Au sucu ena siti o Quebec, ena yasana o Quebec e Kenada, e vosataki kina na vosa vakaVaranise. Rau susugi au na noqu itubutubu o Louis kei Zélia, rau dauloloma, rau yalovinaka. E dau mamadua o ta, e taleitaka vakalevu na wilivola. Au taleitaka vakalevu na volavola, au vinakata gona meu dauvolaitukutuku ena dua na gauna.

Niu sa yabaki 12 toka, e gade mai vale e dua na turaga erau cakacaka vata kei ta o Rodolphe Soucy, kei na dua tale na nona itokani. Erau iVakadinadina i Jiova. Au sega ni kilai ira vinaka na iVakadinadina i Jiova, au sega ni kauai sara ena nodra lotu. Ia au qoroya dina na nodrau sauma vinaka na taro ni rau vakayagataka na iVolatabu. Rau taleitaka sara ga qori na noqu itubutubu, rau mani vakadonuya me keitou vulica na iVolatabu.

Au se vuli tiko ena gauna qori ena koronivuli ni Katolika. Ena so na gauna, au dau vakamacalataka vei ira na noqu lewenikalasi na ka au vulica ena iVolatabu. Dua na gauna, era rogoca na neimami veivosaki na bete era qasenivuli tiko. Era sega mada ga ni vakayagataka na iVolatabu me vakacala na ka au tukuna, ia dua vei ira e qai beitaki au e matadra na lewenikalasi niu gone be! Au lomaleqa sara ga, ia e mani tini vinaka na ka e yaco qori niu kila kina ni veisaqasaqa na ka e tukuna iVolatabu kei na ivakavuvuli ni lotu e koronivuli. Au kaya meu sa kua ni vuli e keri. Rau vakadonuya na noqu itubutubu me veisau na noqu koronivuli.

Au tomana noqu vulica na iVolatabu, ia e berabera na noqu toso vakayalo niu rere na  lai vunau e veivale. E dau vosayaco na Lotu Katolika, e tusaqata tale ga na cakacaka vakavunau. E cakacaka voleka kei na Lotu Katolika e dua na iliuliu ni politiki e Quebec o Maurice Duplessis. E tokona gona e dua na ilala ena nodra vakacacani na iVakadinadina i Jiova. E vinakati dina na yaloqaqa meda vunau ena gauna ya.

E vukei au e dua na tacida tagane o John Rae meu kua ni rere. E tuvaitutu mai Kiliati ena ikaciwa ni kalasi. E kenadau ena cakacaka vakavunau o John, e yalomalua, e yalomalumalumu, e torovi rawarawa tale ga. E sega ni dau vakadodonutaki au vakalevu, ia e uqeti au ga na nona ivakaraitaki vinaka. E dredre vei John me vosa vakaVaranise, au tomani koya gona vakalevu ena vunau niu kila vinaka na vosa qori. Noqu dau veimaliwai vakalevu kei John, au mai dua kina na iVakadinadina i Jiova. Ni oti e tini na yabaki mai na gauna au kilai ira kina na iVakadinadina i Jiova, au sa qai papitaiso ena ika26 ni Me, 1951.

E levu na painia era lewena na neitou ivavakoso lailai ena siti o Quebec. E uqeti au na nodra ivakaraitaki vinaka meu painia tale ga. Ena gauna ya, keimami se vunau e veivale ni vakayagataki ga na iVolatabu. Ni sega na ivola, keimami vulica me keimami kenadau ena vakayagataki ni iVolatabu. Au saga gona meu kila vinaka na tikinivolatabu meu wasea kina na ka dina. Ia levu era sega ni via wilika mada ga na iVolatabu e sega ni vakadonuya na Lotu Katolika.

Au vakamau kei Simone Patry ena 1952, e dua na tacida yalewa yalodina e kea. Keirau toki sara i Montreal, e dua sara na luvei keirau yalewa o Lise ena loma ga ni dua na yabaki. Ni bera ni keirau vakamau, sa cegu na noqu painia, ia keirau saga tiko ga vakaveiwatini me keirau bula rawarawa me rawa ni keitou vakaitavi vakalevu ena ivavakoso.

Ni oti e tini na yabaki, au sa qai vakasamataka tale meu painia. Ena 1962, au a lai vuli vula dua ena Koronivuli ni Cakacaka Vakaitalatala ni Matanitu ena Peceli e Kenada, au rumu vata kei na dua na tacida tagane o Camille Ouellette. E vakavuvale tale ga o Camille, e uqeti au vakalevu na nona gumatua ena cakacaka vakaitalatala. Ena gauna qori, e vica wale ga na mataveitacini e Quebec era painia, era vakaluveni tale ga. Qori sara ga e nona isausau o Camille. E uqeti au ena gauna ni vuli  meu vakasamataka na kequ ituvaki. Ni oti e vica na vula, au kila niu sa rawa ni painia tudei tale. So era vakataroga ke ka vakayalomatua na noqu vakatulewa, ia au toso ga, au nuidei ni na vakalougatataka o Jiova na noqu sasaga meu painia.

