1. Na cava meda cakava meda marau kina vakalevu?

 E VINAKATA o Jiova meda marau. Eda kila vakacava qori? Ni okati ena vua ni yalona tabu na marau. (Kala. 5:22) Me vaka ni dau marau vakalevu o koya e solia na ka, vakalailai o koya e taura na ka, eda na marau vakalevu nida gumatua ena cakacaka vakaitalatala qai vukei ira na tacida ena levu na sala.—Caka. 20:35.

2-3. (a) Na cava e rua na ka e tukuni ena Kalatia 6:4 ena uqeti keda meda marau tiko ga? (b) Cava eda na veivosakitaka?

² E rua na ka e vola na yapositolo o Paula ena Kalatia 6:4 ena uqeti keda meda marau tiko ga. (Wilika.) Kena imatai, me noda isausau meda solia vei Jiova na noda vinaka kece. Eda marau nida solia vua na noda vinaka. (Maciu 22:36-38) Kena ikarua, meda kua ni vakatauvatani keda kei ira eso tale. Na ka kece eda rawa ni cakava e vakatau ena noda bulabula, vuli, se taledi, e dodonu meda vakavinavinakataki Jiova kina. Na ka kece e tu vei keda e vu ga mai vua. Ia ke vuavuaivinaka na nodra cakacaka vakaitalatala eso, meda marau nira vakayagataka na nodra taledi mera vakacaucautaki Jiova. Era sega ni vakalevulevui ira kina se mera rawaka kina. Meda vuli gona ena nodra ivakaraitaki, meda kua ga ni qati ira.

³ Eda na veivosakitaka ena ulutaga qo na ka ena vukei keda nida yalolailai ni vakaiyalayala na ka eda rawa ni cakava. Eda na dikeva tale ga na sala meda vakayagataka vinaka kina na noda taledi kei na ka eda vulica vei ira eso tale.

4. Na cava eda dau yalolailai kina? Tukuna e dua na ivakaraitaki.

⁴ E vakaiyalayala na ka era cakava eso na dauveiqaravi i Jiova ena vuku ni bula vaqase se tauvimate. Qori na ka e vakadinadinataka o Carol. Dua na gauna e lai veiqaravi tu ena dua na vanua e vinakati kina vakalevu na veivuke. E 35 nona vuli iVolatabu, e vukea rawa e vica mera toso mera yalayala ra qai papitaiso. E vuavuaivinaka nona cakacaka vakaitalatala o Carol! E qai tauvimate bibi, levu na gauna sa tu ga e vale. E kaya: “Au kila ena vuku ni tauvimate, au sa sega ni cakava rawa na ka era cakava eso tale, au nanuma niu sa sega ni yalodina me vakataki ira. Au sega ni cakava rawa na ka au vinakata, e dredre sara ga meu vosota rawa.” E vinakata o Carol me solia na nona vinaka vei Jiova. Io, e dodonu me vakavinavinakataki! Eda nuidei ni na marautaka na noda Kalou dauloloma na ka e cakava o Carol.

5. (a) Na cava meda nanuma tiko ke vakayalolailaitaki keda na keda ituvaki? (b) Me vaka eda raica ena iyaloyalo, e vakaraitaka vakacava na tacida qo ni solia na nona vinaka vei Jiova?

⁵ Ke o yalolailai ena so na gauna ni lailai na ka o cakava, mo taroga, ‘Na cava e vinakata vei au o Jiova?’ E vinakata mo solia na nomu vinaka, ya na ka o rawa ni cakava ena gauna qo. Vakasamataka mada na ivakaraitaki qo: E yalolailai e dua na tacida yalewa e yabaki 80 vakacaca, ni lailai na ka e rawata ena cakacaka vakaitalatala ni vakatauvatani kei na gauna e yabaki 40 vakacaca kina. Sa solia tiko na nona vinaka, ia e nanuma ni sega ni marautaka o Jiova. Vakacava e dina qori? Kaya mada ke solia na tacida qori na nona vinaka ni yabaki 40 vakacaca, e solia tiko ga na nona vinaka ni sa 80 vakacaca, e sega ni cegu nona solia na nona vinaka. Ke da nanuma ni sega ni marautaka o Jiova na noda veiqaravi, meda kila tiko ni o Jiova ga e vakatulewataka na ka me marautaka. Ke da solia tiko na noda vinaka vei Jiova, ena tukuna vei keda: “Vinaka vakalevu!”—Vakatauvatana Maciu 25:20-23.

