O SE nanuma na siga marautaki duadua ena nomu bula? Na siga ni nomu vakamau se sucu na nomu ulumatua? Se na siga o yalataka kina nomu bula vei Jiova ena nomu papitaiso? Qori e rairai siga bibi duadua, e siga marautaki tale ga. Era marau tale ga na tacimu vakayalo mera raica na ivakadinadina ni nomu lomana na Kalou ena lomamu taucoko, nomu vinaka taucoko, nomu vakasama taucoko, kei na nomu kaukaua taucoko!—Mari. 12:30.

Io, o marautaka vakalevu nomu qaravi Jiova me tekivu ena siga o papitaiso kina. Ia na cava e seavu kina nodra marau eso na dautukutuku? Na cava meda marautaka tiko ga kina noda qaravi Jiova?

E dodonu meda marautaka na vosa ni yalayala i Jiova ni na vakarusa na ituvaki ca qo meda bula ena vuravura vou. E vakadeitaka tale ga vei keda na Sefanaia 1:14: “Sa voleka na siga levu i Jiova! Sa voleka, sa kusa sara mai!” Ia ni dede tale noda wawa ena rawa ni vakaseavutaka noda marau, ena vakaluluqataka tale ga noda qarava na Kalou.—Vkai. 13:12.

Nida veimaliwai kei ira na tamata ni Kalou ena uqeti keda meda marautaka tiko ga noda qaravi Jiova. Na nodra itovo vinaka na dauveiqaravi i Jiova e rairai uqeti keda ina sokalou dina, meda marautaka tale ga noda veiqaravi. (1 Pita 2:12) Ia vakacava ke vakadodonutaki e dua na lotu vaKarisito ni sega ni muria na ivakatagedegede ni Kalou? Ena ituvaki qori, o ira e rawa era lako mai ena dina ena vuku ni nodra itovo vinaka na dauveiqaravi i Jiova e rawa nira yalolailai se rarawa.

E rawa ni vakaseavutaka tale ga noda marau na itukutuku ni veivoli ni vuravura i Setani. E vinakata na Tevoro meda vakabauta ni bibi meda taukena na ka e sega ni yaga. Ia meda nanuma tiko na vosa i Jisu: “E sega ni dua e rawa ni qarava e rua na turaga, ni na cata e dua qai lomana e dua, ena doka e dua qai beca e dua. Dou sega ni rawa ni qarava na Kalou kei na iYau.” (Maciu 6:24) Ena sega ni rawa nida marautaka noda qaravi Jiova, da qai saga meda vutuniyau ena vuravura qo.

O ira na lomani Jiova era na raica ni sega ni icolacola bibi nodra qaravi koya. (1 Joni 5:3) Nanuma na ka e kaya o Jisu: “Ni lako mai vei au o kemuni kece oni oca, oni bikai voli ena icolacola bibi, au na vakacegui kemuni. Ni mai cola na noqu ivua moni vuli vei au, niu yalomalumalumu, au yalomalua tale ga, oni na kunea kina na vakacegu. E veivakacegui na noqu ivua, e mamada tale ga na noqu icolacola.” (Maciu 11:28-30) E veivakacegui qai marautaki na noda icolacola na lotu vaKarisito meda veivakatisaipelitaki. Eda marautaka sara ga noda qaravi Jiova. Meda raica mada e tolu na vuna meda ‘marautaka kina na Kalou na noda ivakabula.’—Apak. 3:18.

Eda qarava na Kalou mamarau, na Vunibula. (Caka. 17:28; 1 Tim. 1:11) Eda kila ni buli keda na Dauveibuli. Koya gona, meda marautaka tiko ga noda qaravi koya, se mani vakacava na dede ni noda papitaiso.

Kena ivakaraitaki o Héctor, e 40 na yabaki nona veiqaravi vakaivakatawa dauveilakoyaki. Ni “sa qase” mada ga se bulabula vinaka tiko ga. (Same 92:12-14) Ni tauvimate o watina, e lailai kina na ka e cakava ena nona veiqaravi, ia e sega ga ni vakaseavutaka na nona marau. E kaya: “Au rarawa ni sa malumalumu tiko ga o watiqu, e sega ni rawarawa tale ga na qaravi koya, ia au saga tiko ga meu marautaka noqu qarava na Kalou dina. Niu kila ni vakavuna o Jiova noqu bula, e vakainaki nona buli keda, oya na vuna meu lomani koya vakalevu qai qaravi koya mai vu ni lomaqu. Au saga meu vakaitavi tiko ga ena vunau, meu vakasamataka tiko ga noda inuinui me kua kina ni seavu noqu marau.”

