1-2. Na ivakaraitaki cava eda kila kina na rai i Jiova ni vakaucacataki na yacana?

 VAKASAMATAKA mada qo: E vakaucacataki iko e dua o dau lomana. O kila ni lasu na ka e tukuna, ia eso era vakabauta. O koya e ca sara, ni vakatetei na lasu qori, e levu tale era vakabauta. Cava nomu rai? Ke o dau kauaitaki ira e levu kei na vinaka ni kemu irogorogo, sa na bau mosi sara ga na nomu vakaucacataki qori, se vakacava?—Vkai. 22:1.

² Eda kila ena ivakaraitaki qori na rai i Jiova ni vakaucacataki na yacana. E dua vei ira na luvena vakayalo e lasu vua na imatai ni yalewa o Ivi. E vakabauti koya o Ivi. Na lasu qori e vakavuna na nodrau lasu vei Jiova na imatai ni noda itubutubu. Na cava e yaco? E valavala ca kina na kawatamata, e vakavuna tale ga na mate. (Vkte. 3:1-6; Roma 5:12) Na leqa kece eda raica tu qo e vuravura: na mate, na ivalu, kei na rarawa, e vakavuna sara ga o Setani ena gauna e vakatetea kina na lasu ena were o Iteni. Vakacava e mositi Jiova na vakaucaca qori kei na ka e yaco kina? Macala ga ni mositi koya. Ia e sega ni cudru o Jiova, e “Kalou mamarau” tiko ga.—1 Tim. 1:11.

3. Na cava na noda itavi?

³ E tiko na noda itavi meda vakacaucautaka na yaca i Jiova nida talairawarawa ena ivakaro qo: “Vakacaucautaka na yaca i Jiova.” (Same 113:1) Eda cakava qori nida tukuna na veika vinaka me baleti koya. Vakacava o na cakava qori? Meda dikeva mada e tolu na sala eda na vakacaucautaka kina na yaca ni noda Kalou mai vu ni lomada.

E MARAU O JIOVA NIDA VAKACAUCAUTAKI KOYA

4. Na cava e marau kina o Jiova nida vakacaucautaki koya? Vakatauvatana. (Raica tale ga na iyaloyalo.)

⁴ E marau na Tamada vakalomalagi nida vakacaucautaka  na yacana. (Same 119:108) Vakacava kena ibalebale qori ni vakataki keda na Kalou kaukaua duadua nida dau vinakata meda vakacaucautaki se vakayaloqaqataki? Sega. Dikeva mada e dua na kena ivakatautauvata. E cici yani e dua na goneyalewa lailai e mokoti tamana qai kaya, “Iko noqu Ta vinaka duadua!” E marau sara ga vakalevu o tamana ena ka e cakava qori. Vakacava meda nanuma ni sega ni nuidei, e dau vinakata me vakacaucautaki koya tu ga o luvena? Sega. Eda nuidei ni tama kaukaua, e marautaka tale ga ni dau vakaraitaka o luvena na loloma kei na nona dau taleitaki koya. E kila ni itovo qori ena dau vakaraitaka o luvena ena gauna sa na qase kina. Ena vakasama vata ga qori, e marau na Tamada vakalomalagi cecere duadua o Jiova nida vakacaucautaki koya.

5. Na cava eda vakalasuya nida vakacaucautaka na yaca ni Kalou?

⁵ Nida vakacaucautaka na Tamada vakalomalagi, eda vakaraitaka ni lasu na ka e kaya o Setani me baleti keda. E tukuna ni sega ni dua ena tutaka ena yalodina na yaca ni Kalou. E tukuna tale ga ni sega ni dua ena yalodina ke vakatovolei. E kaya nida na sega ni qarava na Kalou ke da nanuma ni na vinaka vei keda. (Jope 1:9-11; 2:4) Ia e vakadinadinataka na turaga yalodina o Jope ni lasu o Setani. Vakacava o iko? E noda itavi yadua meda tutaka ena yalodina na yaca i Tamada, meda vakamarautaki koya tale ga ena noda qaravi koya ena yalodina. (Vkai. 27:11) E ka dokai meda cakava qori.