6. Na cava eda vulica vei Maria?

⁶ Ena rawarawa meda marau nida kauaitaka ga na ka eda rawa ni cakava ni vakatauvatani kei na ka eda sega ni rawata. Dikeva mada na ivakaraitaki ni tacida o Maria, e tauvi koya e dua na mate, e yalana gona na ka e dau cakava ena cakacaka vakaitalatala. Dua na ka na nona rarawa, e nanuma ni sa sega na kena yaga. Ia e qai vakasamataka e dua tale na tacida yalewa ena ivavakoso sa davo tu ga vakadua ena loga ena vuku ni tauvimate, mani vakatulewataka o Maria me lai vukei koya. E kaya: “Au tuvanaka me keirau vunau ena talevoni, me keirau vola ivola tale ga. Niu lesu mai vale ni oti na neirau cakacaka vata, dua na ka na noqu marau kei na lomavakacegu niu rawa ni vukea na taciqu.” Vakacava o keda? Eda na marau tale ga vakalevu nida kauaitaka ga na ka eda rawa ni cakava, meda kua ni kauaitaka na ka eda sega ni cakava rawa. Ia vakacava ke da rawa ni vakalevutaka noda qaravi Jiova, se da vinaka sara ena so na ka ena noda veiqaravi?

7. Na cava e tukuna na yapositolo o Pita mera cakava na mataveitacini?

⁷ Ena imatai ni nona ivola na yapositolo o Pita e uqeti ira na mataveitacini mera vakayagataka vinaka na nodra isolisoli kei na taledi mera vakayaloqaqataki ira kina  na tacidra. E vola o Pita: “Na isolisoli oni dui rawata, ni vakayagataka ena nomuni veiqaravi me vaka ni oni dauniyau vinaka ni loloma soli wale ni Kalou.” (1 Pita 4:10) Meda kua mada ga ni tu suka ni vakayagataka vinaka na noda taledi qai kua ni leqataka de ra vuvu kina eso se yalolailai. Ke da lomaleqataka qori, eda na sega ni solia vei Jiova na noda vinaka kece.

8. Me vaka e tukuni ena 1 Korinica 4:6, 7, na cava meda kua ni dokadokataka kina na noda taledi?

⁸ E bibi meda vakayagataka vinaka na noda isolisoli se taledi. Ia meda kua ga ni dokadokataka. (Wilika 1 Korinica 4:6, 7.) Kena ivakaraitaki, de dua ena rawarawa mo tauyavutaka na vuli iVolatabu e veivale. Mo vakayagataka vinaka na isolisoli qori! Ia meda nanuma tiko ga meda kua ni dokadokataka. Kaya mada, ena dua na gauna sa oti e vuavuaivinaka nomu vunau, mani tauyavu na vuli iVolatabu. O vinakata mo talanoataka qori vei ira o lai vunau vata. Na gauna oni lai sota vata kina, e talanoataka tiko e dua na tacida yalewa na ka e sotava mani solia e dua na mekesini. E solia o koya na mekesini, ia o iko o tekivutaka na vuli iVolatabu. Na cava o na cakava? O kila ni na uqeti ira sara ga na nomu italanoa, ia o rairai vakatulewataka mo qai talanoataka ena dua tale na gauna veiganiti, me kua ni nanuma na tacida yalewa qori ni sega ni vuavuaivinaka na nona cakacaka. Qori e ka vakayalololoma. Ia me kua ni cegu nomu veisureti ena vuli iVolatabu. Vakayagataka vinaka na nomu taledi!

9. Eda na vakayagataka vakacava na noda taledi?

⁹ Meda nanuma tiko ni noda taledi e isolisoli ni Kalou. Meda vakayagataka qori meda veivakayaloqaqataki ena ivavakoso, meda kua ga ni dokai kina. (Fpai. 2:3) Nida vakayagataka na noda kaukaua kei na taledi meda vakayacora kina na loma ni Kalou, eda na marau. Me kua ni vu ni noda marau na levu ni ka eda rawata, ia eda vinakata ga meda vakacaucautaki Jiova.

10. Na cava meda kua ni vakatauvatani keda kina kei ira eso tale?

¹⁰ Ke da sega ni qarauna, eda rawa ni coriti meda vakatauvatana na ka eda vinaka kina kei na ka e sega ni vinaka kina e dua tale. Kena ivakaraitaki, e totoka nona ivunau e dua na tacida tagane. Qori na ka e vinaka kina. Ena rairai nanuma ni vinaka cake nona vunau vua e dua tale na  tacida e sega ni rawarawa me vunau ena buturara. Ia ena rawa ni vinaka sara na ikarua ni tacida ena so na ka, me vaka nona dau veikauaitaki, nona vakavulici ratou na luvena, se gumatua ena cakacaka vakaitalatala. Eda vakavinavinaka nira vakayagataka e levu na tacida na nodra taledi mera qaravi Jiova kina ra qai vukea eso tale!

