1. Na cava e vinakata vei keda o Jiova?

 E DUA na gauna marautaki vei rau na veiwatini ni sucu vou e dua na luvedrau. Rau na mareqeta na gone qori, ia rau na sega ni vinakata me gone dramidrami tu ga. Erau na lomaleqa sara ke sega ni tubu na gone qori. E va tale ga qori nona marau o Jiova nida se qai muri Jisu. Ia e sega ni vinakata meda gone dramidrami tu ga vakayalo. (1 Kor. 3:1) E vinakata meda “tamatabula” vakayalo.—1 Kor. 14:20.

2. Na cava eda na veivosakitaka ena ulutaga qo?

² Na cava e kena ibalebale meda tamatabula vakayalo? Na cava meda cakava meda matua kina? Cava na yaga ni kakana dina vakayalo ena noda tubu? Na cava meda kua ni nuitaki keda kina vakasivia? Eda na veivosakitaka na isaunitaro qori ena ulutaga qo.

NA CAVA NA KENA IBALEBALE MEDA TAMATABULA VAKAYALO?

3. Na cava na kena ibalebale ni dua e tamatabula vakayalo?

³ Ena iVolatabu, na vosa vaKirisi e vakadewataki me “tamatabula” e rawa tale ga ni kena ibalebale na “matua,” “uasivi,” “taucoko.” a (1 Kor. 2:6) Nida tamatabula se matua, eda sa sega ni gone dramidrami tiko vakayago, eda sa tagane se yalewa matua vakayalo. E macala nida sa rawata na isausau qori, eda na saga meda toso tiko ga vakayalo. (1 Tim. 4:15) O keda kece, okati kina o ira na  gone, eda rawa ni tubu meda matua vakayalo. Ia ena kilai vakacava ni dua e matua vakayalo?

4. Ena kilai vakacava na lotu vaKarisito matua?

⁴ Na lotu vaKarisito matua e muria kece na ivakatagedegede ni Kalou, sega ni muria ga na ka e vinakata. Ni sega ni uasivi, ena cala tale ga ena so na gauna. Ia e vakaraitaka ena nona bula e veisiga ni vakasamataka qai cakava na ka e salavata na loma ni Kalou. E sa tokara na tamata vou qai saga tiko ga me vakatotomuria na rai ni Kalou. (Efeso 4:22-24) E vulica me vakatulewa vakayalomatua ni yavutaki ena lawa i Jiova kei na kena ivakavuvuli. Ni vakatulewa, ena saga me muria qori. E sega ni vinakati gona me levu na lawa me lewa na ka me cakava kei na ka me kua ni cakava.—1 Kor. 9:26, 27.

5. Na leqa cava ena sotava o koya e sega ni matua vakayalo? (Efeso 4:14, 15)

⁵ Na lotu vaKarisito e sega ni matua vakayalo ena rawai rawarawa ena “ilawaki” kei na “veivakacalai.” Ena rawa tale ga ni vakabauti ira na tukuna na itukutuku lasu kei ira na vukitani. b (Wilika Efeso 4:14, 15.) Ena rawa tale ga ni dau vuvu, veivala, se rawai ena veitemaki.—1 Kor. 3:3.

6. Ena rawa ni vakatauvatani vakacava na nona tubu vakayalo e dua? (Raica tale ga na iyaloyalo.)

⁶ Me vaka sa vakamacalataki oti mai, na iVolatabu e vakatauvatana na noda tubu vakayalo kei na nona tubu e dua na gone me tamatabula. Ni sega ni yalomatua, e vinakati nona veitaqomaki kei na nona veidusimaki e dua e qase cake. Me kena ivakaraitaki, ena rairai tukuna e dua na tina vei luvena me taura toka na ligana ni rau takoso e gaunisala. Ni sa qase cake o gone, ena rawa ni laiva o tinana me takoso ga vakataki koya. Ia ena tukuna tiko ga vua me dau rai ena yasana imawi kei na imatau. Ni sa uabula, ena rawa ni takoso ga vakataki koya. Me vaka ga na nodra vinakata na gone mera vukei vei ira na uabula mera taqomaki kina, o ira tale ga na lotu vaKarisito era sega ni matua e vinakati  mera vukei vei ira na lotu vaKarisito matua mera taqomaki kina vakayalo mera vakatulewa tale ga vakayalomatua. Ia nira vakatulewa na lotu vaKarisito, era dau vakasamataka e liu na ivakavuvuli vakaivolatabu mera kila kina na rai nei Jiova ra qai muria sara.