6. Eda na vakatotomuri Tui Tevita vakacava kei ira na Livai? (Niemaia 9:5)

⁶ O ira na lomana na Kalou era via vakacaucautaka na yacana mai vu ni lomadra. E vola o Tui Tevita: “Meu vakacaucautaki Jiova, me vakacaucautaka na yacana tabu na ka kece e tu e lomaqu.” (Same 103:1) E kila o Tevita ni nona vakacaucautaka na yaca ni Kalou, sa vakacaucautaki sara tiko ga kina o Jiova. Na yaca i Jiova e okati kina na kena irogorogo. Nida rogoca na yacana eda vakasamataka na nona itovo talei kece, kei na veika veivakurabuitaki e dau cakava. E vinakata o Tevita me doka na yaca i Tamana, me vakacaucautaka tale ga ni ka tabu. E vinakata me cakava qori mai vu ni lomana, ya ena “ka kece e tu” vua. Era va tale ga qori na Livai nira liutaka na nona vakacaucautaki o Jiova. Era kaya ena yalomalumalumu ni sega ni dua na vosa me vakamacalataki rawa kina na uasivi ni yaca tabu i Jiova. (Wilika Niemaia 9:5.) Macala ga ni  marautaka o Jiova na nodra yalomalumalumu kei na nodra veivakacaucautaki mai vu ni lomadra na Livai.

7. Eda vakacaucautaki Jiova vakacava ena cakacaka vakaitalatala kei na noda bula e veisiga?

⁷ Nikua, ena marau o Jiova nida tukuna na levu ni noda taleitaki koya kei na noda lomani koya. Nida cakacaka vakaitalatala, e noda inaki bibi meda vukea e levu mera veivolekati kei Jiova, meda vukei ira tale ga me tautauvata na noda rai me baleti Jiova. (Jeme. 4:8) Eda marau meda vakaraitaka vei ira mai na iVolatabu na veika me baleti Jiova, nona loloma, lewadodonu, kaukaua, kei na so tale na nona itovo talei. Kena ikuri, eda vakacaucautaki Jiova, eda vakamarautaki koya tale ga nida gumatua meda vakatotomuri koya. (Efeso 5:1) Nida cakava qori, eda kilai tani kina vei ira na bula tu ena vuravura ca qo. Era na rairai raica e levu nida duidui ra qai via kila na vuna. (Maciu 5:14-16) Nida veimaliwai kei ira ena veisiga, eda na rawa sara ga ni vakamacalataka na vuna eda duidui kina. Na cava na kena yaga? Era na toro volekata kina na noda Kalou o ira na lomadina. Nida vakacaucautaki Jiova ena sala qori, eda vakamarautaka sara ga na lomana.—1 Tim. 2:3, 4.

E MARAU O JISU NIDA VAKACAUCAUTAKA NA YACA I JIOVA

8. E liu vakacava o Jisu me vakacaucautaka na yaca i Jiova?

⁸ E sega ni dua na ibulibuli vuku e lomalagi kei vuravura e kilai Jiova vinaka me vakataki Jisu. (Maciu 11:27) E lomani Tamana o Jisu, e liu sara ga me vakacaucautaka na yaca i Jiova. (Joni 14:31) Ni masu vei Tamana ena bogi ni bera ni mate, e vakamacalataka na ka bibi e cakava ena nona cakacaka vakaitalatala: “Au sa vakatakila ... na yacamuni.” (Joni 17:26) Na cava e vakaibalebaletaka?

9. Na vosa vakatautauvata cava e vakamatatataka kina o Jisu na itovo i Tamana?

⁹ E sega ni vakamacalataka ga o Jisu na yaca ni Kalou o Jiova, e vakabibitaka tale ga na nona itovo. Era sa kila tu na yaca ni Kalou na Jiu e vakavulica o Jisu. Ia e liutaka sara ga o Jisu me “tukuni koya.” (Joni 1:17, 18) Kena ivakaraitaki, e tukuni ena iVolatabu vakaIperiu ni o Jiova e dauyalololoma qai dauveinanumi. (Lako 34:5-7) E vakamatatataka o Jisu na ka dina qori ena gauna e tukuna kina na vosa vakatautauvata me baleta na gone cidroi kei tamana. Eda wilika ni sa veivutuni o Luvena, ni raici koya o tamana “ni se yawa tu yani,” e cici vua, mokoti koya qai vosoti koya mai vu ni lomana. Eda raica kina vakamatata na itovo i Jiova ni dauyalololoma, e dauveinanumi tale ga. (Luke 15:11-32) E vakamacalataka vinaka o Jisu na veika me baleti Tamana.

10. (a) Eda kila vakacava ni vakayagataka na yaca i Tamana o Jisu qai vinakata mera cakava qori e levu? (Marika 5:19) (Raica tale ga na iyaloyalo.) (b) Na cava e vinakata o Jisu meda cakava nikua?

