EDA dau vinakata meda marautaka na bula. Ia ena iotioti ni veisiga qo, eda na vakatovolei kece ena “ka dredre.” (2 Tim. 3:1) Ena caka vei keda na veika tawadodonu, eda na tauvimate, sega na cakacaka, lolosi, se so tale na ituvaki ena vakavu nuiqawaqawa kei na yalolailai, ena rawa ni vakaseavutaka noda marau. Era dau yalolailai mada ga na dauveiqaravi ni Kalou qai oti nodra marau. Ke o vakila tiko qori, na cava mo cakava mo marau tale kina?

Meda sauma na taro qori, e vinakati meda kila na ibalebale ni marau dina, kei na sala era marau tiko ga kina eso nira vakatovolei. Eda na vulica tale ga na ka meda cakava me kua kina ni seavu noda marau.

Meda kua ni nanuma ni marau e tautauvata kei na nona dau mamarau e dua se ivakarau ni yalona. Kena ivakaraitaki: Ni sivia na ka e gunuva na daumateni, ena rawa ni levu nona dredre. Ia ni oti na mateni, sa na sega tale ni dredre, sa lomabibi me vaka ga e liu qai levu nona leqa. E lekaleka ga nona marau, ia e sega ni marau dina.—Vkai. 14:13.

Na marau dina e vu sara ga mai lomada. E dusia na “marau ni yaloda e vu mai na noda rawata se kila nida na rawata e dua na ka vinaka.” Na marau qo ena dei tu ga se mani vinaka se ca na ituvaki. (1 Ces. 1:6) De dua e lomaleqataka tiko eso na ka, ia e marau tu ga. Kena ivakaraitaki, eratou warolaki na yapositolo ni ratou kacivaka na itukutuku me baleti Karisito. Oti qori eratou “biubiu mai na matadra na Sanadrini. Dua na ka nodratou marau ni vakadonuya na Kalou me ratou vakacacani ena vuku ni yaca i Jisu.” (Caka. 5:41) E macala ni ratou sega ni marautaka nodratou warolaki. Ia ni ratou qaravi Jiova, eratou marau ni ratou yalodina tiko ga.

Eda sega ni sucu kaya mai na itovo qori, se me tutu ga eda sa vakaitovotaka. Na vuna? Na marau dina e okati ena vua ni yalo tabu. Ena veitokoni ni yalo tabu, eda na tokara kina “na tamata vou,” wili kina na marau. (Efeso 4:24; Kala. 5:22) Nida bucina gona na marau, eda na vosota na veika dredre.

E vinakata o Jiova me yaco e vuravura na veika vinaka, sega ni ka ca eda raica e veisiga. Ia na nodra ivakarau ca e levu, e sega ni vakaseavutaka na nona marau. E kaya na Vosa ni Kalou: “E tiko ena nona itikotiko na kaukaua kei na reki.” (1 Vei. 16:27) Kena ikuri, na veika vinaka era vakayacora na nona dauveiqaravi e “vakamarautaka na [lomana].”—Vkai. 27:11.

Dua na sala eda na vakatotomuri Jiova kina, oya meda kua ni lomaleqataka vakasivia ni sega ni yaco na ka eda nanuma. Me kua ni seavu na noda marau, e vinakati meda dau vakasamataka na ka vinaka eda vakalougatataki kina ena gauna qo, meda  vosovoso tale ga ni waraka na veika vinaka sa tu e matada. *

E volai tale ga ena iVolatabu na nodra ivakaraitaki e levu era marau tu ga nira vakatovolei. A vosota o Eparama na ituvaki ririkotaki kei na leqa era vakavuna eso tale. (Vkte. 12:10-20; 14:8-16; 16:4, 5; 20:1-18; 21:8, 9) E rawa vakacava ni marau tiko ga o Eparama ena gauna dredre qori? A matata vua na inuinui me bula ena vuravura vou ena veiliutaki ni Mesaia. (Vkte. 22:15-18; Iper. 11:10) E kaya o Jisu: “Dua na ka nona vakanuinui tu na tamamuni o Eparama me raica noqu gauna.” (Joni 8:56) Meda vakatotomuri Eparama mada ga nida vakasamataka vakatitobu na marau e tu e matada.—Roma 8:21.

Me vakataki Eparama, rau dau vakasamataka na yapositolo o Paula kei na nona itokani o Sailasa na vosa ni yalayala ni Kalou. E dei vinaka tu na nodrau vakabauta, rau marau tale ga ni rau sotava na veika ca. Kena ivakaraitaki, ni rau kuitataki oti rau qai bala i valeniveivesu, erau “masu rau qai vakacaucautaka na Kalou ena sere” ena “lomaloma ni bogi.” (Caka. 16:23-25) Kena ikuri, erau marau tale ga o Paula kei Sailasa ni rau vakararawataki ena vuku i Karisito. Meda vakatotomuria mada ga na nodrau ivakaraitaki nida dau vakasamataka na veika vinaka e vu mai na noda qarava na Kalou nida yalodina.—Fpai. 1:12-14.

