1. Na cava eda saumitaro kina ena soqoni?

 NA CAVA eda tiko kina ena soqoni ni ivavakoso? Na kena inaki bibi, oya meda vakacaucautaki Jiova. (Same 26:12; 111:1) Eda tiko tale ga ena soqoni meda veivakayaloqaqataki ena gauna dredre qo. (1 Ces. 5:11) Nida laveliga meda saumitaro eda sa cakava tiko na rua na tikina qori.

2. Na gauna cava eda rawa ni saumitaro kina ena noda soqoni?

² E veimacawa eda rawa ni saumitaro ena noda soqoni. Me kena ivakaraitaki, ena muanimacawa eda rawa ni saumitaro ena vuli Vale ni Vakatawa. Ena soqoni ena lomanimacawa, eda rawa ni saumitaro ena itavi ni Vakekeli ena Vosa ni Kalou, Vuli iVolatabu ni iVavakoso, kei na so tale na itavi.

3. Na cava ena vakadredretaka noda saumitaro? E yaga vakacava na Iperiu 10:24, 25?

³ Eda vinakata kece meda vakacaucautaki Jiova, meda vakayaloqaqataki ira tale ga na tacida ena vakabauta. Ia eso na ka ena vakadredretaka noda saumitaro. Eda na rairai rere, se da via saumitaro vakalevu qai sega ni digitaki. Na cava ena vukei keda? Eda na raica na isaunitaro ena ka e vola na yapositolo o Paula vei ira na Iperiu. Ni veivosakitaka na bibi ni soqoni e vakabibitaka na “veivakayaloqaqataki.” (Wilika Iperiu 10:24, 25.) Nida kila ni so na mataveitacini era na vakayaloqaqataki nida vakamacalataka noda vakabauta, eda na sega ni rere meda laveliga. Ia ke da sega ni digitaki vakalevu meda marau nira vakamacala eso tale ena ivavakoso.—1 Pita 3:8.

4. Na cava e tolu na tikina eda na veivosakitaka ena ulutaga qo?

 ⁴ Eda na veivosakitaka ena ulutaga qo noda veivakayaloqaqataki ena ivavakoso lalai e sega ni levu era saumitaro. Oti, eda na raica noda veivakayaloqaqataki ena ivavakoso levu era laveliga e levu mera saumitaro. Kena iotioti, eda na veivosakitaka noda veivakayaloqaqataki ena ka eda tukuna nida vakamacala.

5. Eda na veivakayaloqaqataki vakacava ke lailai era tiko ena soqoni?

⁵ Ena ivavakoso se iwasewase lalai, e sega ni levu mera laveliga me digitaka o koya e liutaka na itavi. Eso na gauna, ena rairai wawa vakalailai ni bera ni dua e laveliga. Ena rawa ni vakavucesa na soqoni. Ena sega tale ga ni veivakayaloqaqataki. Cava o rawa ni cakava? Mo tu vakarau mo laveliga vakalevu. Ni o cakava qori o na uqeta eso tale mera vakaitavi vakalevu.

6-7. Na cava mo cakava mo kua ni rere vakalevu ena saumitaro?

⁶ O dau rere ni o vakasamataka tiko mo saumitaro? E levu era dau va qori. Ia mo rawa ni veivakayaloqaqataki, cakava eso na ka mo kua kina ni rere ena vakamacala. O na cakava vakacava qori?

⁷ Ena vinaka mo raica eso na vakatutu ena Vale ni Vakatawa sa tabaki oti. b Kena ivakaraitaki, mo vakavakarau vinaka. (Vkai. 21:5) Na nomu kila vinaka na ka e veivosakitaki ena rawarawa mo laveliga mo saumitaro. Kena ikuri, e rawa ni lekaleka ga nomu saumitaro. (Vkai. 15:23; 17:27) O na sega kina ni rere vakalevu. Na saumitaro leleka, de vinaka me dua se rua ga na iyatuvosa, ena rawarawa vei ira na mataveitacini mera kila ni vakatauvatani kei na ivakamacala balavu e levu kina na vakasama. Mo vakamacala ga ena nomu vosa, me lekaleka, o vakaraitaka ni o vakavakarau vinaka, e matata tale ga vei iko na ka e veivosakitaki.