E vakarautaka o Jiova na ivoli meda rawa ni marautaka na bula. Io, “na levu ni nona lomani vuravura na Kalou e solia kina na Luvena e duabau ga e bulia, mera kua ni rusa kina o ira na vakaraitaka nodra vakabauti koya, mera rawata ga na bula tawamudu.” (Joni 3:16) E rawa kina ni vosoti noda ivalavala ca, eda rawa tale ga ni bula tawamudu nida vakabauta na ivoli i Jisu e vakarautaka vakayalololoma na Kalou. Vakacava eda marautaka qori? Nida vakavinavinakataka na ivoli, ena uqeti keda meda marautaka noda qaravi Jiova.

E kaya e dua na tacida tagane mai Mexico o Jesús: “Au sa bobula ena noqu cakacaka, ena so na gauna au cakacaka vakaveitaravi ena lima na gauna ni cakacaka, dina mada ga ni sega ni  dodonu meu cakava. Au cakava qo me levu kina noqu ilavo. Toso na gauna au vulica na veika me baleti Jiova, ni solia na Luvena lomani ena vukuda na kawatamata. Au vinakata sara ga meu qaravi koya. Au mani yalataki au vei Jiova, au vakatulewataka meu cegu mai na kabani au cakacaka tu kina me 28 na yabaki meu veiqaravi vakatabakidua. Qori na itekitekivu sara ga ni noqu marautaka na noqu veiqaravi vei Jiova.”

E vakavumarau na ka eda vuataka, e sega ni vakavurarawa. O se vakasamataka nomu bula ni bera ni o kilai Jiova? E kaya na yapositolo o Paula vei ira na lotu vaKarisito e Roma, nira “bobula ina ivalavala ca” ia era sa “bobula ina ivalavala dodonu.” Sa laurai na vuadra ena nodra “yalosavasava” e rawati kina na bula tawamudu. (Roma 6:17-22) Eda muria tale ga na ivakarau ni bula savasava, eda galala mai na rarawa e vakavuna na itovo dukadukali kei na ivalavala kaukaua. E dodonu meda marau!

Kena ivakaraitaki o Jaime, e sega ni vakabauta na Kalou, e vakabauta na bula vakaidewadewa, e dau veivacu tale ga. E tekivu gole ina soqoni vaKarisito, e uqeti koya nodra veikauaitaki e kea. Me biuta na nona ivakarau makawa, ena vinakati me kerei Jiova me vukei koya me vakabauti koya. E kaya o Jaime: “Au sa qai kila vakalalai ni bula tiko na Tamada dauloloma, e Kalou dauveivosoti. E taqomaki au niu muria na ivakatagedegede savasava i Jiova. Keu sega ni veisau, de dua au sa mate tale ga me vaka eso noqu itokani dauveivacu. E gauna marautaki duadua ena noqu bula na noqu qaravi Jiova.”

Nida waraka me vakarusai na ituvaki ca qo, na cava meda cakava tiko? Kua ni guilecava nida “kakaburaki ena inaki vakayalo” eda na “tamusuka na bula tawamudu.” Ia “meda kua gona ni soro ena caka vinaka, nida na tamusuka ena kena gauna ke da sega ni vakacauoca.” (Kala. 6:8, 9) Ena veivuke i Jiova, eda rawa ni vosota meda gumatua ni vakaitovotaka na itovo e vinakati meda bula sivia kina na “veivakararawataki levu,” da qai marautaka tiko ga noda qaravi Jiova, ena gauna mada ga ni veivakatovolei.—Vkta. 7:9, 13, 14; Jeme. 1:2-4.

Eda nuidei ni rawa ni vakaicovitaki na noda vosota, ni kila na Kalou na noda cakacaka kei na loloma eda vakaraitaka vua kei na yacana. Ke da marautaka tiko ga noda qaravi Jiova, eda na vaka na daunisame o Tevita, e kaya: “E dei tu ga e mataqu o Jiova. Ni tu e ligaqu imatau o koya, au na sega vakadua ni yavalati. E marau vakalevu na lomaqu, e marau na yagoqu taucoko. Au tikovinaka tale ga.”—Same 16:8, 9.