1-2. Me vaka e tukuni ena Maciu 5:11, meda raica vakacava na veivakatovolei?

 E YALATAKA o Jisu vei ira na nona imuri nira na vakila na marau dina. E kaya tale ga ni o ira na lomani koya era na vakatovolei. (Maciu 10:22, 23; Luke 6:20-23) Eda marau nida tisaipeli i Karisito. Ia cava noda rai ke ra tusaqati keda noda vuvale, na matanitu, se ra temaki keda o ira eda vuli vata se cakacaka vata meda cakava na ka ca? E macala ga nida na nuiqawaqawa.

² Levu era sega ni dau marautaka na veivakacacani. Ia e kaya na Vosa ni Kalou meda marautaka. Kena ivakaraitaki, e vola na tisaipeli o Jemesa meda marau nida vakatovolei, meda kua ni nuiqawaqawa. (Jeme. 1:2, 12) E kaya tale ga o Jisu meda marau nida vakacacani. (Wilika Maciu 5:11.) Eda na cakava vakacava qori? Levu na ka eda na vulica nida dikeva na ivola i Jemesa vei ira na lotu vaKarisito ena imatai ni senitiuri. Meda dikeva mada na veika dredre era sotava.

3. Na cava e yaco ni se qai tisaipeli ga o Jemesa?

³ Ni se qai tisaipeli ga o Jemesa na taci Jisu vakacabecabe, era vakacacani na lotu vaKarisito e Jerusalemi. (Caka. 1:14; 5:17, 18) Na gauna tale ga e vakamatei kina o Sitiveni, levu na lotu vaKarisito era biuta na koro “era dui se kece ina veivanua e Jutia kei Samaria,” eso era lako sara vakayawa i Saipurusi kei Anitioki. (Caka. 7:58–8:1; 11:19) Levu sara na veika dredre era sotava na tisaipeli. Ia  era gumatua ni vunautaka na itukutuku vinaka ena veivanua era lako kina, qai tauyavu e levu na ivavakoso ena veivanua e qali vakaRoma. (1 Pita 1:1) Levu tale na veika dredre era sotava na lotu vaKarisito ena imatai ni senitiuri.

4. Na cava tale era vakatovolei kina na lotu vaKarisito ena imatai ni senitiuri?

⁴ Era vakatovolei vakalevu na lotu vaKarisito ena imatai ni senitiuri. Kena ivakaraitaki, rauta na 50 G.V. e vakarota o Empara Kilotiu mera biuti Roma na Jiu kece. Era vakasaurarataki gona na Jiu era sa mai lotu vaKarisito mera biuta nodra vale mera toki. (Caka. 18:1-3) Ena rauta na 61 G.V., e vola na yapositolo o Paula nira vakalialiai e matanalevu na tacina vaKarisito, era vesu qai butakoci nodra iyau. (Iper. 10:32-34) Era dau tauvimate tale ga na lotu vaKarisito me vakataki ira ga na vo ni lewenivanua, eso era dravudravua.—Roma 15:26; Fpai. 2:25-27.

5. Na taro cava meda na sauma?

⁵ Ni vola o Jemesa na nona ivola ni bera na 62 G.V., e kila vinaka tu na veika dredre era sotava tiko na tacina vakayalo. E dusimaki Jemesa o Jiova me vola vei ira na lotu vaKarisito qori eso na ivakasala yaga, ena vukei ira mera marau tiko ga nira vakatovolei. Meda dikeva mada na ivola i Jemesa da qai sauma e vica na taro qo: Na cava na ibalebale ni marau e vola o Jemesa? Na cava e rawa ni vakavuna me sega ni marau na lotu vaKarisito? Ena uqeti keda vakacava na vuku, vakabauta, kei na yaloqaqa meda marau tiko ga nida vakatovolei?

6. Me vaka e tukuni ena Luke 6:22, 23, na cava e marau tiko ga kina na lotu vaKarisito ni vakatovolei?

⁶ Era na rairai nanuma eso nira na marau ga ke ra bulabula vinaka, ra vakailavo, qai marau tale ga nodra vuvale. Ia na marau e vola o Jemesa e okati ena vua ni yalo tabu ni Kalou, e sega ni vakatau ena keda ituvaki. (Kala. 5:22) E marau na lotu vaKarisito ni kila ni sa vakamarautaki Jiova tiko, e vakatotomuri Jisu tale ga. (Wilika Luke 6:22, 23; Kolo. 1:10, 11) Na noda marau e vaka na yameyame ena loma ni cina tabucagi, e caudre tiko ga ni liwa na cagi se ni tau na uca. Eda rawa ni marau tiko ga ke da tautauvimate, leqa vakailavo, vakalialiai, se nira tusaqati keda na lewenivuvale se so tale. Era sega ni bokoca rawa na dau veitusaqati na yameyame qori. Eda sa qai marau ga vakalevu. Ni vakatovolei na noda vakabauta e vakadinadinataka nida tisaipeli dina i Karisito. (Maciu 10:22; 24:9; Joni 15:20) Sa rauta me vola o Jemesa: “Moni marau na taciqu ni oni sotava na veimataqali veivakatovolei.”—Jeme. 1:2.