8. E raica vakacava o Jiova nomu sasaga?

⁸ Vakacava ke o muria eso na vakatutu qori, ia o se rere tiko ga me dua se rua nomu saumitaro? Mo nuidei ni taleitaka o Jiova nomu sasaga mo saumitaro. (Luke 21:1-4) Ni o solia nomu vinaka, sega ni kena ibalebale mo vakararawataki iko. (Fpai. 4:5) Mo kila na ka o rawa ni cakava, me dua nomu isausau mo cakava sara, oti mo masu mo yalodei. Kena irairai, ni isausau qori oya me bau dua mada ga nomu ivakamacala lekaleka.

9. Na cava ena rairai dredre kina na saumitaro ena ivavakoso levu?

⁹ Ke levu na dautukutuku ena nomu ivavakoso, ena rairai dredre mo saumitaro. De dua era laveliga e levu na mataveitacini, o sega kina ni digitaki. Me kena ivakaraitaki, e dau marautaka o Taina me saumitaro ena soqoni. c E raica ni okati ena nona sokalou, e veivakayaloqaqataki kina, e dua tale ga na sala me dei kina na ka dina vakaivolatabu ena nona vakasama. Ia ni toki ena ivavakoso levu, sa sega ni digitaki vakalevu. Eso na gauna e sega mada ga ni digitaki ena  soqoni qori, e kaya “Au rarawa sara ga. E vaka ga e kau tani vei au e dua na itavi bibi. Ia ni sa veitaravi, o sa tekivu veinanuyaka ke nakiti nomu sega ni digitaki.”

10. Na cava mo cakava mo saumitaro kina vakalevu ena soqoni?

¹⁰ Vakacava o dau vakataki Taina? Ke vaka kina, o sa na via soro, mo vakarorogo tu ga ena soqoni. Ia kua sara ni soro. Na cava o rawa ni cakava? Ena vinaka mo vakarautaka tu e vica na isaunitaro ena soqoni kece. Ke o sega ni digitaki ni tekivu na vuli, o rawa ni vakamacala ni toso tiko na soqoni. Ni o vakarautaka tiko na Vale ni Vakatawa Vulici, vakasamataka na veisemati ni parakaravu kei na ka e vakabibitaki ena ulutaga. Ni o cakava qori, o na rawa ni saumitaro ni toso tiko na vuli. Kena ikuri, o rawa ni vakavakarau mo vakamacala ena parakaravu e vakamacalataki kina na veika titobu vakaivolatabu ena rairai dredre me vakamacalataki. (1 Kor. 2:10) Na vuna? Ena rawa ni vica ga era laveliga ena parakaravu qori. Vakacava ke o sa muria e vica na vakatutu qori, o sega ga ni digitaki mo saumitaro ena vica na soqoni. O rawa ni lai raici koya e liutaka na vuli, mo tukuna vua na taro o via sauma.

11. Na cava meda cakava e uqeti keda kina na Filipai 2:4?

¹¹ Wilika Filipai 2:4. Ena veiuqeti ni yalo tabu, e uqeti ira na lotu vaKarisito na yapositolo o Paula mera kauaitaka na ka e baleti ira eso tale. Eda na muria vakacava na ivakasala qori ena soqoni? Meda nanuma tiko nira via saumitaro eso tale me vakataki keda ga.

12. Na cava e dua na sala vinaka meda veivakayaloqaqataki kina ena soqoni? (Raica tale ga na iyaloyalo.)

¹² Vakasamataka mada va qo. Ni o veivosaki tiko kei ira nomu itokani, o na vosa tu ga? Sega! O na vinakata mera vosa tale ga. E va tale ga qori ena gauna ni soqoni, eda vinakata mera saumitaro e levu. Dua na sala vinaka duadua eda rawa ni uqeti ira kina na mataveitacini,  oya noda solia vei ira na galala mera vakamacalataka nodra vakabauta. (1 Kor. 10:24) Meda veivosakitaka mada qo na sala meda cakava kina qori.

13. Na cava mo cakava mera saumitaro e levu tale?

¹³ Kena imatai, me lekaleka ga noda vakamacala, me rawa ni so tale era saumitaro. Mera ivakaraitaki ena tikina qo na qase ni ivavakoso kei ira na dautukutuku matua. Ke lekaleka mada ga nomu vakamacala, kua ni vakamacalataka e levu na ka. Ke o vakamacalataka na ka kece ena parakaravu, sa na sega na ka mera vakamacala kina eso tale. Me kena ivakaraitaki ena parakaravu qo, e rua na vakatutu e tiko kina. Kena imatai me lekaleka nomu ivakamacala, kena ikarua mo kua ni vakamacalataka e levu na ka. Ke o digitaki e liu mo saumitaro ena parakaravu qo, o rawa ni vakamacala ena dua ga na poidi.

