1. Na cava era vinakata kece na dauveiqaravi ni Kalou? Na vuna? (Raica na iyaloyalo ena waqana.)

E VAKAROTI ira nona imuri o Jisu: “Ni lako moni vakavulici ira na lewe ni veivanua kece ga mera tisaipeli.” (Maciu 28:19) Era via kila gona na dauveiqaravi kece ni Kalou na sala mera “vakacavara vinaka” kina na cakacaka vakaitalatala era lesi kina. (2 Tim. 4:5) Na vuna? Ni cakacaka bibi duadua, e yaga vakalevu qai vakatotolotaki. Ia e tiko eso na ka ena vakadredretaka noda vakaitavi vakalevu ena cakacaka qori.

2. Na cava e vakadredretaka meda vakacavara vinaka noda cakacaka vakaitalatala?

² E tu tale eso na itavi bibi ena vinakati kina noda gauna kei na igu. De dua eda cakacaka me vica vata na aua ena dua na siga meda vakarautaka na ka me baleti keda kei na noda vuvale. Ena rairai sega ni rawarawa tale ga meda qarava eso tale na itavi ena vuvale, eda tauvimate, lomabibi, se tatara mai na bula vaqase. Eda rawa ni vakacavara vinaka noda cakacaka vakaitalatala ke da sotava mada ga na ituvaki qori. Ena sala cava?

3. Na cava eda vulica ena vosa i Jisu ena Maciu 13:23?

³ Vakacava ke lailai na gauna eda vakayagataka vei Jiova ena vuku ni keda ituvaki? Kua ni yalolailai. E kila o Jisu ni na sega ni tautauvata na vua ni Matanitu ni Kalou eda rawata. (Wilika Maciu 13:23.) E mareqeta o Jiova na ka kece eda cakava nida qaravi koya ena noda vinaka taucoko. (Iper. 6:10-12) Ia eda na rairai nanuma ni levu tale na ka eda rawa ni cakava ena vuku ni keda ituvaki. Eda na dikeva gona ena ulutaga qo na sala meda vakaliuca  kina noda cakacaka vakaitalatala, meda bula rawarawa, da maqosa tale ga ena vunau kei na veivakavulici. Ia ni bera qori, meda raica mada na ibalebale ni noda vakacavara vinaka noda cakacaka vakaitalatala.

4. Vakamacalataka na ibalebale ni noda vakacavara vinaka noda cakacaka vakaitalatala.

⁴ Na ibalebale ni noda vakacavara vinaka noda cakacaka vakaitalatala, oya nida vakaitavi ena vunau kei na veivakavulici ena kena levu eda rawata. E sega ni okati ga kina na gauna eda vakayagataka. E bibi vei Jiova na inaki ni lomada. Na vuna? Nida lomani Jiova kei ira na kainoda, eda na qarava ena noda vinaka taucoko noda cakacaka vakaitalatala. * (Mari. 12:30, 31; Kolo. 3:23) Eda na cakava qori nida vakuai keda meda qaravi koya ena noda kaukaua kece. Nida mareqeta na itavi dokai ni cakacaka vakavunau, eda na saga ena noda vinaka kece meda wasea na itukutuku vinaka vei ira e levu.

5-6. Eda na vakaliuca vakacava na cakacaka vakavunau ke sega ni levu na gauna eda vakayagataka kina? Vakatauvatana.

⁵ Vakasamataka e dua na cauravou e taleitaka na qiri qita. Ena qiriqiri ena gauna kece e galala kina. Toso na gauna e cakacaka sara ena dua na valenikana me dauqiriqiri ena muanimacawa. Ia e sega ni veirauti na kena isau, e mani cakacaka ena dua na sitoa mai na Moniti ina Vakaraubuka me qaravi ira na volivoli. E levu na gauna e vakayagataka ena sitoa ia e taleitaka vakalevu na qiriqiri. E vinakata me kenadau kina, me nona cakacaka tudei tale ga. Ena qara gona na gauna me qiriqiri kina ke lekaleka mada ga.

⁶ E va tale ga qori na cakacaka vakavunau. Ena rairai sega ni levu na gauna o vakaitavi kina ia o taleitaka vakalevu. O saga gona mo vakavinakataka nomu wasea na itukutuku vinaka me uqeta na lomadra na lewenivanua. Ni o qarava e levu tale na itavi, de dua o na vaqaqa na  sala mo vakaliuca kina na cakacaka vakavunau.

7-8. Eda na vakatotomuria vakacava na rai nei Jisu me baleta na cakacaka vakaitalatala?

⁷ E vakasakiti na rai nei Jisu me baleta na cakacaka vakaitalatala. E bibi duadua vua me wasea na itukutuku ni Matanitu ni Kalou. (Joni 4:34, 35) E taubaletaka gona e drau na maile me vunau vei ira e levu. E saga me vunau e veivale kei na veivanua tale eso. E vakaliuca sara ga na cakacaka vakaitalatala.

