Na vosa bubului e kena ibalebale “e dua na ka bibi e tukuni se vosayalayala me vakayacori e dua na ka, dau cavuti kina na Kalou . . . me ivakadinadina.” E rawa ni tukuni se volai.

Eso era rairai nanuma ni cala na vosa bubului ni tukuna o Jisu: “Ni kua sara ga ni bubului . . . Me ‘Io’ ga na nomu io, me ‘Sega’ na nomu sega, ke dua tale, e sa lako mai vua na vunica.” (Maciu 5:33-37) E kila vinaka o Jisu ni okati ena Lawa e soli vei Mosese eso na bubului, era vosa bubului mada ga na dausokalou yalodina. (Vkte. 14:22, 23; Lako 22:10, 11) E kila tale ga ni o Jiova e vosa bubului. (Iper. 6:13-17) A sega gona ni vakaibalebaletaka o Jisu meda kua sara ga ni vosa bubului. Ia e veivakasalataki tiko meda kua ni vosa bubului ena ka e sega soti ni bibi, se ka e sega ni vakaibalebale. Meda okata me itavi bibi na noda dina ena noda vosa. Meda vakayacora na ka eda tukuna.

Na cava gona mo cakava ke tukuni mo vosa bubului? Kena imatai, vakadeitaka ni o rawa ni cakava na ka o bubuluitaka. Ke o lomalomarua, e vinaka mo kua ni bubului. E veivakasalataki na Vosa ni Kalou: “E vinaka mo kua ni bubului, e ca ni o bubului o qai sega ni vakayacora.” (Dauv. 5:5) Kena ikarua, vakasamataka na ivakavuvuli vakaivolatabu me baleta na vosa bubului qai vakatulewa me salavata kei na nomu lewaeloma e vakavulici. Na cava eso na ivakavuvuli vakaivolatabu qori?

Eso na vosa bubului e salavata kei na loma ni Kalou. Kena ivakaraitaki, era vosa bubului na iVakadinadina i Jiova ena gauna era vakamau kina. E yalataka o yalewa kei tagane vou ena mata ni Kalou kei ira na ivakadinadina, ni rau na veilomani, veimareqeti, rau na veidokai tale ga, rau na cakava qori “ena gauna taucoko [rau] bula tiko kina.” (Eso tale era na rairai sega ni tukuna na vosa vata qori ena gauna era vakamau kina, ia era vosa bubului ena mata ni Kalou.) Oti ena kacivaki sara ni rau sa vakamau, rau na veiwatini tiko ga ena nodrau bula taucoko. (Vkte. 2:24; 1 Kor. 7:39) Na ituvatuva qo e donu, veiganiti, e salavata tale ga kei na loma ni Kalou.

Eso na vosa bubului e veisaqasaqa kei na loma ni Kalou. Na lotu vaKarisito dina ena sega ni cavuta na vosa bubului va qori, me tauri iyaragi me taqomaka na matanitu, se me cakitaka nona vakabauta na Kalou. Ni cakava qori ena beca na lawa ni Kalou. Eda “sega ni vakavuravura” na lotu vaKarisito, eda na sega gona ni vakaitavi ena kena veivosaki kei na ivalu.—Joni 15:19; Aisea 2:4; Jeme. 1:27.

 Eso na vosa bubului e vakatau ena lewaeloma. Eso na gauna, e vinakati meda vakasamataka vinaka na vosa bubului me salavata kei na ivakasala i Jisu meda “solia sara vei Sisa na ka e nei Sisa, vua na Kalou na ka e nona na Kalou.”—Luke 20:25.

Kena ivakaraitaki, kaya mada ke vinakata na lotu vaKarisito me lewenivanua ni dua na matanitu se me dua na nona pasipote, e qai kila ni vinakati me bubuluitaka ni na yalodina. Ena vanua qori na bubului e vauci kina nona cakava na ka e veisaqasaqa kei na lawa ni Kalou, e sega gona ni vakatara nona lewaeloma me vosa bubului. Ia ena rairai vakadonuya na matanitu me veisautaka na vosa ni bubului me salavata kei na nona lewaeloma.

Na muri ni vosa bubului e veisautaki qori e salavata kei na ivakavuvuli ena Roma 13:1, e kaya: “Mera talairawarawa na tamata kece vei ira na iliuliu cecere.” Ena rairai vakatulewataka gona na lotu vaKarisito ni sega ni cala me vosa bubului ena dua na ka sa vakarota oti tu na Kalou me caka.

Meda muria tale ga noda lewaeloma e vakavulici ena iVolatabu ke tukuni meda vakayagataka e dua na iyaya se cakava e dua na ivukivuki ena gauna eda vosa bubului kina. Era dau vosa bubului na kai Roma makawa kei ira na Siciani ena nodra iseleiwau, era kerea kina na kaukaua ni kalou ni ivalu me vakadeitaka nira nuitaki. O ira na kai Kirisi era laveta i lomalagi e dua na ligadra nira bubului. Era vakabauta gona ni tiko na kalou e kila na ka era tukuna, na ka era cakava, era na saumitaro tale ga vua.

E macala ni o koya e qaravi Jiova ena sega ni vosa bubului ena ivakatakilakila ni matanitu e veisemati kei na sokalou lasu. Ia vakacava ke tukuni ena mataveilewai mo biuta na ligamu ena iVolatabu qai bubului mo tukuna na ka dina? Ena ituvaki qori, o na rairai vakadonuya mo cakava, ni tukuni ena iVolatabu nira vosa bubului eso na dausokalou yalodina qai salavata kei na dua na ivukivuki. (Vkte. 24:2, 3, 9; 47:29-31) E bibi mo nanuma tiko ni nomu vosa bubului qori, o vakaraitaka kina ena mata ni Kalou ni o na tukuna na ka dina. Mo tu vakarau gona mo tukuna na ka dina ena taro kece ena rairai tarogi vei iko.

Nida mareqeta noda veiwekani kei Jiova, eda na masulaka qai vakasamataka vakabibi na vosa ni bubului e tukuni meda cavuta, meda vakadeitaka ni na sega ni vakaleqa na noda lewaeloma se veisaqasaqa kei na ivakavuvuli vakaivolatabu. Ke o vakatulewataka mo vosa bubului, mo vakadeitaka mo vakayacora sara.—1 Pita 2:12.