Ena 1964, keirau lesi vakaveiwatini me keirau painia lavotaki ena neirau tauni o Quebec. Keirau veiqaravi e keri me vica na yabaki. Toso vinaka sara na vunau ena gauna qori, ia era se veitusaqati tiko ga eso.

Au a vesu ena dua na yakavi ni Vakarauwai e Sainte-Marie, e dua na tauni lailai e sega sara ni yawa mai na siti o Quebec. E kauti au ena siteseni e dua na ovisa, e balati au e loma ni valeniveivesu niu vunau e veivale ni sega na kena ivolatara. Oti qori, au kau vua e dua na turaganilewa o Baillargeon, e dau cudrucudru. E tarogi au: “O cei na nomu loya?” Au kaya vua: “O Glen How.” * O Glen e dua na loya kilai levu, e iVakadinadina Jiova. Ni rogoca ga o turaganilewa na yaca i Glen, vaka e lomaleqa, qai kaya: “Segai! Kua ni o ka qori!” E dau kilai o Glen How ena gauna ya ni dau valataka na nodra kisi na iVakadinadina i Jiova. E mani tukuna vei au na mataveilewai ni sa talaci kece na noqu kisi.

E dredre ni vaqarai e dua na vale e Quebec me redetaki me vanua ni soqoni ena vuku ni veitusaqati. E kunea rawa na neitou ivavakoso lailai e dua na qarati makawa e batabata. Me katakata na vale qori ena draki liliwa, era vakayagataka na tacida na misini ni vakatakata. Ni bera ni tekivu na soqoni, keimami dau wavolita na misini qori me vica na aua me keimami veivakayaloqaqataki.

E totoka dina nida raica na toso ni cakacaka vakavunau ena veiyabaki sa sivi. Ena veiyabaki ni 1960, se vica ga na ivavakoso lalai ena siti o Quebec, ena yasayasa o Côte-Nord kei Gaspé Peninsula. Ia nikua, sa sivia ni rua na tabacakacaka ena vanua qori, era soqoni tiko na tacida ena Vale ni Soqoni totoka.

Ena 1970, keirau sureti kei Simone ena veiqaravi vakaivakatawa ni tabacakacaka. Ena 1973, keirau lesi ena veiqaravi vakaivakatawa ni tikina. Ena veiyabaki qori, au vulica e levu sara na ka vei ira na tacida tagane matua me vakataki Laurier Saumur * kei David Splane. * Erau ivakatawa dauveilakoyaki tiko ena gauna qori. Ni vakayacori oti na soqo ni tabacakacaka, keirau dau veivosakitaka kei David na ka me keirau vakavinakataka ena neirau veivakavulici. Au vakasamataka sara ni tukuna vei au o David ena dua na gauna: “Léonce, au taleitaka na iotioti ni nomu vunau. E totoka, ia au rawa ni bulia tale e tolu na noqu sui ni vunau ena ka o tukuna!” Vaka e sivia tale na noqu ivakamacala. Au vulica gona meu dau vosa ga vakalekaleka me matata.

 E nodra itavi na ivakatawa ni tikina mera dau vakayaloqaqataki ira na ivakatawa ni tabacakacaka. Era kilai au vinaka e levu na dautukutuku e Quebec. Niu veisiko yani, era via cakacaka vata kei au. Au marautaka vakalevu na cakacaka vakavunau kei ira, ia e lailai na noqu gauna kei na ivakatawa ni tabacakacaka. Dua na gauna, e kaya vei au e dua na ivakatawa ni tabacakacaka: “E totoka ni o solia nomu gauna vei ira na mataveitacini, ia kua ni guilecava ni o mai sikovi au tiko. Au vinakata tale ga meu vakayaloqaqataki!” Au vuli dina ena ivakasala e tau vakayalovinaka qori.