⁸ Eda na vakatotomuri Jisu vakacava? Oya nida qara na sala meda wasea kina na itukutuku vinaka ena kena levu eda rawata ena vanua kei na gauna cava ga. Eda na vakuai keda tale ga ena veika eda taleitaka meda vunau kina. (Mari. 6:31-34; 1 Pita 2:21) Eso ena ivavakoso era painia lavotaki, tudei, se painia veivuke. Eso era vulica e dua tale na vosa se ra toki ina vanua e vinakati kina vakalevu na dautukutuku. Ia e dua na iwase levu ni cakacaka vakavunau era qarava na dautukutuku ena ivavakoso. Koya gona, ke levu se lailai na gauna eda rawa ni vakayagataka ena cakacaka vakaitalatala, ena sega ni namaka o Jiova meda cakava na ka eda sega ni rawata. E vinakata ga meda marautaka noda veiqaravi nida wasea na “itukutuku vinaka lagilagi ni Kalou mamarau.”—1 Tim. 1:11; Vkru. 30:11.

9. (a) E cula valelaca o Paula, ia e vakaliuca vakacava na cakacaka vakavunau? (b) E kilai vakacava ena Cakacaka 28:16, 30, 31 na rai nei Paula me baleta na cakacaka vakaitalatala?

⁹ E ivakaraitaki vinaka na yapositolo o Paula ni vakaliuca na cakacaka vakaitalatala. Ena ikarua ni nona ilakolako vakaulotu e Korinica, e lailai nona ilavo mani vakayagataka eso na gauna me cula valelaca. E sega ni vakaliuca na cakacaka qori, ia me tokona ga nona cakacaka vakavunau, me rawa ni vunautaka “wale” na itukutuku vinaka vei ira e Korinica. (2 Kor. 11:7) E daucula valelaca o Paula, ia e vakaliuca tiko ga na cakacaka vakaitalatala qai vunau ena Siga ni Vakacecegu kece. Ni sa veirauti na ka e rawata, e “ogaoga sara . . . ena nona vunautaka na vosa vei ira na Jiu me vakadinadinataka kina ni o Jisu na Karisito.” (Caka. 18:3-5; 2 Kor. 11:9) Dua na gauna e muri ni vesu tu ena nona vale e Roma me rua na yabaki, e vunau vei ira na veisiko yani, e vola ivola tale ga. (Wilika Cakacaka 28:16, 30, 31.) E sega ni vakalaiva o Paula e dua na ka me tarova nona cakacaka vakaitalatala. E vola: “Keitou na sega ni soro . . . ena cakacaka vakaitalatala.” (2 Kor. 4:1) Koya gona, ke da qarava eso tale na cakacaka, se rawa tiko ga nida vakaliuca na Matanitu ni Kalou me vakataki Paula.

10-11. Ke da tautauvimate, eda na vakacavara vinaka vakacava noda cakacaka vakaitalatala?

¹⁰ Ke da sega ni rawa ni vunau e veivale ena vuku ni bula vaqase se tautauvimate, e tiko tale eso na iwalewale ni vunau eda na marautaka. Era dau vunau na lotu vaKarisito ena imatai ni senitiuri ena vanua kece. Era qara na sala mera wasea na ka dina e veivale, e matanalevu, tawalokuci, se vanua ga era “tu kina” na lewenivanua. (Caka. 17:17; 20:20) Ke dredre meda taubale vakabalavu, eda rawa ni dabe ena vanua era tavali kina e levu meda vunau. Rawa tale ga nida vunau tawalokuci, vola ivola, se vunau ena talevoni. E levu na dautukutuku e dredre sara mera veilakoyaki, ia era marautaka  nodra vakaitavi ena iwalewale ni vunau qori.

¹¹ Ke o tautauvimate, se rawa ga ni o vakacavara vinaka nomu cakacaka vakaitalatala. Vakasamataka tale na ivakaraitaki i Paula. E kaya: “Au rawata na ka kece ena vuku i koya e vakaukauataki au.” (Fpai. 4:13) A vinakata o Paula na kaukaua qori ni tauvimate ena dua nona ilakolako vakaulotu. E vakamacalataka vei ira e Kalatia: “Niu a vunautaka vei kemuni na itukutuku vinaka ena imatai ni gauna niu a tauvimate tu.” (Kala. 4:13) Koya gona ke o tautauvimate, se rawa tiko ga ni o wasea na itukutuku vinaka vei ira eso, me vakataki ira na vuniwai, nasi, kei ira na qaravi tauvimate. Levu vei ira qori era cakacaka tiko nira vunau yani na tacida e veivale.