Levu na tacida nikua era ivakaraitaki vinaka nira marau tiko ga ena gauna era vakatovolei kina. Kena ivakaraitaki, ena Noveba 2013, ni ravuta na Yatu Filipaini na Cagilaba o Haiyan, e vakacacani kina na nodra vale e sivia ni 1,000 na tacida. E kaya o George, e vakacacani vakadua na nona vale ena korolevu o Tacloban: “Era marau tu ga na mataveitacini ni yaco na veika dredre. E dredre meu vakamacalataka na levu ni neimami marau.” Na gauna e yaco kina na veika dredre, eda na marau tiko ga nida dau vakasamataka na veika e vakarautaka vei keda o Jiova da qai vakavinavinakataki koya. Na cava tale e vakarautaka o Jiova eda marautaka?

E dua na vuna levu meda marau kina nida veivolekati kei na Kalou se vakaevei? Vakasamataka mada: Eda kila na Turaga Cecere ni lomalagi kei na vuravura. E Tamada, e noda Kalou, e noda iTokani tale ga!—Same 71:17, 18.

Eda mareqeta tale ga na isolisoli ni bula kei na noda rawa ni marautaka. (Dauv. 3:12, 13) Eda kila na inaki i Jiova nida nona ibulibuli vuku qai vagolei keda mai. (Kolo. 1:9, 10) E vakainaki kina noda bula, e dusimaki vinaka tale ga. Ia e levu nikua era sega tu ni kila na inaki dina ni noda bula. E vakabibitaka o Paula na duidui qori ni vola: “‘E sega ni raica na mata, e sega ni rogoca na daliga, e sega tale ga ni bucini ena loma ni tamata na ka sa vakarautaka tu na Kalou vei ira na lomani koya.’ E qai vakatakila ga vei keda na Kalou na ka kece qo ena yalona tabu.” (1 Kor. 2:9, 10) Vakacava eda marautaka nida kila na inaki i Jiova?

Vakasamataka na cava tale sa cakava o Jiova vei ira na nona tamata. Vakacava eda marau ni vosoti na noda ivalavala ca? (1 Joni 2:12) Ena yalololoma ni Kalou, eda nuitaka kina na vuravura vou sa voleka. (Roma 12:12) Ena gauna mada ga qo, e vakarautaka o Jiova e dua na mataveitacini era duavata. (Same 133:1) E vakadeitaka tale ga na nona Vosa ni o Jiova e dau taqomaki ira na nona tamata vei Setani kei ira na nona timoni. (Same 91:11) Nida dau vakasamataka vakatitobu na ka kece e vakalougatataki keda kina na Kalou, eda na marau kina vakalevu.—Fpai. 4:4.

Vakacava ena rawa ni marau vakalevu na lotu vaKarisito? E kaya o Jisu: “Au tukuna vei kemudou na ka qo me rawa ni dou vakila kina na marau au vakila tiko, mo dou marau tale ga kina vakalevu.” (Joni 15:11) E laurai eke ni rawa nida marau vakalevu. O rawa ni vakatauvatana nomu sasaga mo vakalevutaka nomu marau kei na vakawaqa buka. E vinakati mo utura tale yani me caudre se katakata kina. E va tale ga qori na noda marau, e vinakati meda kana tiko ga vakayalo. Nanuma tiko: Ena rawati ga na marau ena veitokoni ni yalo tabu. O na marau gona vakalevu, ni o kerea wasoma na veitokoni ni yalo tabu ni Kalou, vakasamataka vakatitobu na nona Vosa qai masulaka.—Same 1:1, 2; Luke 11:13.

O na marau tale ga vakalevu ni o vakaitavi ena cakacaka e marautaka o Jiova. (Same 35:27; 112:1) Na vuna? Nida buli meda “doka na Kalou dina, [meda] muria nona ivakaro, ni qo na itavi taucoko ni tamata.” (Dauv. 12:13) Eda buli tale ga meda vakayacora na loma ni Kalou. Koya gona nida qaravi Jiova, eda na marautaka vakalevu na noda bula. *

Nida bucina na marau vakalou, eda na vakila e levu tale na kena yaga. Kena ivakaraitaki, ena marautaka na Tamada vakalomalagi nida qaravi koya ena marau se mani vakacava na levu ni noda leqa. (Vkru. 16:15; 1 Ces. 5:16-18) Nida marautaka tale ga noda veiqaravi, eda na cata kina na domodomoiyau, ia eda na vakuai keda ena levu na ka me baleta na Matanitu ni Kalou. (Maciu 13:44) Nida vakadinadinataka na kena yaga, eda na marau vakalevu, eda na lomavakacegu, era na marau tale ga kina e levu.—Caka. 20:35; Fpai. 1:3-5.

“Ke o marautaka tiko qo na bula, o lomavakacegu tale ga, ena vinaka nomu bula ena veigauna se bera mai.” Qori na ka e vola e dua na daunivakadidike ena Univesiti e Nebraska, Merika, ni dikeva tale eso na ka me baleta na bula. Qo e salavata kei na ka e tukuni ena iVolatabu: “Na yalomamarau e wai vinaka.” (Vkai. 17:22) Io ni o dau mamarau, o na bulabula kina.

Nida bula donuya na gauna dredre, eda rawa ni bucina na marau tawavakaiyalayala nida kerea na yalo tabu, vulica qai vakasamataka vakatitobu na Vosa i Jiova. Eda na marau tale ga vakalevu nida vakasamataka vakatitobu na ka eda vakalougatataki kina ena gauna qo, vakatotomuria nodra vakabauta eso tale, meda saga tale ga ni vakayacora na loma ni Kalou. Eda na vakadinadinataka na Same 64:10: “Ena marautaki Jiova vakalevu na yalododonu qai vakaruru vua.”