cava e cakava o Jisu? Ni bera ni vakasalataki ira, e vakacaucautaki ira mada na ivavakoso mai Efeso, Perikamo kei Ceatira. (Vkta. 2:1-5, 12, 13, 18, 19) E kaya ina ivavakoso o Leotisea: “O ira kece au lomana au vunauca, au vakadodonutaka tale ga. O koya gona, mo gumatua qai veivutuni.” (Vkta. 3:19) Io, era na vakatotomuria na qase na ivakaraitaki i Karisito nira veivakasalataki.

10. Na cava eda rawa kece kina ni veivakayaloqaqataki?

¹⁰ E sega ni nodra itavi ga na qase mera dau veivakayaloqaqataki. E uqeti ira kece na lotu vaKarisito o Paula mera tukuna na “vosa ga e vinaka qai veivakayaloqaqataki ena kena gauna, me vinaka” vei ira na rogoca. (Efeso 4:29) Dodonu meda yadrava na “gauna” era vinakata kina na veivuke na tacida. E vakasalataki ira na lotu vaKarisito Iperiu o Paula: “Moni vakaukauataka na liga e wadamele, kei na duru e malumalumu, vakadodonutaka tiko ga na sala e muria na yavamuni, me  kua kina ni veisivi na isema ena tikina e sa malumalumu tu, me vakavinakataki ga.” (Iper. 12:12, 13) O keda kece, wili kina o ira na gone, e rawa ni veivakayaloqaqataki na ka eda tukuna.

11. E vakacegui vakacava o Maca ena gauna e lomabibi kina?

¹¹ A lomabibi ena dua na gauna o Maca * e dua na tacida yalewa. E vola: “Dua na siga niu masulaka tiko meu vakayaloqaqataki, au sotava sara e dua na tacida yalewa itabaqase e kauaitaki au vakayalololoma, na ka sara ga au vinakata tu ena gauna qori. E talanoataka tale ga na veika e sotava ni tautauvata kei na ka au sotava tiko, au sega kina ni galili.” De dua a sega ni kila na tacida yalewa itabaqase qori na yaga ni ka e cavuta vei Maca.

12, 13. Eda na muria vakacava na ivakasala ena Filipai 2:1-4?

¹² Qo na ivakasala i Paula vei ira na lewe ni ivavakoso mai Filipai: “Ni oni veivakayaloqaqataki ena vuku i Karisito, ni oni veivakacegui ena loloma, ni oni veimaliwai vakayalo, ni oni veikauaitaki qai yalovinaka, ni vakamarautaki au sara ena nomuni duavata ena vakasama, ena loloma, ena nomuni lomavata, me tautauvata tale ga na nomuni nanuma. Moni kua ni cakava e dua na ka ena veileti se yalo ni nanumi koya ga, ia moni yalomalumalumu ena nomuni okati ira na kena vo mera uasivi kemuni, ni oni sega ni kauaitaka ga na ka e baleti kemuni, ni kauaitaka tale ga na ka e baleti ira tale eso.”—Fpai. 2:1-4.

¹³ Io, e dodonu meda kauaitaka na ka era vinakata na tacida, meda “veivakacegui ena loloma,” meda “veimaliwai vakayalo,” meda “veikauaitaki qai yalovinaka” tale ga nida veivakayaloqaqataki.

14. Na cava e rawa ni veivakayaloqaqataki?

¹⁴ E rawa ni vakayaloqaqataki keda tale ga nida rogoca nodra yalodina voli o ira eda vukea ena gauna sa oti. Qori na ka e vakadinata na yapositolo o Joni ni vola: “Sega tale ni dua na ka au marautaka vakalevu: niu rogoca nira muria tiko na ka dina na luvequ.” (3 Joni 4) Era vakadinata e levu na painia ni dau veiuqeti na nodra yalodina tiko ga eso era vakavulica ena veigauna sa oti, de dua era sa painia tiko. Io, nida talanoataka vei ira na painia era yalolailai na veika marautaki e rawati, e rawa ni vakayaloqaqataki ira.

15. Eda na vakayaloqaqataki ira vakacava na tacida era veiqaravi ena yalodina?

¹⁵ Era kaya e levu na ivakatawa ni tabacakacaka ni vakayaloqaqataki ira kei watidra na ivola lekaleka ni vakavinavinaka era vola na ivavakoso ni oti nodra veisiko. Qori tale ga na ka era marautaka na qase, daukaulotu, painia kei ira na vuvale e Peceli nira vakavinavinakataki ena nodra veiqaravi ena yalodina.

16. Vakacava e dredre meda dau veivakayaloqaqataki?

¹⁶ Eso era nanuma ni sega ni rawa nira veivakayaloqaqataki baleta nira dau galugalu, ia e sega ni donu na rai qori. E sega ni cakacaka levu na veivakayaloqaqataki, eso na gauna ena vinakati wale ga meda matadredredre nida vakabula. Ke sega ni dredre lesu mai, e rawa ni dusia ni dua tiko na leqa, na nomu vakarogoci koya wale ga e rawa ni veivakacegui.—Jeme. 1:19.

17. E vakacegui vakacava e dua na tacida gone?

¹⁷ Dua na ka na nona rarawa o Henri, e dua na tacida tagane gone nira biuta na  dina na wekana, wili kina o tamana, a qase tu ni ivavakoso. E vakayaloqaqataki koya e dua na ivakatawa ni tabacakacaka, ni rau gole ena sitoa me rau lai gunu kofi, rawarawa kina vei Henri me talaucaka na lomana. E liaca na tacida gone qo ni sala duadua ga e rawa ni vukei ratou kina nona vuvale me ratou lesu mai ena dina, oya me vosota tiko ga ena yalodina. E vakacegui koya vakalevu nona wilika na Same 46; Sefanaia 3:17; kei na Marika 10:29, 30.

18. (a) Na cava e tukuna o Tui Solomoni? (b) Cava e veiuqeti kina na yapositolo o Paula?

¹⁸ E macala mai na nodrau ivakaraitaki o Maca kei Henri ni rawa nida vakayaloqaqataki ira na tacida era vinakata tu na veivuke. E vola o Tui Solomoni: “Na vosa ena gauna donu e yaga dina! Na mata mamarau e vakamarautaka na lomada, na irogo vinaka e vakabulabulataka na sui.” (Vkai. 15:23, 30, vmr.) Kena ikuri, na wiliki ni Vale ni Vakatawa kei na noda website e rawa ni uqeti ira na yalolailai. A vakamacalataka o Paula ni veivakayaloqaqataki tale ga noda lagata vata na sere ni Matanitu ni Kalou. E vola: “Ni veivakavulici, ni veivakayaloqaqataki tiko ga ena same, ena sere ni vakacaucau vua na Kalou, ena sere vakayalo e salavata kei na vakavinavinaka, ni sere vei Jiova mai vu ni lomamuni.”—Kolo. 3:16; Caka. 16:25.

19. Na cava sa qai vinakati ga kina vakalevu meda veivakayaloqaqataki, cava meda cakava?

¹⁹ Sa qai vinakati ga vakalevu meda veivakayaloqaqataki nida raica ni “sa voleka mai” na siga i Jiova. (Iper. 10:25) Me vaka ga e cavuta o Paula vei ira na lotu vaKarisito ena nona gauna, meda “veivakayaloqaqataki tiko, [meda] veivakauqeti, me vaka ga [eda] sa cakava tiko mai.”—1 Ces. 5:11.