12. Ni tukuna o Jisu me “rawarawa” na matada, cava na kena ibalebale?

¹² E kaya o Jisu: “E cina ni yago na mata. Ke vinaka [se “rawarawa,” vmr.], na matamu ena ramase na yagomu taucoko.” (Maciu 6:22) Na cava e vakaibalebaletaka? E kaya tiko me rawarawa ga noda bula, se meda vakaliuca e dua ga na isausau se inaki qai sega ni vakalaiva e dua na ka me vakawelei keda. E ivakaraitaki vinaka kina o Jisu ni vakaliuca na cakacaka vakaitalatala, e vakavulici ratou tale ga nona tisaipeli me ratou vakaliuca nodratou qaravi Jiova kei na nona Matanitu. Eda vakatotomuri Jisu gona nida “vakaliuca tiko ga na Matanitu ni Kalou kei na nona yalododonu” ena cakacaka vakaitalatala.—Maciu 6:33.

13. Eda na vakaliuca vakacava noda cakacaka vakaitalatala?

 ¹³ Dua na sala eda vakaliuca kina noda cakacaka vakaitalatala, oya nida bula rawarawa. Ena levu kina na gauna meda vukea eso tale mera kilai Jiova, mera lomani koya tale ga. * Kena ivakaraitaki, vakacava eda rawa ni veisautaka noda gauna ni cakacaka meda vunau vakalevu ena lomanimacawa? Eda rawa ni vakalailaitaka eso na ka ni veivakamarautaki ke kania vakalevu noda gauna?

14. Na veiveisau cava rau cakava e dua na veiwatini me rau vunau kina vakalevu?

¹⁴ Qori sara ga na ka e cakava e dua na qase ni ivavakoso o Elias kei watina. E vakamacalataka: “Keirau sega ni rawa ni painia sara, ia keirau cakava eso na veiveisau me keirau vakaitavi vakalevu ena vunau. Kena ivakaraitaki, keirau vakalailaitaka neirau vakayagataki ilavo. Keirau vakalailaitaka na ka ni veivakamarautaki ni kania vakalevu neirau gauna. Keirau kerea tale ga neirau boso me veisau neirau gauna ni cakacaka me keirau vunau kina vakalevu. Qo keirau sa vunau rawa ena yakavi, levu neirau vuli iVolatabu, keirau vunau tale ga vakarua e veivula ena lomanimacawa. Keirau marautaka dina!”

15-16. Me vaka e tukuni ena 1 Timoci 4:13, 15, eda na maqosa vakacava ena vunau? (Raica na Kato “ iSausau Meu Vakacavara Vinaka Kina Noqu Cakacaka Vakaitalatala.”)

¹⁵ Dua tale na sala meda vakacavara vinaka kina noda cakacaka vakaitalatala  oya nida maqosa ena cakacaka vakavunau. Eso na tamata cakacaka era tomana nodra vuli mera kila vinaka nodra cakacaka, mera kenadau kina. E va tale ga qori nida vunautaka na Matanitu ni Kalou. E bibi meda vulica tiko ga na iwalewale meda maqosa kina ena cakacaka vakaitalatala.—Vkai. 1:5; wilika 1 Timoci 4:13, 15.

¹⁶ Eda na maqosa vakacava ena noda cakacaka vakaitalatala? Meda rogoca vinaka na idusidusi e vakarautaki ena soqoni ni Bula vaKarisito kei na Cakacaka Vakaitalatala. E yaga vakalevu na soqoni qori nida na maqosa kina ena cakacaka vakavunau ni toso na gauna. Kena ivakaraitaki, ni vakasalataki ira na gonevuli era vakaitavi o jeameni, eda vulica kina na vakatutu me maqosa noda cakacaka vakaitalatala. Meda muria sara qori nida lai vunau. Eda rawa ni kere ivakasala vua na ivakatawa ni noda iwasewase lailai se cakacaka vata kei koya ena vunau, se dua tale na tacida matua, painia, se ivakatawa ni tabacakacaka. Nida maqosa ni vakayagataka na ka e vakarautaki ena iVukevuke ni Veivakavulici (Teaching Toolbox), eda na marautaka vakalevu noda vunau kei na veivakavulici.

17. Na cava o na vakila ni o vakacavara vinaka nomu cakacaka vakaitalatala?

¹⁷ E ka dokai dina ni vakadonuya na Kalou meda “cakacaka vata” kei koya! (1 Kor. 3:9) Ni o “vakadeitaka . . . na veika era bibi sara” qai vakaliuca na cakacaka vakaitalatala, o na “qaravi Jiova ena marau levu.” (Fpai. 1:10; Same 100:2) Ni o italatala ni Kalou, mo nuidei ni na vakaukauataki iko mo vakacavara se vakayacora vinaka nomu cakacaka vakaitalatala, ke dredre mada ga na ituvaki se vakaiyalayala na ka o rawata. (2 Kor. 4:1, 7; 6:4) Ke levu se lailai na gauna o vakayagataka ena vunau ena vuku ni kemu ituvaki, o na “marau ga . . . vakalevu” ni o sa qarava tiko ena nomu vinaka taucoko nomu cakacaka vakaitalatala. (Kala. 6:4) Ni o vakacavara vinaka nomu cakacaka vakaitalatala, o vakaraitaka ni o lomani Jiova kei ira na kainomu. “Ni o cakava qo o na vakabulai iko kei ira na rogoci iko.”—1 Tim. 4:16.