7. Era dau vinakata tale ga na veivuke na lotu vaKarisito matua?

⁷ Kena ibalebale ya ni sega sara ga ni vinakata na veivuke na lotu vaKarisito matua? Sega. Ena dau kere veivuke tale ga ena so na gauna. O koya e sega ni matua vakayalo ena rairai vinakata me tukuni vua na ka me cakava se na ka me vakatulewataka. Na lotu vaKarisito matua ena kerea nodra veivuke eso tale, ia e kila ni namaka o Jiova me na ‘colata ga na nona icolacola.’—Kala. 6:5.

8. Sala cava erau na duidui kina na lotu vaKarisito matua?

⁸ E duidui na kedra irairai na uabula, e duidui tale ga na nodra itovo vakayalo na lotu vaKarisito matua me vaka na vuku, yaloqaqa, lomasavu, kei na veikauaitaki. Kena ikuri, ni tautauvata na ituvaki rau sotava e rua na lotu vaKarisito, ena rairai duidui na ka rau vakatulewataka ia ena yavutaki ga ena ivakavuvuli vakaivolatabu. Vakabibi na ka e vauca na lewaeloma. Ni rau kila tiko qori, rau na sega ni vakalewa na duidui ni nodrau vakatulewa, rau na saga tiko ga me rau duavata.—Roma 14:10; 1 Kor. 1:10.

NA CAVA MEDA CAKAVA MEDA MATUA KINA VAKAYALO?

9. Vakacava e tu tu ga eda sa matua vakayalo? Vakamacalataka.

⁹ Nida se gone eda na tubu ga ni toso tiko na gauna. Ia e sega ni dua e tu tu ga sa matua vakayalo, ena vinakati me sasaga tiko ga. Me kena ivakaraitaki, era rogoca na mataveitacini mai Korinica na itukutuku vinaka, era papitaiso, e sobuti ira na yalo tabu, era vuli tale ga vakalevu ena ka e vakavulica na yapositolo o Paula. (Caka. 18:8-11) Ia ni oti e vica na yabaki na nodra papitaiso, e levu era se sega tiko ga ni matua vakayalo. (1 Kor. 3:2) Na cava meda cakava me kua kina ni berabera noda matua vakayalo?

10. Na cava meda cakava meda matua vakayalo? (Juta 20)

¹⁰ Meda matua vakayalo e bibi me vu sara ga mai lomada na noda vinakata meda matua. O ira na “taleitaka tiko na yalowai” era na sega ni matua, qori o ira na gone dramidrami vakayalo. (Vkai. 1:22) Eda sega ni vakataki ira na uabula era vakararavi tiko ga vei ira na nodra itubutubu mera vakatulewa ena vukudra. Ia e noda itavi yadua meda saga meda matua vakayalo. (Wilika Juta 20.) Ke da saga meda matua vakayalo, meda masuti Jiova me vukei keda ‘me kua nida vinakata wale ga, me tiko tale ga vei keda na kaukaua meda cakava sara ga.’—Fpai. 2:13.

