ENA yabaki sa oti, vica vata na udolu na tacida tagane e veiyasa i vuravura era lesi mera qase ni ivavakoso kei na dauveiqaravi. Ke o dua vei ira, macala ga ni o sa marautaka tiko nomu itavi dokai ni veiqaravi.

Ena yasana adua, o na via lomaleqa tale ga. E kaya o Jason e dua na qase ni ivavakoso vou, “Gauna au lesi kina, au lomaleqataka na itavi vou au vakacolati kina.” Rau nanuma tale ga o Mosese kei Jeremaia ni sega ni ganiti rau na ilesilesi e solia vei rau o Jiova. (Lako 4:10; Jere. 1:6) Ke o lomaleqataka tiko nomu itavi, cava mo cakava mo toso tiko ga? Dikeva mada na ivakaraitaki i Timoci, e dua na tisaipeli lotu vaKarisito.—Caka. 16:1-3.

A rairai yabaki 20 se sivia o Timoci ena gauna e sureti koya kina na yapositolo o Paula me tomani koya ena cakacaka vakaulotu. Me vaka ni se gone, ena rairai sega sara ni nuidei, qai lomalomarua me qarava nona itavi vou. (1 Tim. 4:11, 12; 2 Tim. 1:1, 2, 7) Ia ni oti e 10 na yabaki, a rawa ni tukuna ina ivavakoso e Filipai o Paula: “Au vakanuinui tiko vua na Turaga o Jisu, meu talai Timoci yani vei kemuni ena dua na gauna lekaleka qo . . . Niu sega tale ni kila e dua . . . me vakataki koya.”—Fpai. 2:19, 20.

Na cava e talei kina nona veiqaravi vaqase o Timoci? Meda dikeva mada e ono na ka eda rawa ni vulica vua.

1. E dau veikauaitaki dina. E kaya o Paula vei ira na mataveitacini mai Filipai: “[O Timoci] ena qarava vinaka na ka e baleti kemuni.” (Fpai. 2:20) Io, e dau veikauaitaki o Timoci. E kauaitaka dina na nodra bula vakayalo na tacina, e tu vakarau tale ga me solia nona gauna ena vukudra.

Kua ni vaka na draiva ni basi e kauaitaka ga me yaco ina ikelekele ni basi ena kena gauna, sega ni kauaitaka nodra vakavodoki na pasidia. Sa 20 na yabaki nona veiqaravi vaqase o William, qo na nona ivakasala vei ira na qase vou: “Lomani ira na mataveitacini. Kauaitaka vakalevu na ka era vinakata mai na kena kauaitaki vakasivia tale na tuvanaki ni ivavakoso.”

2. E vakaliuca na veika vakayalo. Ni vakamacalataki Timoci kei ira na kena vo, e kaya o Paula: “O ira na kena vo era qara ga na ka e baleti ira, era sega ni qara na ka e baleti Jisu Karisito.” (Fpai. 2:21) E volavola tiko o Paula e Roma qai raica ni o ira na tacida tagane e kea era ogataka vakasivia na veika me baleti ira. E vaka ga era nanumi ira ga vakayalo. Ia e duidui o Timoci! Ni basika na ituvaki e rawa kina ni vunau, na nona rai e vakataki Aisea, ni a kaya: “O yau qo! Moni talai au!”—Aisea 6:8.

O na qarava vinaka vakacava nomu itavi vakayalo kei na veika me baleti iko? Kena imatai, me tiko na ka mo dau vakabibitaka. E veiuqeti o Paula: ‘Vakadeitaka na veika era bibi sara.’ (Fpai. 1:10) Mo vakaliuca mada ga na ka e bibi vua na Kalou. Kena ikarua, mo cakava na veiveisau. Mo qarauna na ka e dau taura  vakalevu nomu gauna kei na nomu igu. E vakamasuti Timoci o Paula: “Mo dro tani gona mai na gagadre vakaitabagone, mo vakasaqara ga na yalododonu, na vakabauta, na loloma, na veiyaloni.”—2 Tim. 2:22.