7-8. Na yaga vakacava ni vakatovolei noda vakabauta?

⁷ E vola o Jemesa e dua tale na vuna era tu vakarau kina na lotu vaKarisito mera vosota na veivakatovolei lelevu. E kaya: “Ni vakatubura na vosota na vakatovolei ni nomuni vakabauta ena sala qo.” (Jeme. 1:3) Na veivakatovolei e vaka na yameyame e dau buli kina na kaukamea. Ni tavuni oti na kaukamea qai vakabatabatataki, ena kaukaua sara vakalevu. E kaukaua tale ga noda vakabauta nida vosota na veivakatovolei. Sa rauta me vola o Jemesa: “Me tini vinaka na cakacaka ni vosota moni taucoko kina, moni vinaka ena ka kece.” (Jeme. 1:4) Nida kila ni vaqaqacotaki noda vakabauta ni vakatovolei, eda na vosota ena marau.

⁸ E vola tale ga o Jemesa eso na ka e rawa ni vakavuna meda sega ni marau. Na cava ya? Na cava meda cakava meda marau tiko ga kina?

9. Na cava e vinakati kina na vuku?

⁹ Vu ni noda sega ni marau: Nida sega ni kila na ka meda cakava. Nida sotava na veika dredre, eda na kerea na veidusimaki i Jiova meda vakatulewataka na ka e vakamarautaki koya, ena yaga vei ira na tacida, ena uqeti keda tale ga meda yalodina tiko ga. (Jere.  10:23) E vinakati na vuku meda kila na ka meda cakava, kei na ka meda tukuna vei ira na dau veitusaqati. Ke da sega ni kila na ka meda cakava, eda rawa ni yalolailai ena vuku ni keda ituvaki, ena seavu totolo noda marau.

10. Me vaka e tukuni ena Jemesa 1:5, na cava meda cakava meda vuku kina?

¹⁰ Ka meda cakava: Kerea vei Jiova na vuku. Ke da vinakata meda marau nida vakatovolei, e bibi meda kerea mada vei Jiova na vuku meda vakatulewa vinaka kina. (Wilika Jemesa 1:5.) Na cava meda cakava ke da nanuma ni se sega ni sauma o Jiova na noda masu? E kaya o Jemesa meda ‘kerekere tiko ga’ vua na Kalou. Ena sega ni cudruvi keda o Jiova ke da kerea wasoma vua na vuku. E sega ni dau vaqara cala. Ena “lomasavu” na Tamada vakalomalagi nida kerea vua na vuku meda vosota kina na veivakatovolei. (Same 25:12, 13) E kila noda rarawa, e lomani keda qai via vukei keda, qori eda na marau kina. Ia e vakavukui keda vakacava o Jiova?

11. Na cava tale meda cakava meda vuku kina?

¹¹ E vakavukui keda o Jiova ena nona Vosa. (Vkai. 2:6) Eda na rawata ga qori ke da vulica na Vosa ni Kalou kei na ivola vakaivolatabu. Ia e sega ni vinakati wale ga na kilaka. E bibi meda cakava sara na ka e vinakata na Kalou. E vola o Jemesa: “Moni muria na vosa, ni kua ni rogoca wale ga.” (Jeme. 1:22) Nida muria na ivakasala ni Kalou, eda na veiyaloni, yalorawarawa qai yalololoma. (Jeme. 3:17) Na itovo qori ena uqeti keda meda vosota na veivakatovolei cava ga, da qai marau tiko ga.

12. Na cava e bibi kina meda kila vinaka na iVolatabu?

¹² Na Vosa ni Kalou e vaka na iloilo,  e vukei keda meda raica eso na ka me vakavinakataki. (Jeme. 1:23-25) Nida vulica na Vosa ni Kalou, eda na rairai liaca ni dodonu meda lewa vinaka noda cudru. Ena vukei keda o Jiova meda yalomalua nira vakacudrui keda eso tale se dua na ka. Nida yalomalua, eda na kila na ka meda cakava nida sotava na veika dredre. Eda na vakasama qai vakatulewa vinaka. (Jeme. 3:13) E bibi gona meda kila vinaka na iVolatabu!

13. Na cava meda vulica kina na nodra ivakaraitaki ena iVolatabu?

¹³ Eso na gauna eda qai vuli ga nida sa tara na we ni ivako. Ia e dau mosimosi nida vuli va qori. E vinaka cake meda vuli ena ka vinaka kei na ka ca era cakava eso tale. Sa rauta me uqeti keda o Jemesa meda vuli vei ira na cavuti ena iVolatabu me vakataki Eparama, Reapi, Jope, kei Ilaija. (Jeme. 2:21-26; 5:10, 11, 17, 18) Eratou yalodina tiko ga vei Jiova ni ratou vosota na veika dredre, eratou marau tiko ga. Eda vulica ena nodratou vosota, ni rawa nida marau tiko ga ena veivuke i Jiova.

14-15. Na cava meda kua ni vakalecalecava kina na ka eda vakatitiqataka?