¹⁰ Vakacava e vinakata o Jisu mera vakayagataka tale ga e levu na yaca i Tamana? Io. Era kaya eso na iliuliu ni lotu ni ka tabu na yaca ni Kalou, ke cavuti gona ena sega ni dokai kina. Ia e sega ni vinakata o Jisu me tarova nona vakacaucautaka na yaca i Tamana eso na ivakavuvuli vakatamata qori. Vakasamataka mada na gauna e vakabula kina e dua na turaga curumi timoni ena yasayasa o Kerikesa. Era rere sara ga na lewenivanua qori, era cikevi Jisu me kua tale ni tiko e kea, me biuta na koro, mani biuta na yasayasa qori.  (Mari. 5:16, 17) Ia se vinakata tiko ga me kilai ena vanua qori na yaca i Jiova. E vakarota gona na turaga a vakabulai me lai tukutuku vei ira na lewenivanua, me kua ni tukuna na ka e cakava o Jisu, ia na ka ga e cakava o Jiova. (Wilika Marika 5:19.) a E vinakata tale ga qori nikua, ya meda vakatakila na yaca i Tamana e vuravura raraba! (Maciu 24:14; 28:19, 20) Nida cakava na noda itavi ena marau kina na noda Tui, o Jisu.

11. Na cava e vakavulica o Jisu vei ira na nona imuri mera masulaka? Cava e bibi kina qori? (Isikeli 36:23)

¹¹ E kila o Jisu ni inaki Jiova me vakarokorokotaki na yacana, me vakalasui tale ga na ka e vakaucacataki kina. Qori na vuna e uqeti ira kina nona imuri mera masu va qo: “Tamai keimami mai lomalagi, me vakarokorokotaki na yacamuni.” (Maciu 6:9) E kila tale ga o Jisu ni veiletitaki vakalevu qori. (Wilika Isikeli 36:23.) E sega ni dua na ibulibuli vuku e vuravura se lomalagi me vakarokorokotaka vakalevu na yaca i Jiova me vakataki Jisu. Ia ni vesu o Jisu, na cala cava era beitaki koya kina na kena meca? E beitaki ni vosabeci Tamana! E kila o Jisu ni valavala ca torosobu me beca se vakaucacataka na yaca tabu i Tamana. E rarawataka sara ga ni beitaki ena cala qori qai tukuni ni cakava dina. Qori e rairai vakavuna sara ga nona ‘rarawa vakalevu’ ni vo e vica na aua me vesu.—Luke 22:41-44.

12. E vakarokorokotaka vakacava o Jisu na yaca i Tamana ena ka kece e cakava?

¹² Me vakarokorokotaka o Jisu na yaca i Tamana, e vosota kina nona vakararawataki, vosabeci, kei na nona vakaucacataki. E kila ke talairawarawa vei Tamana ena ka kece e cakava, ena sega ni maduataka e dua na ka. (Iper. 12:2) E kila tale ga ni o Setani e saqati koya tiko ena gauna dredre qori. (Luke 22:2-4; 23:33, 34) E nuitaka tiko o Setani ni na sega ni yalodina o Jisu, ia e guce na nona sasaga! E vakaraitaka sara ga o Jisu ni o Setani e dau lasulasu. Kena ikuri, era tu na dauveiqaravi i Jiova era yalodina vua ena gauna mada ga era vakatovolei kina ena veika dredre sara!

13. O na vakamarautaka vakacava na nomu Tui sa veiliutaki tiko?

 ¹³ Vakacava o via vakamarautaka na nomu Tui sa veiliutaki tiko? Mo vakacaucautaka tiko ga na yaca i Jiova, mo vukea tale ga e levu mera kila na nona itovo talei. Ni o cakava qori o sa vakatotomuri Jisu tiko. (1 Pita 2:21) Me vakataki Jisu, mo vakamarautaki Jiova, mo vakaraitaka tale ga ni dau lasulasu na kena meca, o Setani!

NIDA VAKACAUCAUTAKA NA YACA I JIOVA EDA VEIVUKE ENA NODRA VAKABULAI ESO

14-15. E yaga vakacava noda vakavulica eso tale me baleti Jiova?