11. Na cava meda vakatotomuri Jisu kina?

¹¹ Eda na qarauna meda kua ni vakatauvatani keda kei na so tale, ia ena yaga vei keda nida vuli ena nodra ivakaraitaki ni yalodina. Na ivakaraitaki totoka meda vuli kina o Jisu. E uasivi ia e levu na ka eda na vulica ena nona itovo talei kei na ka e dau cakava. (1 Pita 2:21) Nida saga ena noda vinaka meda vakatotomuria voleka na nona ivakaraitaki, eda na dauveiqaravi vinaka i Jiova, ena vuavuaivinaka tale ga na noda cakacaka vakaitalatala.

12-13. Na cava eda vulica vei Tui Tevita?

¹² E tu ena Vosa ni Kalou na nodra ivakaraitaki e levu na tagane kei na yalewa yalodina era sega ni uasivi, ia eda rawa ni vakatotomuri ira. (Iper. 6:12) Vakasamataki Tui Tevita mada, e tukuna o Jiova ni “donu e lomaqu o koya,” se tukuni ena dua tale na vakadewa ni iVolatabu, “na tamata e dau vakamarautaki au vakalevu.” (Caka. 13:22) E sega ni uasivi o Tevita, e cakava tale ga eso na cala bibi. Ia e ivakaraitaki vinaka vei keda. Na vuna? Ni vakadodonutaki, e sega ni vakaiulubale. E rogoca na veivunauci, e rarawataka na ka e cakava, mani vosoti koya o Jiova.—Same 51:3, 4, 10-12.

¹³ Eda vuli vei Tevita nida taroga: ‘Na cava au dau cakava niu vakasalataki? Au dau liaca totolo noqu cala, seu dau vakaiulubale? E dau totolo noqu veibeitaki? Au dau saga meu kua ni cakava tale na cala qori?’ Mo taroga tale ga qori ni o wilika na kedra italanoa eso tale na tagane kei na yalewa yalodina ena iVolatabu. Vakacava e tautauvata na nodra leqa kei na ka o sotava tiko? Na itovo talei cava era vakaraitaka? Mo taroga tale ga: ‘Au na vakatotomuria vakacava nona yalodina?’

14. Ena yaga vakacava nida vuli vei ira na tacida?

¹⁴ Ena yaga tale ga nida vuli vei ira na tacida gone kei na qase. Kena ivakaraitaki, o rawa ni vakasamataka e dua ena ivavakoso e vosota tiko ena yalodina na  veivakatovolei, de dua na veimurimuri, e tusaqati mai vale, se tauvimate? O raica vua eso na itovo talei o na via vakatotomuria? Ni o dikeva na nona ivakaraitaki vinaka, o na vulica na ka mo cakava mo vosota kina na veika dredre. Eda vakavinavinakataka na nodra ivakaraitaki vinaka ni vakabauta meda vakatotomuria, eda na marau kina!—Iper. 13:7; Jeme. 1:2, 3.

15. Na ivakasala cava e kaya na yapositolo o Paula eda na marautaka kina noda veiqaravi?

¹⁵ E vinakati meda solia yadudua na noda vinaka meda uqeta kina na veiyaloni kei na duavata ena ivavakoso. Dikeva mada na nodra ivakaraitaki na lotu vaKarisito ena imatai ni senitiuri. E duidui na nodra taledi kei na nodra ilesilesi. (1 Kor. 12:4, 7-11) E sega ni kena ibalebale qori mera veisisivi se veiqati. Ia e uqeti ira ga o Paula mera cakava na ka e vinakati “me buli cake kina na yago i Karisito.” E vola o Paula vei ira mai Efeso: “Nira cakava vinaka nodra itavi na veitikiniyago, ena tubu kina na yago taucoko qai vakatubura na loloma.” (Efeso 4:1-3, 11, 12, 16) O ira na muria qori, era uqeta na veiyaloni kei na duavata eda vakadinadinataka ena ivavakoso nikua.

16. Na cava meda vakadeitaka? (Iperiu 6:10)

¹⁶ Meda vakadeitaka mada ga meda kua ni vakatauvatani keda kei ira eso tale. Meda vuli vei Jisu qai gumatua ni vakatotomuria na nona itovo. Me yaga vei keda na nodra ivakaraitaki ni vakabauta ena gauna vakaivolatabu kei na gauna qo. Ni o saga tiko ga mo solia na nomu vinaka kece, mo nuidei ni na “sega ni tawayalododonu na Kalou me guilecava na [nomu] cakacaka.” (Wilika Iperiu 6:10.) Mo marautaka tiko ga nomu qaravi Jiova ni o kila ni marautaka nomu sasaga mo vakamarautaki koya mai vu ni lomamu.