¹⁴ Vu ni noda sega ni marau: Noda vakatitiqa tiko ga. Eso na gauna e dau dredre meda kila eso na ka e tukuni ena Vosa ni Kalou. Se rairai sega ni sauma o Jiova na noda masu ena sala eda namaka. Eda na rawa gona ni vakatitiqa kina. Ke da vakalecalecava na leqa qori, e rawa ni luluqa kina noda vakabauta, vakaleqai tale ga noda veiwekani kei Jiova. (Jeme. 1:7, 8) E rawa ni buawa tale ga kina na noda inuinui me baleta na gauna se bera mai.

¹⁵ E kaya na yapositolo o Paula ni noda inuinui me baleta na gauna se bera mai e vaka na ikelekele. (Iper. 6:19) Na ikelekele ena tarova na waqa me kua ni takasa e veivatuvatu. Ia ena yaga ga na ikelekele qori ke sega ni cavuka na kena wa sitila e vesu tu e waqa. Ena malumalumu na wa sitila qori ke veveka, e vakamalumalumutaka tale ga na vakabauta na vakatitiqa. Nida vakatitiqa, ena luluqa noda vakabauta na yalayala i Jiova nida tusaqati. Ke luluqa noda vakabauta ena sega noda inuinui. Sa rauta me tukuna o Jemesa ni o koya e vakatitiqa “e vaka na ua ni wasawasa e veitubuyaki ni liwava na cagi.” (Jeme. 1:6) Ena rairai sega sara ga ni marau!

16. Na cava meda cakava ke da vakatitiqa?

¹⁶ Ka meda cakava: Vakadeitaka na kena dina, vaqaqacotaka na noda vakabauta. Kua ni dau lomalomarua. Ena gauna i Ilaija na parofita, era lomalomarua na tamata i Jiova. E kaya vei ira o Ilaija: “Me vakacava na dede ni nomuni lomalomarua tiko? Ke Kalou dina o Jiova, moni muri koya, ia ke o Peali, moni muri koya!” (1 Tui 18:21) Meda qarauna tale ga qori nikua. E vinaka cake meda vakekeli meda vakadeitaka ni Kalou dina ga o Jiova, e nona Vosa na iVolatabu, era nona tamata tale ga na iVakadinadina i Jiova. (1 Ces. 5:21) Qori ena vaqaqacotaka na noda vakabauta, eda na sega ni vakatitiqa. E rawa nida kerei ira na qase mera vukei keda meda kua ni vakatitiqa. E bibi meda yavala totolo meda marautaka tiko ga noda qaravi Jiova!

17. Na cava ena yaco ke o sega ni yaloqaqa?

¹⁷ Vu ni noda sega ni marau: Na yalolailai. E kaya na Vosa ni Kalou: “Ke o yalolailai ena siga ni rarawa, ena lailai na  nomu kaukaua.” (Vkai. 24:10) Na vosa vakaIperiu ni “yalolailai” e rawa ni kena ibalebale “sega ni yaloqaqa.” Ke o sega ni yaloqaqa, o na sega ni marau.

18. Na cava na ibalebale ni noda vosota?

¹⁸ Ka meda cakava: Nuitaki Jiova me vakayaloqaqataki keda meda vosota. E vinakati na yaloqaqa meda vosota kina na veivakatovolei. (Jeme. 5:11) Na vosa e vakayagataka o Jemesa me “vosota,” e vakaibalebaletaki vua e dua e dei tu ga ena vanua e tucake tu kina. Eda na rairai vakasamataka na sotia yaloqaqa e dei tu ga nira ravuravu yani na meca, e sega ni dro.

19. Na cava eda vulica vua na yapositolo o Paula?

¹⁹ E ivakaraitaki vinaka ni yaloqaqa kei na vosota na yapositolo o Paula. E dau malumalumu ena so na gauna. E vosota rawa ga ni nuitaki Jiova me vakaukauataki koya. (2 Kor. 12:8-10; Fpai. 4:13) Eda na vakaukauataki tale ga qai yaloqaqa ke da yalomalumalumu meda nuitaka na veivuke i Jiova.—Jeme. 4:10.

20-21. Na cava eda vakadeitaka?

²⁰ Eda nuidei ni sega ni totogitaki keda o Jiova nida vakatovolei. E vakadeitaka o Jemesa: “Ni vakatovolei e dua me kua ni kaya: ‘E vakatovolei au na Kalou.’ Ni sega ni vakatovolei rawa na Kalou ena ka ca, e sega tale ga ni vakatovolea e dua o koya.” (Jeme. 1:13) Nida vakadeitaka qori, eda na toro voleka kina vua na Tamada vakalomalagi dauloloma.—Jeme. 4:8.

²¹ O Jiova e “sega ni dau veiveisau.” (Jeme. 1:17) E tokoni ira na lotu vaKarisito ena imatai ni senitiuri nira vakatovolei, ena vukei keda tale ga nikua. Mo gumatua ni kerei Jiova me vukei iko mo vuku, mo vakabauta, mo yaloqaqa tale ga. Ena sauma na nomu masu o koya. O na nuidei kina ni na vukei iko mo marau tiko ga ni o vakatovolei!