11. Na ivukevuke cava ena vukei keda meda matua kina? (Efeso 4:11-13)

¹¹ E sega ni namaka o Jiova meda saga vakataki keda meda matua vakayalo. E vakarautaki ira mai na ivakatawa kei na qasenivuli ena ivavakoso vaKarisito mera vukei keda meda “tamatabula” vakayalo, ya “meda yacova taucoko sara na ivakarau ni bula i Karisito.” (Wilika Efeso 4:11-13.) E vakarautaka tale ga na yalona tabu me vukei keda me tiko vei keda na “rai i Karisito.” (1 Kor. 2:14-16) Kena ikuri, e vakarautaka na va na  Kosipeli meda kila kina na rai i Jisu, na ka e tukuna, kei na ka e cakava ena nona cakacaka vakaitalatala e vuravura. Nida vakatotomuria na nona rai kei na ka e cakava, ena rawa nida rawata na noda isausau meda matua vakayalo.

NA YAGA NI KAKANA DINA VAKAYALO

12. Na cava na “ivakavuvuli rawarawa me baleti Karisito”?

¹² Me rawa nida matua vakayalo, meda kua ni kila ga na “ivakavuvuli rawarawa me baleti Karisito,” qo na ka eda tekivu vulica me baleti Karisito. Eso na ivakaraitaki me baleta na ivakavuvuli rawarawa qori e okati kina na veivutuni, vakabauta, papitaiso, kei na veivakaturi. (Iper. 6:1, 2) Na ivakavuvuli qo era vakabauta na lotu vaKarisito kece. Oya na vuna e tukuna kina na yapositolo o Pita na ivakavuvuli qori ni vunau tiko vei ira na ilala levu ena Penitiko. (Caka. 2:32-35, 38) E bibi meda vakabauta na ivakavuvuli rawarawa qori meda tisaipeli i Karisito. Kena ivakaraitaki e tukuna o Paula, ni o koya e sega ni vakabauta na ivakavuvuli ni veivakaturi e cata na ivakavuvuli vaKarisito kece. (1 Kor. 15:12-14) E vinakati gona meda kila na veika titobu ni ka dina, kua ni kila tiko ga na ivakavuvuli rawarawa.

13. Na cava meda cakava me yaga vei keda na kakana dina vakayalo e tukuni ena Iperiu 5:14? (Raica tale ga na iyaloyalo.)

¹³ Na cava na veibasai ni ivakavuvuli rawarawa? Oya na kakana dina vakayalo, okati kina na lawa i Jiova kei na nona ivakavuvuli eda na kila kina na nona rai. Me yaga vei keda na kakana qori, e bibi meda vulica na Vosa ni Kalou, vakasamataka vakatitobu qai muria sara. Nida cakava qori, eda sa vulica tiko meda vakatulewataka na ka e vakamarautaki Jiova. c—Wilika Iperiu 5:14.

14. E vukei ira vakacava mai Korinica o Paula mera matua?

¹⁴ E ka ni sasaga vei ira na sega ni matua nira sotava na ituvaki e vinakati kina mera vakasamataka na ivakavuvuli vakaivolatabu. Ke sega ni dua na kena lawa vakaivolatabu, era na rairai  nanuma eso mera cakava ga na ka era vinakata. Eso tale era taroga ke tiko eso na kena lawa. Kena ivakaraitaki, era rairai tarogi Paula na lotu vaKarisito e Korinica ke tiko e dua na lawa e vauca na nodra kania na kakana e cabori ena matakau. A sega ni tukuna vei ira o Paula na ka mera cakava, ia e vakamatatataka ga ni tiko na nodra “galala ni vakatulewa” me yavutaki ena nodra lewaeloma. E cavuta tale ga eso na ivakavuvuli vakaivolatabu ena rawa ni yaga ena nodra vakatulewa me kua ni ca kina na nodra lewaeloma, mera kua tale ga ni vakatarabetaka e dua. (1 Kor. 8:4, 7-9) A vukei ira gona o Paula mera toso vakayalo me rawa nira vakayagataka na nodra vakasama, ia mera kua ni vakararavi tu ga vei ira eso tale se qara na kena lawa.

