NA NUIQAWAQAWA e vaka e dua na icolacola bibi e tiko e lomada. (Vkai. 12:25) O sa bau nuiqawaqawa o qai nanuma ni o na sega ni vosota rawa? Levu tale ga era vakila tiko qori, sega ni o iko ga. Levu era qaravi tauvimate tiko, e takali e dua na wekadra voleka, era vakacacani ena leqa tubukoso, se so tale na ituvaki e vakavuna na oca ni yagodra, nodra vakasama, kei na lomadra. Ia eda na vosota vakacava na nuiqawaqawa? *

Eda na vulica e levu na ka meda vosota kina noda nuiqawaqawa nida dikeva na ivakaraitaki nei Tui Tevita. E levu na ituvaki dredre e sotava, e voleka mada ga ni mate ena so na gauna. (1 Sam. 17:34, 35; 18:10, 11) E vosota vakacava o Tevita na nuiqawaqawa? Eda na vakatotomuri koya vakacava?

E vica vata na ituvaki dredre e sotava o Tevita ena dua ga na gauna. Kena ivakaraitaki, vakasamataka nona drovaki Tui Saula tiko ni via vakamatei koya. Ni lesu mai na ivalu kei ira na nona tamata, era kidroa nira butakoca na meca na ka era taukena, vakama nodra vale, ra qai kau vakavesu na lewe ni nodra vuvale. Na cava e cakava o Tevita? “E mani tagi vakadomoilevu o Tevita kei ira na tamata era tomani koya, e oti sara ga na nodra igu ni tagi.” Sa qai kuria ga nona nuiqawaqawa nira “tukuna” nona tamata nuitaki mera “vakaviriki koya ena vatu.” (1 Sam. 30:1-6) E sotava tu qo o Tevita e tolu na ituvaki dredre ena dua vata ga na gauna: E leqataki na nodratou bula nona vuvale, e leqataka nira via vakamatei koya na nona tamata qai vaqarai koya tiko o Tui Saula. Vakasamataka mada na levu ni nona nuiqawaqawa!

Na cava e qai cakava o Tevita? E “vakaukauataki koya ga . . . ena vuku i Jiova na nona Kalou.” E cakava vakacava qori? E dau masuti Jiova me vukei koya, e vakasamataka tale ga vakatitobu nona dau vukei koya o Jiova ena gauna sa oti. (1 Sam. 17:37; Same 18:2, 6) E kila o Tevita ni bibi me dusimaki koya o Jiova, mani tarogi Jiova ena ka me cakava. Ni dusimaki Tevita oti o Jiova e muria sara. Na cava e yaco? E vakalougatataki Tevita kei ira na nona tamata o Jiova mera vakabula na nodra vuvale, era kauta tale ga mai na ka era taukena. (1 Sam. 30:7-9, 18, 19) Vakacava o raica na tolu na ka e cakava o Tevita? E masuti Jiova me vukei koya, e vakasamataka vakatitobu nona vukei koya o Jiova ena gauna sa oti, e muria sara na nona veidusimaki. Eda na vakatotomuri Tevita vakacava? Meda dikeva mada e tolu na sala.

1. Masu. Na gauna kece eda nuiqawaqawa kina, meda kerea na veivuke i Jiova, vaka kina na vuku. Meda talaucaka na nuiqawaqawa ni lomada nida masu vakabalavu vua. Se masu lo vakalekaleka ke rawa, ena gauna eda nuiqawaqawa kina. Na gauna kece eda kerea kina na veivuke i Jiova, eda vakaraitaka nida nuitaki koya me vakataki Tevita, ni kaya: “E noqu uluvatu  o Jiova, e noqu bai kaukaua, o koya tale ga e dau vakabulai au. Noqu Kalou e noqu uluvatu, au dau vakaruru vua.” (Same 18:2) Vakacava e yaga na masu? E kaya o Kahlia e dua na tacida yalewa painia: “Au dau vakila na vakacegu niu masu oti. E yaga na masu meu raica na ka mai na rai i Jiova, meu nuitaki koya tale ga vakalevu.” Io, na masu e dua na isolisoli yaga e vakarautaka o Jiova meda vosota kina na nuiqawaqawa.

2. Vakasama vakatitobu. Ni o raica lesu nomu bula, o bau vakasamataka eso na ituvaki dredre o vosota rawa ga ena veivuke i Jiova? Nida vakasamataka vakatitobu nona dau vukei keda o Jiova kei ira na nona dauveiqaravi ena gauna sa oti, eda na vakila na vakacegu, eda na nuitaki koya tale ga vakalevu. (Same 18:17-19) E kaya e dua na qase ni ivavakoso o Joshua, “Au dau vola na masu e saumi mai. E uqeti au qori meu vakasamataka na gauna au kerea kina vei Jiova eso na ka, e dau vakarautaka sara ga na ka au gadreva.” Io, nida vakasamataka vakatitobu nona dau vukei keda o Jiova ena gauna sa oti, ena uqeti keda meda vosota na nuiqawaqawa.

3. Muria sara. Ni bera nida vakatulewa, meda vakekeli ena Vosa ni Kalou, ni nuitaki sara ga na kena ivakasala. (Same 19:7, 11) Era vakadinadinataka e levu ni gauna era vakekeli kina ena dua na tikinivolatabu, era qai kila na sala mera muria kina ena nodra bula. E kaya e dua na qase ni ivavakoso o Jarrod: “Niu vakekeli, au vulica e levu tale na ka me baleta e dua na tikinivolatabu, e matata vei au na ka e tukuna tiko o Jiova. Au vakabauta na ka au wilika, au muria sara.” Nida qara na veidusimaki i Jiova ena iVolatabu qai muria, eda sa vakarautaki keda vinaka meda vosota na nuiqawaqawa.

E kila o Tevita ni vinakati na veivuke i Jiova me vosota kina na nuiqawaqawa. E vakavinavinakataka vakalevu na veitokoni i Jiova ni kaya: “Ena kaukaua ni Kalou au rawa ni kabata kina na bai. Na Kalou dina e vakaisulutaki au ena kaukaua.” (Same 18:29, 32) Eda na rairai nanuma ni vaka sara ga na bai qori na levu ni ka dredre eda sotava tiko. Ia ena veivuke i Jiova, eda rawa ni vosota na ituvaki dredre cava ga! Io, nida kerea na veivuke i Jiova ena masu, vakasamataka vakatitobu na ka kece sa cakava vei keda, qai muria sara na nona veidusimaki, eda nuidei ni na vakaukauataki keda, ena vakavukui keda tale ga meda vosota na nuiqawaqawa!