14. Na cava e vinakati me rawa nida vakatulewataka na levu ni gauna meda laveliga kina? (Raica tale ga na iyaloyalo.)

¹⁴ Meda yalomatua nida vakatulewataka na levu ni gauna meda saumitaro kina. Ke da laveliga vakalevu, ena rairai leqataka o koya e liutaka na vuli me digitaki keda, ni so mada ga era se sega ni saumitaro. Era na yalolailai kina eso tale ra qai sega ni laveliga.—Dauv. 3:7.

15. (a) Na cava meda cakava ke da sega ni digitaki meda saumitaro? (b) Era na veinanumi vakacava o ira na liutaka na vuli? (Raica na kato “ Ke o Liutaka na Vuli.”)

¹⁵ Ni levu na dautukutuku era laveliga ena gauna ni vuli, eda na rairai sega ni digitaki vakalevu. Eso na gauna ena sega ni digitaki keda o koya e liutaka tiko na vuli. Eda na rarawa kina, ia meda kua ni cudru ke da sega ni digitaki.—Dauv. 7:9.

16. Eda na uqeti ira vakacava era saumitaro?

¹⁶ Ke o sega ni rawa ni saumitaro vakalevu, mo vakarorogo vinaka nira  saumitaro eso tale. O rawa ni vakavinavinakataka nodra saumitaro ni oti na soqoni. Era na uqeti sara ga na mataveitacini ni o vakavinavinakataki ira, me vaka ga nira uqeti ni o saumitaro. (Vkai. 10:21) Nida dau vakavinavinakataki ira na tacida, qori e dua tale na sala eda rawa ni veivakayaloqaqataki kina.

17. (a) E rawa vakacava vei ira na itubutubu mera vukei luvedra mera vakarautaka na isaunitaro veiganiti? (b) Me vaka e vakaraitaki ena vidio, na cava e va na sala me vakarautaki kina na isaunitaro? (Raica tale ga na ivakamacala e ra.)

¹⁷ Na cava eso tale na sala eda rawa ni veivakayaloqaqataki kina ena soqoni? Ke o itubutubu, o rawa ni vukei ratou na luvemu me ratou vakarautaka na isaunitaro e veiganiti kei na yabaki ni nodratou bula. (Maciu 21:16) Eso na gauna, ena veivosakitaki ena gauna ni vuli na veika bibi, me vaka na leqa ni vakawati se na itovo, ia ena rairai tiko e dua se rua na parakaravu e rawa nira vakamacala kina na gone. Kena ikuri, vukei ratou me ratou kila ni ratou na sega ni digitaki ena gauna kece eratou laveliga kina. Nomu vakamacalataka qo era na sega ni rarawa kina nira digitaki eso tale.—1 Tim. 6:18. d

18. Na cava meda cakava me kua ni sivia tale noda vakamacalataki keda nida saumitaro? (Vosa Vakaibalebale 27:2)

¹⁸ Eda rawa kece ni vakarautaka na  ivakamacala veiuqeti ena rokovi kina o Jiova, ena uqeti ira tale ga na tacida lotu vaKarisito. (Vkai. 25:11) Eso na gauna eda na tukuna vakalekaleka eso na ka eda sotava, ia me kua ni sivia tale noda vakamacalataki keda. (Wilika Vosa Vakaibalebale 27:2; 2 Kor. 10:18) Eda na saga meda vakabibitaki Jiova, nona Vosa, kei ira nona dauveiqaravi. (Vkta. 4:11) Ia ke tarogi ena parakaravu meda vakamacalataka noda rai, ena veiganiti meda cakava qori. E dua na kena ivakaraitaki e tiko ena parakaravu e tarava.

19. (a) Na cava ena yaco nida nanumi ira era tiko ena soqoni? (Roma 1:11, 12) (b) Cava o taleitaka ena noda saumitaro ena soqoni?

¹⁹ E sega ni dua na lawa me baleta na saumitaro, ia eda na saga kece me veiuqeti noda ivakamacala. Ena rairai vinakati meda vakamacala vakalevu. Se meda lomavakacegu ke da sega ni saumitaro vakalevu, eda marau ni rawa nira vakamacala eso tale. Nida kauaitaka na ka me baleti ira eso tale ena soqoni ni ivavakoso, eda na marautaka na “veivakayaloqaqataki.”—Wilika Roma 1:11, 12.