15. E vukei ira vakacava na lotu vaKarisito Iperiu o Paula mera toso vakayalo?

¹⁵ Eda vulica e dua na ka bibi ena ka e vola o Paula vei ira na lotu vaKarisito Iperiu. Eso era sega ni toso tiko vakayalo; era sa “via gunu sucu tale, [era] sega ni vinakata na kakana dina” vakayalo. (Iper. 5:12) Era sega ni vulica tiko ga na ka dina e vakavulici ena ivavakoso. (Vkai. 4:18) Kena ivakaraitaki, levu na Jiu lotu vaKarisito era se vakabibitaka tiko ga na Lawa e soli vei Mosese ni sa oti mada ga e rauta ni 30 na yabaki na kena bokoca na lawa qori na isoro i Karisito. (Roma 10:4; Taito 1:10) Ena loma ni 30 na yabaki qori, e dua na gauna levu mera veisautaka kina na nodra rai na lotu vaKarisito Jiu. O koya e wilika na ivola uqeti vakalou i Paula vei ira na Iperiu, ena kaya ni tiko kina na kakana dina vakayalo. Qori e yaga sara ga vei ira na lotu vaKarisito me vakaukauataka na nodra vakabauta ena ituvatuva vou ni sokalou vaKarisito, e vukei ira tale ga mera vunau tiko ga nira veitusaqati na Jiu.—Iper. 10:19-23.

KUA NI NUITAKI IKO VAKASIVIA

16. Na cava meda cakava me ikuri ni noda matua vakayalo?

¹⁶ E vinakati na sasaga meda kua wale ga ni matua ia meda dei kina. E bibi  gona meda kua ni nuitaki keda vakasivia. (1 Kor. 10:12) E vinakati meda “dikevi [keda] tiko ga” meda toso kina vakayalo.—2 Kor. 13:5.

17. E laurai vakacava vei ira e Kolosa ni vinakati mera matua tiko ga?

¹⁷ Na nona ivola o Paula vei ira e Kolosa, e vakabibitaka tale mera matua tiko ga vakayalo. Nira sa matua vakayalo na lotu vaKarisito qori, e vakasalataki ira mera kua ni vakacalai ena rai ni vuravura. (Kolo. 2:6-10) O Epafira e kilai ira vinaka na ivavakoso qori, e masulaki ira wasoma mera “tudei” se matua. (Kolo. 4:12) Cava eda vulica? Rau kila o Paula kei Epafira me rawa nira matua e Kolosa, e vinakati na nodra sasaga yadua kei na veitokoni ni Kalou. Rau vinakata mera matua tiko ga se tamatabula vakayalo ni dredre mada ga na veika era sotava.

18. Na cava e rawa ni yaco vei ira na lotu vaKarisito matua? (Raica tale ga na iyaloyalo.)

¹⁸ E vakasalataki ira na Iperiu o Paula ni rawa sara ga ni sega ni vakadonui ira tale na Kalou. Ke ra sega ni talairawarawa vei Jiova ena dredre na nodra veivutuni me vosoti ira na Kalou. E vinaka nira sega ni cakava qori na Iperiu. (Iper. 6:4-9) Ia vakacava o ira na malumu tu vakayalo nikua se o ira na vakasivoi ra qai veivutuni? Na nodra veivutuni ena yalomalumalumu e vakaraitaka nira duidui sara vei ira e volatukutukutaka o Paula. Ia nira lesu vei Jiova era vinakata na nona veivuke. (Isik. 34:15, 16) Era na rairai tuvanaka na qase ni ivavakoso me dua na tacida matua me vukei ira mera kaukaua tale vakayalo.

19. Na cava me nomu isausau?

¹⁹ Ke o sasaga tiko mo lotu vaKarisito matua, o rawa ni sauva na isausau qori! Mo kania tiko ga na kakana dina vakayalo qai vakatotomuria sara vakavoleka na rai nei Jiova. Ke o sa matua tiko vakayalo, mo dei tiko ga mo rawa ni tamatabula vakayalo me tawamudu.