AU SUCU ena 1926 ena koro o Crooksville, Ohio mai Merika. Rau sega ni daulotu o Ta kei Na, ia rau dau uqeti keitou na le walu na gone me keitou lai lotu. Au gole ina Lotu Wesele. Niu yabaki 14, e vakaicocovitaki au na italatala niu sega ni calata na lotu ena Sigatabu me dua na yabaki.

Ena gauna vata qori, e sikovi tinaqu o Margaret Walker, e dua keitou tiko veitikivi, e iVakadinadina i Jiova. E vakamacalataka vei tinaqu na iVolatabu. Dua na siga, au nanuma meu dabe meu rogoci rau. A nanuma o tinaqu niu na vakasosa ena gauna ni vuli, e mani tukuna meu lako i tuba. Ia au saga tiko ga meu rogoci rau. Ni oti e vica na veisiko, e tarogi au o Margaret, “O kila na yaca ni Kalou?” Au sauma, “Eda kila kece qori—na Kalou.” E kaya, “Kauta mai nomu iVolatabu, cega na Same 83:18.” Au qai kila ni yaca ni Kalou o Jiova. Au cici e tuba meu tukuna vei ira noqu ilala, “Ni dou gole i vale, cega na Same 83:18 ena nomudou iVolatabu qai raica na yaca ni Kalou.” Au sa tekivu vunau sara tiko ga.

 Au vulica na iVolatabu qai papitaiso ena 1941. Oti ga vakalailai, au lesi meu liutaka na soqoni ni vulivola ni ivavakoso. Au uqeti tinaqu kei ratou na taciqu me ratou mai soqoni, ratou mani tiko ena soqoni kece ni vulivola au liutaka. Ia e sega ni bau kauai o Ta.

Levu tale na itavi au lesi kina ena ivavakoso, au saga tale ga me dua na noqu vata ni ivola ni isoqosoqo. Dua na siga e dusia o Ta na noqu ivola kece qai tukuna: “O sa raica na ivola kece qo? Au sega ni via raica tale eke, au sega tale ga ni via raici iko eke.” Au mani toki me dua noqu rumu ena dua na koro voleka o Zanesville, Ohio, ia au dau sikovi ratou e vale meu vakayaloqaqataki ratou.

E saga o tamaqu me tarovi Na me kua ni soqoni. So na gauna ni biubiu o Na me gole ina soqoni, ena cicimuri koya qai kauti koya i vale. Ena curu ena dua tale na katuba me gole ina soqoni. Au tukuna vei Na: “Kua ni leqataka. Ena oca ga mai o Ta.” Toso na gauna, e soro o Ta, e rawarawa vei Na me gole ina soqoni.

Ena 1943, tekivu vakayacori ena ivavakoso na Koronivuli ni Vuli Vunau, au vakaitavi tale ga kina. Na ivakasala au rogoca ni oti noqu itavi, e uqeti au meu vakavinakataka noqu vosa.

Era sa tekivu veivaluvaluti na veimatanitu ena iKarua ni Valu Levu. Ena 1944, au kacivi meu lewena na mataivalu. Au gole ina keba o Fort Hayes mai Columbus, Ohio, meu dikevi vakavuniwai qai vakalewe fomu. Au tukuna vei ira na vakailesilesi ni mataivalu ni na sega ni rawa meu sotia. Ratou mani laivi au. Ni oti e vica na siga, e gole mai vale e dua na vakailesilesi, e kaya: “Corwin Robison, qo na kemu waradi mo sa na vesu.”

Ni oti e rua na macawa, e tukuna o turaganilewa: “Ke vakatau vei au, au na lewa mo bala e valeniveivesu ena nomu bula kece. Vakacava, dua na ka o via tukuna?” Au sauma sara: “Kemuni na Turaganilewa, au dua wale ga na italatala. Na katuba kece au vosa kina e noqu itutunivunau, au sa vunautaka tale ga na itukutuku vinaka vei ira e levu.” E tukuna na turaganilewa vei ira era lesi mera rogoca na veilewai: “Oni sega ni lako mai ke moni vakatulewataka se italatala na cauravou qo se sega. Nomuni itavi ga moni vakatulewataka ke via lewena na mataivalu.” Ni oti ga e rauta ni 20 na miniti, ratou vakatulewataka niu cala. E tauca na turaganilewa na kequ itotogi meu lima na yabaki ena valeniveivesu levu mai Ashland, Kentucky.