Ena 1976, e yaco e dua na ituvaki rarawataki, e tawanamaki tale ga. E tauvimate bibi o noqu daulomani o Simone, e rawati koya na mate qori. E dua dina na isa ni vakawati vinaka o Simone ni lomani Jiova vakalevu, e sega ni dau nanumi koya ga. Au vosota rawa na noqu lolosi niu ogaoga ena cakacaka vakaitalatala. Au vakavinavinakataki Jiova tale ga ni tokoni au vakayalololoma ena gauna dredre qori. Oti e dua na gauna, au mani vakamau tale kei na dua na painia gugumatua o Carolyn Elliott. E mai veiqaravi e Quebec ni vinakati kina vakalevu na cakacaka, e kila vinaka na vosa vakavalagi. E torovi rawarawa o Carolyn, e dau veikauaitaki tale ga vakauasivi vei ira na mamadua se galili. E vukei au vakalevu ni tomani au ena cakacaka ni veisiko.

Ena Janueri 1978, au kerei meu veivakavulici ena imatai ni Koronivuli ni Cakacaka Vakapainia e Quebec. Au rere niu se vou sara ga ena ka me vulici me vakataki ira ga na gonevuli. Ia au vakavinavinakataka nira lewena na imatai ni kalasi qori e levu na painia matua. Au veituberi ena vuli, ia au vulica e levu na ka vei ira na gonevuli!

Ena 1978, a vakayacori ena valenisarasara na Montreal Olympic Stadium na Soqo ni Veimatanitu e kena usutu “Victorious Faith.” Qori  e dua na soqo levu duadua e vakayacori e Quebec nira tiko kina e sivia ni 80,000. Au lesi meu cakacaka ena Tabana ni iTukutuku ena soqo qori. Au veitalanoa kei na levu na dauvolaitukutuku, au marau tale ga nira vola e levu na ka vinaka me baleti keda. E kaburaki ena tivi kei na retio na neimami veitalanoa me sivia ni 20 na aua, era tabaka tale ga e levu na itukutuku. Qori e dua na ivakadinadina levu!

Ena 1996, e veisau na noqu ilesilesi. Au veiqaravi tu ga ena yalava ni vosa vakaVaranise e Quebec me tekivu mai na gauna au papitaiso kina, ia qo au sa lesi meu veiqaravi ena dua na tabacakacaka e vosa vakavalagi e Toronto. Au nanuma ni sega ni ganiti au, au leqataka tale ga na noqu vunau niu sakasaka ena vosa vakavalagi. Ena vinakati meu masu wasoma vei Jiova, meu nuitaki koya tale ga.

Au leqataka vakalevu na noqu ilesilesi, ia au kaya vakadodonu niu marautaka vakalevu na rua na yabaki au veiqaravi kina ena yasayasa o Toronto. E vosovoso o Carolyn me vukei au meu matau ena vosa vakavalagi, era veitokoni na tacida, era veivakayaloqaqataki tale ga. E levu sara na neirau veikilai.

E tiko na itavi me qaravi, na vakarautaki tale ga ni soqo ni tabacakacaka ena muanimacawa, ia au dau vunau e veivale me rauta ni dua na aua ena veiyakavi ni Vakaraubuka. Era na kaya beka eso, ‘Na cava mo lai vunau kina ni muanimacawa osooso qo, na noda soqo ni tabacakacaka?’ Ia e uqeti au niu gole ena cakacaka vakavunau. Ena gauna mada qo, au dau marau vakalevu niu lai vunau.

Ena 1998, keirau lesi tale kei Carolyn ena veiqaravi vakapainia lavotaki. Vica vata na yabaki noqu tuvanaka na vunau lavotaki e matanalevu, au cakacaka tale ga kei ira na dauvolaitukutuku meu vakadodonutaka na ka eda beitaki kina na iVakadinadina i Jiova. Au marautaka tiko ena gauna qo kei Carolyn na neirau vunau vei ira na duikaikai era toki mai Kenada, era via kila tale ga na ka e tukuna na iVolatabu.

Au vakalougatataki dina niu raica lesu na 68 na yabaki ni noqu qaravi Jiova, tekivu mai na gauna au papitaiso kina. Dua na ka na noqu marau niu mai kila na sala meu taleitaka kina vakalevu na vunau, kei na noqu vakavulica e levu mera kila na ka dina. Sa painia tudei tale ga o luvequ yalewa o Lise kei watina, nira sa ka lelevu na gone. Au marau vakalevu ni gumatua tiko ga ena cakacaka vakaitalatala o Lise. Au vakavinavinakataki ira dina na itokani lotu vaKarisito era ivakaraitaki vinaka vei au, era vakasalataki au tale ga vakayalomatua. Qori e uqeti au me dei noqu veiwekani kei Jiova, meu qaravi koya tale ga ena levu na sala. Au vakadinadinataka nida na yalodina tiko ga ena noda ilesilesi ke da nuitaka na kaukaua ni yalo tabu i Jiova. (Same 51:11) Au dau vakavinavinakataki Jiova niu se vakacaucautaka tiko ga na yacana!—Same 54:6.