¹⁴ Nida vakacaucautaka na yaca i Jiova, eda sa veivuke tiko ena nodra vakabulai eso. Ena sala cava? O Setani e “vakamatabokotaka na nodra vakasama ... na tawavakabauta.” (2 Kor. 4:4) Era vakabauta tu gona na ka e lasutaka o Setani me va qo: E sega ni bula na Kalou, e yawa na Kalou, e sega ni kauaitaki keda. E Kalou ca, e vakararawataka ira na dau caka ca me tawamudu. Na lasu kece qori e dau kena inaki qo: me vakaucacataka na yaca i Jiova kei na kena irogorogo, me kua ni dua e via torovi koya. Ia na noda cakacaka e vakaseva na inaki i Setani. Eda vakavulici ira e levu ena ka dina me baleti Tamada, meda vakacaucautaka na yacana tabu na noda Kalou. Na cava na kena yaga?

¹⁵ E veivakurabuitaki na kaukaua ni ka dina ena Vosa ni Kalou. Nida vakavulica eso tale me baleti Jiova kei na veika dina me baleti koya, e yaga dina. Ena cereki na lasu e veivakamatabokotaki tu kina o Setani, sa na tautauvata na noda rai me baleta na Tamada dauloloma. Era na qoroqoro ga ena levu ni nona kaukaua. (Aisea 40:26) Era nuitaki koya tale ga ena vuku ni nona lewadodonu. (Vkru. 32:4) Era vulica e levu na ka me baleta na nona vuku. (Aisea 55:9; Roma 11:33) Era vakacegui ena nodra vulica ni o koya sara ga e dau loloma. (1 Joni 4:8) Nira toro volekati Jiova, era vakadeitaka na nodra inuinui mera bula tawamudu nira luvena. E dua dina na itavi dokai na noda vakavulici ira e levu mera toro volekata na Tamada! Nida cakava qori, e okati keda o Jiova  meda “cakacaka vata” kei koya.—1 Kor. 3:5, 9.

16. Na cava era vakila eso nira vulica na yaca ni Kalou? Tukuna eso na kena ivakaraitaki.

¹⁶ Me vaka sa tukuni oti mai, de dua na imatai ni ka meda vakavulica ni yaca ni Kalou o Jiova. Qori ena rawa ni veisautaka na nodra bula na yalomalumalumu. Kena ivakaraitaki, e dua na goneyalewa o Aaliyah, b e susu ena vuvale sega ni lotu vaKarisito. E sega ni vakacegui koya nona lotu, se me veivolekati kei na Kalou. Ia e veisau na nona rai ni tekivu vuli kei ira na tacida. E okata na Kalou me nona itokani. E kidroa ni sa kau tani na yaca ni Kalou mai na levu na iVolatabu, sa sosomitaki ena icavuti me vaka na Turaga. E veisautaka sara ga nona bula ni vulica ni yaca ni Kalou o Jiova. E kaya: “E tiko na yaca ni noqu iTokani voleka!” Na kena yaga vua? E kaya: “Qo au sa qai vakila na vakacegu ni lomaqu. Au kalougata dina.” E dua na turaga o Steve, e daunivakatagi, e lotu Jiu kaukaua. E sega ni via lewena e dua na lotu, ni raica na levu ni nodra veivakaisini. Ia ni mate o tinana, e vakadonuya me vakarorogo vua e dua na iVakadinadina i Jiova e veivakavulici tiko ena iVolatabu. E uqeti koya na nona vulica na yaca ni Kalou.” E kuria: “Au se qai vulica vakadua qo na yaca ni Kalou. Qo na imatai ni gauna meu kila kina ni bula dina tiko na Kalou, au sa qai kilai koya sara ga vakavinaka. Au kila ena gauna qori niu sa kunea e dua na noqu iTokani.”

17. Na cava mo gumatua kina ni vakacaucautaka na yaca i Jiova? (Raica tale ga na iyaloyalo.)

¹⁷ Vakacava o dau tukuna na yaca tabu i Jiova vei ira e levu ena cakacaka vakavunau kei na nomu veivakavulici? O vukei ira mera kila na veika dina me baleta na Kalou? Nomu cakava qori o sa vakacaucautaka tiko na yaca ni Kalou. Mo vakacaucautaka tiko ga na yaca tabu i Jiova, ni o vukea eso tale mera kilai koya vakavinaka. Ni o cakava qori, o na veivuke ena nodra vakabulai eso. O na muria na nona veiliutaki na noda Tui, o Jisu Karisito. Koya e bibi sara, o na vakamarautaka na Tamada dauloloma o Jiova. Mo ‘vakacaucautaka mada ga na yacana me tawamudu, io me tawamudu’!—Same 145:2.