Rua na macawa noqu tiko ena valeniveivesu mai Columbus, Ohio, au tiko ga ena noqu sela ena imatai ni siga. Au masuti Jiova: “Au sega ni rawa ni tiko eke me lima na yabaki. Au sega ni kila na ka meu cakava.”

Ena siga tarava, era tukuna vei au na ovisa ni valeniveivesu meu wavoki mada. Au gole sara vua e dua na kaivesu e turaga balavu qai raba. Keirau vakararai tu e tuba. E tarogi au  sara, “Cava o mai cakava eke?” Au sauma, “Au dua na iVakadinadina i Jiova.” E kaya, “O dina? O mai tu vakacava eke?” Au kaya vua, “Keimami sega ni vakaitavi ena ivalu se dau veivakamatei na iVakadinadina i Jiova.” E kaya, “Era biuti iko e valeniveivesu ni o sega ni veivakamatei. Ia era biuta eso e valeniveivesu nira veivakamatei. Sa veicalati sara ga!” Au kaya, “Io.”

E tukuna sara, “Au curu ena dua tale na valeniveivesu me 15 na yabaki, au wilika eso na nomudou ivola.” Au masuti Jiova sara: “Yalovinaka Jiova me tokoni au mada ga na turaga qo.” Ena gauna vata qori, e tukuna sara o Paul, na yaca ni turaga ya: “Ke dua e sagai iko, mo kaila mai. Au na vukei iko.” Ia au veimaliwai vinaka kei ira na 50 na kaivesu, sega ni dua na leqa e yaco.

Niu toki ena valeniveivesu i Ashland, au qai kila nira tiko tale ga e kea e vica na taciqu matua vakayalo. E uqeti au kei na vica tale na neitou veimaliwai, me keitou kaukaua tiko ga vakayalo. Eratou lesia me keitou wili iVolatabu e veimacawa, keitou vakarautaka tale ga na veitarotarogi ena soqoni e vakatokai na Bible Bees. E lesi tale ga e dua me qarava na mape. Keitou tiko ena dua na bure levu e kabi e lalaga na idavodavo. E tukuna vei au na tacida e qarava na mape: “Robison, nomu na idavodavo ya kei na kena ya. Na itaukei ni idavodavo e nomu yalava. Mo vakadeitaka mo vunau vua ni bera ni biubiu.” Qori na sala e tuvanaki kina na neimami vunau.

Ena 1945, e oti kina na iKarua ni iValu Levu, ia au tiko ga e valeniveivesu. Au leqataki ratou e vale ni kaya o Tamaqu, “Keu sa rawa ni cemuri iko, ena rawarawa sara meu lewai ratou na kena vo.” Niu suka mai valeniveivesu, dua na ka noqu kurabui. E veitusaqati o Ta, ia eratou tiko ena soqoni na vitu na lewe ni noqu vuvale, sa papitaiso tale ga e dua na ganequ.

Ni tekivu ena 1950 na ivalu mai Korea. Au kacivi ena ikarua ni gauna meu ripote ina keba mai Fort Hayes. Ni caka oti e dua na veitarogi, e tukuna e dua na vakailesilesi, “Levu duadua na kemu maka vei ira na nomu iwasewase.” Au tukuna vua, “Vinaka, ia au na sega ni lewena na mataivalu.” Au cavuqaqataka na 2 Timoci 2:3 qai tukuna, “Au sa sotia rawa tu  i Karisito.” E galu vakabalavu qai kaya, “Sa rawa ni o gole.”

Oti ga vakalailai, au tiko sara ena nodra bose na via veiqaravi e Peceli ena soqo ni tikina mai Cincinnati, Ohio. Tukuna o Brother Milton Henschel ke dua e via cakacaka vakaukaua ena vuku ni Matanitu, ena rawa ni lesi koya na isoqosoqo e Peceli. Au vakalewena sara na kena fomu, au sureti ina Peceli e Brooklyn ena Okosita 1954. Qori sara ga na vanua au veiqaravi kina.

E sega ni oti rawa na cakacaka e Peceli. Vica vata na yabaki noqu cakacaka ena taqe ni waikatakata ena vanua ni tabaivola kei na ofisi, au daunimisini, au ripeataka tale ga na loka. Au vakaitavi tale ga ena tara ni Vale ni Soqoni Lelevu ena Siti o Niu Yoka.

