E vakamatatataka na iVolatabu ni rawa ni tukuna o Jiova na veika se bera mai. (Aisea 45:21) E sega ni vakamatatataki na sala matailalai e cakava kina, na gauna kei na levu ni ka e vakatulewataka me kila. Kena ibalebale, eda sega ni kila na ka kece e rawa ni cakava o Jiova. Ia e vica na ka eda kila.

E levu sara na ka e rawa ni cakava o Jiova, eso na gauna e vakatulewataka me kua ni cakava eso na ka. Ni sega ni vakaiyalayala na nona vuku, e rawa ni tukuna na ka ga e vinakata. (Roma 11:33) Ia ni dau lewai koya vinaka, e rawa tale ga ni digia me kua ni kila na ka ena yaco.—Vakatauvatana Aisea 42:14.

E vakavuna o Jiova me vakayacori na nona inaki. E veisemati vakacava qori kei na veika se bera mai? E vakamacalataki ena Aisea 46:10: “Mai na ivakatekivu au tukuna na kena itinitini, mai na gauna makawa au tukuna na ka se bera ni yaco. Au kaya, ‘Na noqu lewa ena tu ga, au na vakayacora na ka kece au vinakata.’”

Dua na vuna e rawa ni tukuna kina o Jiova na veika e se bera mai, ya ni tu vua na kaukaua me cakava kina qori. Kena ivakaraitaki, eso na gauna eda na tosoya i liu na yaloyalo me rawa nida kila na kena itinitini. Ia e sega ni gadrevi vei Jiova me tosoya i liu na gauna me rawa ni kila na veika e se bera mai. E rawa ni vakatulewataka o Jiova me yaco e dua na ka ena kena gauna veiganiti qai raica me vakayacori ni sa yaco mai na kena gauna.—Lako 9:5, 6; Maciu 24:36; Caka. 17:31.

Oya na vuna e vakayagataka kina na iVolatabu eso na vosa me vaka na “vakarautaka,” “bulia,” kei na “lewa” me vakamacalataka na ka e dau cakava o Jiova ena so na ka e se bera mai. (2 Tui 19:25; Aisea 46:11) Na vosa kece qori e vakadewataki mai na dua na vosa taumada e veiwekani na kena ibalebale kei na “Dautulituli.” (Jere. 18:4) Me vaka ga nona bulia na dautulituli maqosa e dua na ibuli qele me dua na itutu ni senikau totoka, o Jiova tale ga e rawa ni bulia se cakava na ka me vakayacori kina na nona inaki.—Efeso 1:11.

E rokova o Jiova na galala ni vakatulewa. E sega ni sa lewa rawa tu na ka ena yacovi keda yadua, e sega tale ga ni vakavuna mera cakava na yalomalumalumu e dua na ka mera tini rusa kina. E solia vei ira na galala mera vakatulewataka na ka ga mera cakava qai uqeti ira mera digia na sala donu.

Dikeva e rua na ivakaraitaki. Na imatai ni ivakaraitaki e baleti ira na lewe i Ninive. E tukuna o Jiova ni na vakarusai na korolevu o Ninive ena vuku ni nodra ivalavala ca. Ia nira veivutuni, e “vakasamataka tale o [Jiova] na ca e tukuna me cakava vei ira, qai sega ni cakava.” (Jona 3:1-10) E veisautaka o Jiova nona vakatulewa nira veivutuni na kai Ninive, ya nira vakayagataka nodra galala ni vakatulewa mera rogoca na ivakaro i Jiova.

Na ikarua ni ivakaraitaki ya na parofisai me baleta na dauravuravu o Sairusi, ena sereki ira na Jiu mai na veivakabobulataki qai vakarota me tara tale na valenisoro i Jiova. (Aisea 44:26–45:4) E qai vakayacora na parofisai qori o Tui Sairusi mai Perisia. (Esera 1:1-4) Ia e sega ni sokaloutaka na Kalou dina o Sairusi. E vakayagataki Sairusi o Jiova me vakayacora na parofisai, ia e solia vua o Jiova na galala me digia o cei me qarava.—Vkai. 21:1.

E levu sara na ka e vauci ena nona dau tukuna o Jiova na veika e se bera mai, ia qo e vica wale ga. Kena ibalebale ya, e sega ni dua vei keda e kila vinaka na ka kece e vakasamataka o Jiova se cakava. (Aisea 55:8, 9) Ia na ka eda mai kila me baleti Jiova e dau vaqaqacotaka na noda vakabauta ni dau cakava tu ga na ka dodonu, wili kina nona tukuna na ka se bera mai.