3. E gumatua ena veiqaravi tabu. E uqeti ira mai Filipai o Paula: “Oni kila ni a vakadinadinataka o [Timoci] ni tamata nuitaki ni a vaka na luvequ ena nona tokoni au ena vakatetei ni itukutuku vinaka.” (Fpai. 2:22) E sega ni vucesa o Timoci. E cakacaka vakaukaua me tokoni Paula, erau veivolekati kina vakalevu.

E levu na cakacaka me qaravi ena isoqosoqo i Jiova nikua. E veivakacegui na cakacaka qori, ena vakavolekati iko vei ira na mataveitacini. Me nomu isausau gona mo “dau vakaitavi vakalevu ena cakacaka ni Turaga.”—1 Kor. 15:58.

4. E vakayagataka na veika e vulica. E vola o Paula vei Timoci: “O iko, o sa dau muria vinaka tu mai na noqu veivakavulici, noqu ivakarau ni bula, noqu inaki, noqu vakabauta, noqu vosovoso, noqu loloma, noqu vosota.” (2 Tim. 3:10) Ni muria o Timoci na ka e tuberi kina, e sauva eso tale na itavi bibi.—1 Kor. 4:17.

Vakacava e tiko e dua e dau dusimaki iko vakayalo? Ke sega, vakacava mo raica e dua? E kaya o Tom sa vica na yabaki nona veiqaravi vaqase: “E kauaitaki au e dua na qase ni ivavakoso matua qai vakavulici au vinaka. Au dau taro ivakasala vua, au muria sara. Qori e vakanuideitaki au totolo.”

5. E dau vakarautaki koya. E vakamasuti Timoci o Paula: “Mo vakarautaki iko vinaka me nomu isausau mo qarava na Kalou ena yalodina.” (1 Tim. 4:7) Ena rairai tiko nona dauniveivakavulici e dua na dauqito, ia ena vinakati tale ga me vakarautaki koya. E uqeti Timoci o Paula: “Mo gumatua tiko ga ena wilivola e matanalevu, ena nomu veivakadreti, kei na veivakavulici . . . Vakasamataka vakabibi na ka kece qo, me tara sara na lomamu, mera raica na tamata kece na nomu toso.”—1 Tim. 4:13-15.

E bibi mo vagatara tiko ga na ka o kila. Me kua ni duadua tu ga nomu ivakarau ni bula vakayalo, mo toso vata tale ga kei na nomu kila na ituvatuva ni ivavakoso. Kua tale ga ni nuitaki iko vakasivia, de dua o nanuma ni sa levu na ka o kila, o rawa ni cakava ga na ka o nanuma, o qai sega ni vakekeli. Mo vakatotomuri Timoci, mo “qarauni iko vinaka tiko ga kei na nomu veivakavulici.”—1 Tim. 4:16.

6. E nuitaka na veitokoni ni yalo tabu i Jiova. Me baleta na cakacaka vakaitalatala i Timoci, e uqeti koya kina o Paula: “Mo maroroya na ka talei e nuitaki vei iko ena veidusimaki ni yalo tabu e tiko vei keda.” (2 Tim. 1:14) Me rawa ni maroroya nona cakacaka vakaitalatala, ena vinakati vei Timoci me nuitaka na yalo tabu ni Kalou.

E kaya o Donald sa vicasagavulu na yabaki nona veiqaravi vaqase: “Dodonu mera vakamareqeta na tagane era lesi nodra veiwekani kei na Kalou. Nira cakava qori ‘sa na qai dei ga nodra veiwekani kei koya.’ Ke ra kerea na veidusimaki ni yalo tabu ra qai bucina na kena itovo, ena yaga vei ira na mataveitacini na nodra veiqaravi.”—Same 84:7; 1 Pita 4:11.

E marautaki dina nida raica na nodra toso vakayalo e levu na tacida tagane, wili kina o iko. E kaya o Jason sa cavuti mai cake: “Na gauna au qase kina ni ivavakoso, levu na ka au vulica, au sa qai nuidei ga vakalevu. Au sa marautaka tiko noqu itavi, au raica me ka dokai!”

Vakacava o na toso tiko ga vakayalo? Me nomu isausau mo vuli vei Timoci. Ena yaga vei ira na mataveitacini nomu veiqaravi.