VAKACAVA o bau sotava e dua na ituvaki qai sega ni dua me vukei iko? Eda bula tiko ena dua na ‘gauna dredre’ e rawa ni vakavuna na yalolailai kei na galili. (2 Tim. 3:1) Ia nida sotava na leqa, era tiko eso mera vukei keda. E kaya na iVolatabu ni bibi na itokani dina ena “gauna ni rarawa.”​—Vkai. 17:17.

Era tomani Paula e vica nona itokani ena nona ilakolako vakadaukaulotu ra qai vukei koya vakalevu. (Kolo. 4:​7-11) Ni vesu tu mai Roma o Paula, era vukei koya na nona itokani ena so na ka e sega ni rawa ni cakava. Kena ivakaraitaki, e kauta vei Paula o Epafirotaito na iyaya era vakauta mai na mataveitacini mai Filipai. (Fpai. 4:18) E kauta o Tikiko na ivola nei Paula vei ira na dui ivavakoso. (Kolo. 4:7; raica study note.) Nira tokoni Paula na nona itokani, e rawa kina ni vunau ni vesu tiko mada ga e vale se valeniveivesu. Na cava mo cakava mo itokani dina kina nikua?

Era ivakaraitaki vinaka ni itokani dina eso na mataveitacini ena gauna qo. Dikeva mada nona ivakaraitaki e dua na tacida yalewa e vukei Elisabet e painia tudei tiko e Sipeni. Ni kilai ni tauvi tinana tiko na kenisa, e vakauta na tacida yalewa qori eso na itukutuku veiuqeti vakaivolatabu ena talevoni nei Elisabet. E kaya o Elisabet: “E vakaukauataki au e veisiga na itukutuku qori, au sega tale ga ni galili.”​—Vkai. 18:24.

Ena dei na noda veitokani kei ira na tacida nida tokoni ira ena itavi vakayalo ena ivavakoso. Kena ivakaraitaki, vakacava o rawa ni vakavodoka e dua na itabaqase ena soqoni se cakacaka vakavunau? Ni o veivuke ena sala qori, o na rawa ni vakayaloqaqataki ira kina, era na vakayaloqaqataki iko tale ga. (Roma 1:12) Ia eso na mataveitacini era sega ni rawa ni biuta nodra vale. O na vukei ira vakacava?

Eso na mataveitacini era sega ni rawa ni tiko ena soqoni nira tauvimate. Dikeva mada na ivakaraitaki i David, e kune vua e dua na mataqali kenisa. E sivia na ono na vula nona qaravi tiko vakavuniwai (chemotherapy). Ena gauna kece qori rau sema tiko ga mai ena soqoni o David kei watina o Lidia.

Era veivuke vakacava na mataveitacini ena ivavakoso? Ni oti na soqoni era dau saga eso na mataveitacini mera veitalanoa kei rau o David kei Lidia ena vidio. Kena ikuri, ni rau dau saumitaro ena soqoni, era  dau vakau itukutuku vei rau na mataveitacini mera vakavinavinakataki rau. Cava rau vakila? Rau lomani, rau veivolekati tale ga kei ira na mataveitacini.

Vakacava eda rawa ni cakacaka vakavunau vata kei ira na tu ga e vale ena vuku ni tauvimate? Eda rawa ni veisautaka vakalailai noda ituvatuva meda cakacaka vata kei ira, me rawa nira kila nira sega ni guilecavi. (Vkai. 3:27) Vacava mo drau cakacaka vakavunau vata ni drau vola ivola se qiri? Rawa nira sema mai ena vidio ena soqoni ni cakacaka vakavunau. Erau vakavinavinakataka o David kei Lidia na ituvatuva qori. E kaya o David: “Neirau veitalanoa qai masu vata kei ira na mataveitacini ena cakacaka vunau, e vakaukauataki keirau sara ga.” Ke veiganiti qai sega ni leqataki kina na bula, vakacava mo kauta nomu vuli ivolatabu ena nona vale mo dou vuli vata ena so na gauna?

Nida cakacaka vata kei ira na tacida era tu ga e vale, eda na kila kina eso nodra itovo talei, eda na veivolekati tale ga kei ira. Kena ivakaraitaki, ni drau cakacaka vakavunau vata o qai raica na sala e vakayagataka kina na Vosa ni Kalou me vukea e dua me volekati Jiova, o na qoroi koya sara ga. Ni o tokoni ira na mataveitacini ena ka vakayalo, ena levu kina nomu itokani.​—2 Kor. 6:13.

E vakila na vakacegu o Paula ni tiko kei koya o Taito nona itokani. (2 Kor. 7:​5-7) Eda vulica ena ivakaraitaki qo ni rawa nida vakacegui ira na rarawa tiko nida veimaliwai se cakava vata eso na ka meda vukei ira kina.​—1 Joni 3:18.

Era ivakaraitaki vinaka ni veitokoni na tacida mai Rusia. Dikeva na ivakaraitaki nei Sergey kei watina o Tatyana. Era yanaraka nodrau vale na ovisa rau qai kau me rau vakatarogi. E sereki e liu o Tatyana qai vakasukai i vale. E kaya o Sergey: “Ni yaco ga yani e vale [o Tatyana], e yaco yani e dua na tacida yalewa yaloqaqa. Era yaco tale ga yani eso na itokani mera vukei keirau ena kena samaki vinaka tale na vale.”

E kaya tale o Sergey: “Au dau taleitaka na Vosa Vakaibalebale 17:​17, e kaya: ‘Na itokani dina e loloma ena veigauna, e tacida ena gauna ni rarawa.’ E vakaibalebale sara vakalevu vei au na tikinivolatabu qori ena gauna au tusaqati kina, e vinakati sara ga nodra veitokoni na itokani. E vakarautaka o Jiova na itokani yaloqaqa mera vukei au.” a

Ni sa qai dredre tiko ga na ituvaki, sa qai bibi ga nodra veivuke na noda itokani. Ena vinakati sara vakalevu nodra veitokoni ena veivakararawataki levu. Meda saga sara ena gauna qo meda itokani dina!​—1 Pita 4:​7, 8.