Au taleitaka vakalevu na ituvatuva vakayalo e Peceli, me vaka noqu tiko ena sokalou e veimataka, na vulici vakavuvale ni Vale ni Vakatawa kei na noqu tomani ira na ivavakoso ena cakacaka vakaitalatala. Nida vakasamataka, qori na ka e dodonu me caka ena vuvale kece ni iVakadinadina i Jiova. Nira dikeva vata na itubutubu kei ira na gone na tikinivolatabu ni veisiga, era Sokalou Vakavuvale wasoma, ra qai vakaitavi ena soqoni ena ivavakoso kei na vunautaki ni itukutuku vinaka, era na bulabula kece vakayalo.

Levu dina noqu itokani e Peceli kei na ivavakoso. Eso era lumuti, era sa rawata na nodra icovi vakalomalagi. Eso era sega ni lumuti. Ia era sega ni uasivi kece na dauveiqaravi i Jiova, wili kina na lewenivuvale e Peceli. Keu veileqaleqati kei na dua na taciqu, au na saga me keirau veiyaloni. Au vakasamataka na Maciu 5:23, 24 kei na sala meda walia kina na duidui e basika. E sega ni rawarawa na kere veivosoti, ia e dau wali na leqa ni caka qori.

Sega ni rawarawa meu lai vunau e veivale niu sa qase, ia au sega ni soro. Au vulica vakalailai na vosa vakaJaina na Mandarin, meu rawa ni vunau vei ira na kai Jaina ena salatu. Eso na mataka, au solia e 30 se 40 na mekesini vei ira na tataleitaki.

 E dua mada ga noqu veisikovi lesu mai Jaina! Dua na siga, e matadredredre mai e dua na goneyalewa ni veisoliyaka tiko na itukutuku ni veivoli me baleta na vanua e rawa ni voli kina na vuata. Au dredre vua, au solia na Vale ni Vakatawa kei na Yadra! ena vosa vakaJaina. E taura sara, e tukuna ni yacana o Katie. Me tekivu ena siga ya, ni raici au o Katie, ena gole mai me keirau veitalanoa. Au vakavulici koya ena yaca vakavalagi ni vuata kei na kakana draudrau qai vakamuria niu cavuta vakavalagi. Au vakamacalataka tale ga vua na iVolatabu, e taura na ivola Kaya na iVolatabu. Ni oti e vica na macawa, keirau sega ni sota.

Ni oti e vica na vula, e taura na noda mekesini e dua tale na goneyalewa e dau veisoliyaka na itukutuku ni veivoli. Ena macawa tarava, e solia vei au nona talevoni qai kaya, “Mo vosa i Jaina.” Au tukuna vua, “Au sega ni kila e dua mai Jaina.” Ia e cikevi au tiko ga, au mani taura na talevoni, au kaya, “Ni bula, qo o Robison.” E vosa sara mai: “Robby, qo o Katie. Au sa tu tale qo i Jaina.” Au kaya, “Mai Jaina?” Sauma o Katie, “Io. Robby, o kila na goneyalewa e solia vei iko na talevoni? Qori na taciqu. Levu na ka vinaka au vulica vei kemuni. Yalovinaka ni qai vakavulici koya tale ga.” Au kaya sara, “Katie, au na saga ena noqu vinaka taucoko. Vinaka vakalevu nomu tukuna mai na vanua o sa tiko kina.” Oti ga vakalailai, au sega ni qai sotava tale na taci Katie. Au sega ni kila na vanua rau tu kina, au nuitaka ga ni rau na tomana nodrau vulici Jiova.

Rauta ni 73 na yabaki na noqu qaravi Jiova. Au marau ni vukei au o Jiova meu tawaveitovaki qai yalodina e valeniveivesu. Ratou tukuna na taciqu e vale ni vakayaloqaqataki ratou noqu sega ni soro ni veitusaqati o Ta. E papitaiso o Na kei ratou na ono na taciqu. Sa sega ni qai veitusaqati o Ta, e tiko mada ga ena so na soqoni ni bera ni takali.

Ke inaki ni Kalou, eratou na vakaturi na lewe ni noqu vuvale kei ira na itokani era sa takali mera bula ena vuravura vou. Sa na bau marautaki mada ga meda sokaloutaki Jiova kei ira eda lomana ena veigauna se bera mai. *